Ordførar Kyrre Lindanger 

Juli 2012 

Kjære sambygding

Den 30. juni vakna boknarane opp til den triste meldinga om at me hadde mista ein av ungdommane våre under Skudefestivalen i Skudeneshavn. Det var vanskeleg å ta innover seg at ein av våre ungdommar, som stod på trappa til vaksenlivet, på tragisk vis blei riven bort. Tommy Øvrebø var umisteleg for sine kjære, men også for venner og kollegaer og eit heilt samfunn. Han var ein sjeldan miljøskapar, og han let etter seg eit tomrom. I ei lita bygd blir me alle råka når slikt skjer.

I 1996 blei boknasamfunnet ramma av ei hending der ein ungdom omkom i samband med ei tragisk ulukke i Oslo, samstundes som to born blei tatt av ein bråttsjø då dei gjekk tur på svaberga i Loden. Dei vonde kjenslene frå desse to hendingane kom tilbake for mange nå i sommar. Men den gang som nå viste boknarane samhald og varme for kvarandre. Dører blei opna i ungdommelege rammer på idrettshuset, kyrkja og i mange boknaheimar. Boknarane stod opp for kvarandre og var der for ein heil generasjon av ungdommar som var direkte råka av hendinga.

Sorga for pårørande og venner går ikkje over sjølv om livet går vidare. Ein lærar seg sakte å leva med det som har skjedd, men det er ei lang reise. Å kome seg vidare er ikkje alltid lett når livet tar ei vond vending. Det er viktig å akseptera at sorg tar tid. I vår tid og i vår kultur er det ofte når alle rituala kring dødsfallet og gravferda er over, at sorga tyngjer mest. Då står ein der med i ei kjensle av å vera åleine i saknet. Difor er det ikkje minst då at den vesle merksemda kan vera så viktig for dei som er i djup sorg. Ein klem, eit klapp på kinnet, eller orda: «Tenker på deg.» skrive på eit fint kort, har stor betydning når kvardagen set inn.

Tommy blir ikkje gløymd. Minna om han lever vidare. Han hadde ein stor vennekrets og mange har opplevd det musikalske talentet hans og utstrålinga frå scenekanten då han spelte og song i bandet «The Kvednabekkjers». Ein flott ungdom kjem ikkje til å få utfolda seg slik han skulle gjort. Han er borte, men songane og tekstane hans vil leva vidare.

Eg vil takka alle som på ein eller annan måte har bidrege i sorgarbeidet og som har gitt ei skulder å gråte på, og som gjennom ord eller handlingar har vist medkjensle i ei tung tid for ungdommane i Bokn.

Vit at heile bygda er med dykk!

Ordføraren

Mai/Juni 2012

Kjære sambygding

Vegnamn
I byrjinga av 2000 innførte Bokn kommune namn på dei lokale vegtraseane i bygda som grunnlag for å etablera adresseparsellar og for å kunne gi eit logisk oppbygd adressesystem i kommunen. Saka blei likevel hengande i lufta etter at enkelte vegnamn blei tatt ut igjen nokre år seinare. I møte den 15. mai gjorde formannskapet vedtak om å ta tilbake nokre av dei opphavlege vegnamna. Desse er Dagslandsvegen, Hålandsvegen, Krovågen, Bakken, Stølsvegen, Stabburvegen, Lyngvegen og Leirgrov.

Som i andre kommunar handlar stadnamn om engasjement og sterke meiningar. Vegnamn er sterkt knytt opp mot tilhøyre og identitet. I tillegg er vegskilting ein viktig måte å halda i hevd gamle stadnamn som elles ville ha gått ut av daglegtalen. Med vedtaket som formannskapet gjorde i vår, håpar eg dei siste brikkene har falt på plass i forhold til dette temaet.

Vegnamna skal endeleg godkjennast av kommunestyret og nye husnummer må tildelast aktuelle husstandar. Det er uvisst når dette kan skje, men skilta med dei nye namna ligg klar og kan monterast opp på kort tid. Deretter vil det vera ein overgangsperiode på omlag to år der dei nye namna blir fasa inn i ulike kartdatabasar.

Hålandssjøen
Arbeidet med å få ferdigstilt moloen i Hålandssjøen går nå inn i sluttfasen. I fjor fekk Bokn kommune ført steinmasse frå T-sambandet til moloanlegget, og nå gjenstår arbeidet med mellom anna plastring. I tillegg skal ein grava opp massar på innsida av moloen som ligg så grunt at dei hindrar bruken, og ein skal føra fram vatn og straum. Molotoppen skal også planerast og få toppdekke.

Kommunestyret løyvde i møte den 17. april midlar til å planlegga og gjera ferdig moloen og landområdet ved molofestet. Planen skal visa bruken av båthamna på sjø og land og legga til rette for parkering og fellesnaust med boder. Anbudet på arbeidet med å ferdigstilla moloen blir sendt ut i løpet av sommaren. Sjølve arbeidet bør kunne setjast i gang i løpet av hausten.

I tråd med kommunestyrevedtaket blir det i desse dagar laga til forslag til avtale med Bokn Båtforening om langtidsleiga der båtforeninga skal administrera vidare utleige. Det er sett som ein føresetnad at innskot og leige frå brukarane skal bera kostnadane som båtforeininga har på ein relativ andel av kommunen si investering i området.

Brannsamarbeid
Det blir i desse dagar inngått ein ny samarbeidsavtale mellom Bokn kommune og Tysvær kommune når det gjeld brannvern- og feiing i Bokn. Bakgrunnen for dette samarbeidet, er behovet for auka fagleg kompetanse i forhold til beredskap, tilsyn og ressurstilgang. Ein ser at det frå sentralt hald blir stilt stadig strengare krav til leiing og brannmannskap. I Bokn kommune har ein fram til nå hatt medarbeidar med denne kompetansen, men det har blitt stadig vanskelegare å kombinera brannsjefrolla med andre arbeidsoppgåver.

Tysvær kommune vil etter den nye samarbeidsavtalen ta over brannsjefoppgåvene for Bokn. Dette inneber at Tysvær kommune skal utføra ein del av dei oppgåvene Bokn kommune er pålagde etter Brann- og eksplosjonsvernlova. Dette inneber også at Bokn brannvesen blir innlemma i etablert brannbefalsordning i Tysvær kommune.

Denne avtalen er eit nødvendig steg i retning av eit tettare interkommunalt samarbeid mellom brannetatane på Haugalandet. Ei stadig innskjerping av krav til kompetanse hjå brannmannskapa gjer det naudsynt å søke saman mot eit tettare samarbeid på tvers av kommunegrensene. Det har tidlegare blitt forsøkt å etablera eit interkommunalt brannvesen i vår region etter modell frå Sør-Rogaland, men utan at ein til nå har lukkast.

Spesielt med tanke på nye samferdsleprosjekt som vil kome dei neste åra, med lange undersjøiske tunnelar i T-sambandet og Rogfast, trur eg tida er moden for kommunane på Haugalandet å søke saman i eit interkommunalt brannvesen. Bokn blir vertskommune for tunnelinnslaget til Rogfast i nord og får ansvaret for brann- og redning i sin del av den undersjøiske tunnelen. Dette er oppgåver som ville vore utfordrande sjølv for større kommunar, men kan også opna dører for nye aktivitetar i Bokn, slik som til dømes etablering av eit beredskapssenter i Arsvågen der naudetatane kan samlokaliserast.

Det er i gang tverretatlege samtaler om dette emnet der Bokn kommune sjølvsagt er representert. Eg håpar planlegginga rundt Rogfast-prosjektet kan vera brekkstanga som vippar på plass den mest framtidsretta organiseringa av brannberedskapen i regionen: Haugaland Interkommunale Brannvesen.

Ordføraren

April 2012

Kjære sambygding

Kommuneplanarbeidet
Arbeidet med å rullera kommuneplanen i Bokn går nå inn i siste fase og ein ser ende på arbeidet som blei starta opp hausten 2008. Kommuneplanrullering er eit ressurskrevjande og omfattande arbeid, men samstundes er ”generalplanen” det viktigaste styringsdokumentet politikarar og administrasjon har. Men kravet om eit planprogram har forseinka arbeidet eitt år i dei fleste kommunane.

I løpet av mai skal ein avgjera kva innspel som skal til høyring og forhåpentlegvis blir ein del av den nye kommuneplanen. Samstundes ferdigstillar administrasjonen samfunnsdelen (tekstdelen). I løpet av sommaren blir planen lagt ut på høyring. Eventuelle innvendingar frå Fylkesmannen vil bli handtert tidleg på hausten. Det kan då vera aktuelt med synfaringar, møter og eventuelt mekling for å avklara usemje mellom kommune og stat.

Arbeidet med kommuneplanen har tatt tid, og det kjem det også å gjera i framtida, men eg meinar det har vore ein god og konstruktiv prosess undervegs. Både politisk og administrativt har det vore brei deltaking og dei nye politikarane har fått medverka og satt sitt preg på arbeidet og med det har ein sikra ei naudsynt forankring til kommunen sin mest sentrale plan dei komande åra.

Produksjon av Bokn Bygdablad
Alle kommunar har eit informasjonsansvar ovanfor innbyggarane. Måten ein sikrar informasjonsflyt ut frå rådhusa blir løyst på ulike måtar i kommunesektoren. I Bokn har ein vald å distribuera informasjonen til innbyggarane i ei innpakking som du nå held i henda. Ein har jamvel vald å gå litt lenger i Bokn. I tillegg til kommunalt stoff freistar ein å spe på med redaksjonelt stoff frå bygda i form av nyhendeartiklar, portrettintervju, historiske artiklar, lesarinnlegg og anna stoff som tar opp i seg livet i bygda.

Å produsera bygdabladet er ressurskrevjande og er heller ikkje ei lovpålagd oppgåve for kommunen. Ein har likevel, gjennom 27 år, sett verdien av å ha ei eiga ”lokalavis” som i tillegg til å vera informativ, bygger boknaidentiteten og aukar kjensla av samhald og fellesskap gjennom ulike artiklar om stort og smått frå livet i Bokn. Ut i frå tilbakemeldingane blir Bokn Bygdablad satt pris på – både i og utføre Bokn. Men Bokn Bygdablad er ikkje ei dagsavis som omtalar nyhendebiletet siste døgnet. Bladet kjem ut med 10 utgåver i året og artiklane kan vanskeleg vera dagsaktuelle i forhold til papirutgåva. Bokn Bygdablad er eit kommunalt informasjonsorgan der ein nyttar høvet til å dokumentera alle sider av bygdalivet i ord og bilete, til glede for nåverande og komande generasjonar.

Sett utifrå storleiken på kommunen vår, er det imponerande at ein i det heile tatt maktar å produsera eit eige bygdablad. Det er ikkje vanskeleg å forstå at med knappe ressursar er redaksjonen heilt avhengig av å få tilsendt stoff som er produsert av boknarane sjølv.
Redaktøren har 50% stilling til produksjon av bygdabladet. I dette inngår både journalistisk arbeid, handsaming av innkome stoff, biletbehandling, montering av bladet og oppdatering av nettstaden. Produksjonskostnadane knytt til trykking er merkbar, og ein auke i utgiftene til journalistisk arbeid vil nødvendigvis gå ut over andre lovpålagde oppgåver. Difor vil produksjonen av dette produktet inntil vidare vera eit kompromiss basert på ein viss dugnadsinnsats frå bygda sine eigne skribentar.

Eg vil oppmoda boknarar og det frivillige lags- og organisasjonslivet i Bokn til å bidra i produksjonen og vera med å gjera dette til eit endå betre blad. Har du noko på hjarta eller er det hendingar du meinar burde vore omtala i Bokn Bygdablad, har ein her eit framifrå talerøyr som når ut til dei fleste sambygdingane. Er det hendingar eller arrangement i Bokn som burde vore skrive om og som redaksjonen sjølv ikkje får fylgd opp, kan ein knipsa eit bilete sjølv og skriva nokre ord. Ein kan også få hjelp til å forma ut ein artikkel i etterkant ved å venda seg til redaktøren.

På denne måten vil ein bidra til at Bokn også i framtida skal ha eit mangfaldig og variert bygdablad som gjer dette produktet til noko meir enn eit reint kommunalt informasjonsskriv. Det trur eg alle er tent med.

Ordføraren

Mars 2012

Kjære sambygding

Rogfast
Samferdsleetatane sitt forslag til Nasjonal Transportplan (NTP) blei lagt fram den 29. februar. I planen, som kjem i ny utgåve kvart fjerde år, fortel regjeringa kva ho vil gjera med transportpolitikken dei neste ti åra. Arbeidet med neste utgåve av planen er starta opp og dei fleste statlege samferdsleetatar kjem med sine forslag. Til neste år legg regjeringa fram sitt forslag for Nasjonal Transportplan for perioden 2014-2023.

I det administrative forslaget til NTP blei Rogfast-prosjektet meir nedprioritert enn ynskjeleg. Ei årsak er at Statens vegvesen justerte opp kostnadane med to milliardar kroner. Men det er ikkje funne plass til pengane før i siste del av 10-års-perioden som NTP-en skal gjelda for. Samstundes er det ein føresetnad at løyvingane til samferdsel skal justerast opp med 45 % i forhold til i dag.

Eit anna krav er at det blir semje i forhold til eit opplegg for delvis bompengefinansiering av Boknafjord-kryssinga. Her kan nemnast at fylkestinget i Rogaland den 6. mars sa ja til førehandsinnkrevjing av bompengar i Boknafjordsambandet.

Lyspunktet i forslaget er likevel at Rogfast er blitt framskunda i tid. Vegstyresmaktene reknar nå med ein oppstart i 2015 og sju års anleggstid. I tillegg vil staten auka den statlege delen frå 500 millionar til eìn milliard. Prislappen for prosjektet er nå på åtte milliardar kroner.

Signala frå det politiske miljøet i Rogaland er likevel positive. Det er ei klar oppfatting at Rogfast er eit prosjekt som kan byggast uavhengig av statlege løyvingar då ein meinar trafikkgrunnlaget og inntektene frå bompengar er så pass stort, og at prosjektet tvingar seg fram i kraft av storleik og samfunnsmessige nytte.

For Bokn kommune sin del går reguleringsplanarbeidet uansett vidare. Dette er også tilbakemeldingane frå prosjektleiinga i Statens vegvesen. Det blir gjennomført jamlege administrative møte mellom dei tre vertskommunane Bokn, Kvitsøy, Randaberg og Statens vegvesen og regionale mynde. I tillegg blei Irene Risheim Kristiansen på nyåret tilsett som plankoordinator for dei tre vertskommunane for Rogfast. Ho jobbar på Boknatun eìn dag i veka og er sentral i forhold til det planmessige arbeidet som nå blir utført i Bokn kommune.

I samband med oppstart av reguleringsplanarbeidet for Rogfast har Fylkesmannen i Rogaland kome med tydelege innspel til massedisponeringa, og ber om at det blir laga ein samla massedisponeringsplan for utbygginga. I desse dagar blir det sett på moglege deponeringsområde for tunnelmassar frå Rogfast i området sør for Knarholmen.

Elles er det frå politisk hald i Rogaland positive tilbakemeldingar på forslaget til ny NTP, mellom anna fordi det er sett av store midlar til vedlikehald i fylket. Dette viser at det er gjort mykje godt arbeid lokalt inn mot sentrale styresmakter.
Signala frå sentrale Rogalandspolitikarar gjer også optimisme i forhold til gjennomføringa av Rogfast-prosjektet. Forslaget til NTP er eit administrativt forslag - det er nå jobben skal gjerast politisk for å få Rogfast inn i NTP med høgast mogleg prioritet. Den jobben tar me på alvor i Bokn, og eg veit at haldninga er den same hjå politikarar og næringslivet elles i fylket. Med strategisk og målretta politisk arbeid i tida framover er eg sikker på at Rogfast blir ein realitet innan den tida ein jobbar utifrå i dag.

Ordføraren

Februar 2012

Kjære sambygding

Fleirbrukshall
I kommunestyremøte den 14. februar blei plasseringa av fleirbrukshallen i Bokn endeleg vedtatt. Saka starta tidleg førre periode og mykje godt arbeid er alt gjort. Men for at administrasjonen skulle koma vidare, var det nå avgjerande å vedta ein plassering. Nå har kommunestyret bestemt at ein i kommuneplanen set av areal for bygging av fleirbrukshall og barnehage i området ”Tresnippen” i Føresvik. I denne samanhengen vil ein også vurdera ei omlegging av Føresvikvegen slik at trafikken ikkje kjem i konflikt med brukarane av fleirbrukshallen.

Kommunestyret har bedt administrasjonen om å setja i verk nødvendig planarbeid og konsekvensutgreiing, og det vil bli oppretta eit planutval for bygging, drift og finansiering av anlegget. For å løysa plassproblematikken i dagens skulebygg, har kommunestyret også bedt formannskapet om å oppretta ei sak om ombygging/utbygging av Bokn skule. I tillegg er det vedteke å førebu ei sak om utbygging av ei ny avdeling i Bokn barnehage for å løysa dei kortsiktige arealproblema.

Med desse vedtaka er det tatt eit viktig steg vidare for å få realisert ein fleirbrukshall i bygda. Men det er framleis mykje arbeid som skal gjerast før bygget står klart. Ein vil nå frå administrasjonen si side intensivera arbeidet og kjøre fleire planmessige løp for at ein kan få spaden i jorda så raskt som mogleg. Det er vanskeleg å seia noko nå om kor tid ein fleirbrukshall kan stå ferdig, men politisk og administrativt skal ein i tida framover jobba intensivt med denne viktige saka.

Brufast?
Statens vegvesen startar nå ei utgreiing om bygging av ei 7,5 km bru over Boknafjorden. Ei aktuell løysing kan vera ei skråstagsbru med flytande tårn forankra ned til 500 meters djupne. Årsaka er samferdsledepartementet sitt krav om at ei bruløysing blir utgreidd parallelt med tunnelalternativet.

Bakgrunnen er at fagmiljøet nå ser at det er i ferd med å bli teknisk mogleg å kryssa slike krevjande fjordar med ei bruløysing. Undersjøiske tunnelar er også svært dyre i drift, og bru kan vera eit billegare alternativ på lang sikt. Utgreiinga blir, i fylgje prosjektleiar Olav Ellevset, satt i gang nå slik at Statens vegvesen slepp å kome tilbake til dette spørsmålet når ein i 2015 startar utbygginga av Rogfast basert på ei tunnelløysing. Statsråd Magnhild Meltveit Kleppa har lagt inn ein klar premiss om at skisseprosjektet ikkje skal forseinka framdrifta av Rogfast.

Eg forventar at den vendinga planlegginga nå har tatt, ikkje på nokon måte forseinkar Rogfast-prosjektet. Det har vore krevjande nok å få sentrale mynde til å opna opp for ein tunnel til 8 milliardar kroner om ein ikkje nå også skal kjempa fram aksept for eit bruprosjekt til 20 milliardar kroner. Eg oppfattar dette skisseprosjektet som eit byråkratisk pliktløp som ein bør setja strek over så snart som råd. Alt anna vil kunne stela fokus frå det viktigaste samferdsleprosjektet på Vestlandet nokon sinne.

Møte med ny fylkesordførar
Den nye fylkesordføraren vår, Janne Johnsen (H), har i løpet av vinteren besøkt kommunane i Rogaland, og den 2. februar var ho i Bokn saman med fylkesvaraordførar Terje Halleland (Frp). I denne samanhengen blei det tatt opp ulike saker for Bokn kommune, ikkje minst saker som er viktige i samband med kommuneplanarbeidet. Det var då naturleg å drøfte Rogfast og bruk av tunnelmassar. Fylkesordføraren heldt fast ved at Rogfast er det viktigaste samferdsleprosjektet i Rogaland og at det framleis blir tillagt spesiell politisk merksemd i fylkeskommunen.

Det var viktig å streka under at Bokn kommune treng støtte frå Rogaland fylkeskommune i samband med planarbeidet for å få gjennomslag for utbyggingar og prosjekt som er viktige for bygda framover, slik som til dømes bustadbygging og næringsutvikling og bruk av tunnelmassar frå Rogfast.

I slike samanhengar er fylkeskommunen spesielt viktig for småkommunar som Bokn, som er avhengig av regional drahjelp for å utvikla lokalsamfunnet. Fylkeskommunen si oppgåve er å vera forvaltar, tenesteprodusent og regionalutviklar. Me veit at storbyane utfordrar fylkeskommunane på desse oppgåvene, særleg innan eigne bygrenser, men også for småkommunane som ligg rundt. Fylkeskommunen er ein viktig ombudsinstitusjon for kommunen, også i forhold til å gi råd og rettleiing. Difor er det viktig for meg som ordførar å ha ein fortløpande og tett dialog med fylkesordføraren.

Møtet i Bokn var nyttig. Fylkeskommunen fekk viktig kunnskap om pågåande planarbeid, og me fekk mange positive signaler i forhold til dei sakene me er opptekne av. Fylkesordføraren meinte i det heile at Bokn går ei spennande tid i møte i forhold til det som skal skje innan samferdslesektoren dei neste åra.

Ordføraren

Desember 2011

Kjære sambygding

Budsjett 2012
Budsjettet for 2012 blei vedteke av kommunestyret den 13. desember og var eit fellesforslag frå Arbeidarpartiet og Høgre. Budsjetta som har blitt vedtatt dei siste åra har vore strame, og dette skuldast i hovudsak at ein framleis har ei forholdsvis høg lånegjeld i Bokn, samstundes som ein står føre fleire store investeringar dei komande åra. Likevel har politikarane funne rom til fleire gode løyvingar både innan investeringar og drift. På investeringssida er det mellom anna lagt inn midlar til utbetring av kjellaretasjen ved Kyrkjebygd kulturhus, til glede for brukarane av Petra fritidsklubb. Vidare har ein prioritert å skifte ut gjerdet rundt Føresvik stadion og montering av overrislingsanlegg i dei nordre omsorgsbustadene på Boknatun.

I driftsbudsjettet er det lagt opp til ei rekkje mindre tiltak, mellom anna montering av teleslynge i auditoriet på skulen, servicetorget og allrommet. Vidare er det satt av midlar til utskifting av stolane i auditoriet ved Bokn skule og innkjøp av diverse utstyr til seksjon teknisk, mellom anna blåsemaskin, kompressor og reserve kloakkpumpe.

Kommunestyret har også prioritert ei framleis auke i opningstida ved biblioteket og har løyvd midlar som opprettheld aktiviteten ved musikkskulen. Ein har i tillegg prioritert ei 15 % auke i drifta ved fysioterapiavdelinga på Boknatun.
Kommunestyret vedtok også å auke ei av stillingane i servicetorget, i tillegg blei engasjementstillinga som koordinator for folkehelse og Kjekt på Bokn omgjort til fast stilling.

Når det gjeld avgifts- og betalingsregulativ for neste år, held me oss på eit moderat nivå. I hovudsak blir satsane auka med mellom 1-5 %. Abonnement på Bokn Bygdablad og annonsar aukar ein med ti prosent. Det blei samstundes bestemt at auken i abonnementet for Bokn Bygdablad skal nyttast til å gje ut bladet i fargar.

Energi- og klimaplan
Kommunestyret vedtok i møtet 13. desember energi- og klimaplan for Bokn kommune. Arbeidet med utarbeiding av planen blei starta opp i 2009 saman med kommunane Sveio og Etne. Kommunane søkte om, og fekk støtte av ENOVA, til å utarbeida planen.

Gjennom ein slik temaplan ynskjer kommunen å etablera eit felles energi- og miljømål for å sikra ei berekraftig utvikling, samstundes som ein lokalt får ein reiskap til å sikra heilskapsomsyn i alle saker knytt til energi- og miljø i kommunen.
Planen skal i fyrste rekkje gjelde for kommunens eiga verksemd, men ved implementering av mål og strategiar i kommuneplanen vil ein også kunne påverke andre aktørar, som private husstandar, næringsliv og industri.

I løpet av 2012 vil det bli laga ei utgreiing som viser kostnadane for gjennomføring av dei ulike tiltaka basert på ei kost/nytte-vurdering. Planen vil deretter bli tatt opp til ny handsaming i kommunestyret slik at kostnadane kan implementerast i planen.

Tradisjonsrikt julemøte
Sidan midten av 90-talet har ordførarane i Bokn og Tysvær hatt ein tradisjon der ein byter på å invitera formannskapa i kommunane til ein felles middag oppunder jul. Den 14. desember var Bokn kommune vertskap for ein hyggeleg førjulsmiddag mellom to gode naboar, og seansen blei gjennomført på allrommet på Boknatun.
Velvillig kjøkkenpersonal på sjukestova hadde laga til eit særs koseleg kveldssete i kommunens storstove, og hadde laga ein pinnakjøtmiddag på høgd med dei beste restaurantane.

Eg set stor pris på denne over tjue år gamle tradisjonen der formålet fyrst og fremst er å pleia godt naboskap. Forma på desse møta er hyggeleg og uformell. Politikarkollegaer i dei to kommunane kjem saman utan noko spesielt ærend eller sakskart. Det viktige er rett og slett å bli betre kjende med kvarandre mellom anna ved å drøsa om laust og fast.

Eit slikt samvær er med på å skapa tillit på tvers av kommunegrensene. På mange område er nok våre to kommunar konkurrentar, men likevel er det slik at i dei fleste samanhengar står me saman med Tysvær i spørsmål som handlar om å posisjonera regionen, på tilrettelegging og planlegging med spesielt fokus på å skapa vekst og aktivitet til glede for fellesskapet i ein heil region.

Tysvær er på mange område den viktigaste samarbeidskommunen vår, og dei to administrasjonane har gjennom åra signert ei rekke viktige samarbeidsavtalar. Politikarane i dei to kommunane jobbar utifrå tanken om at det som er bra for Tysvær, er bra for Bokn, og omvendt. Dette kjem tydeleg til uttrykk på dei etterkvart mangfaldige interkommunale møteplassane me treffest. Samarbeidet er viktig og ofte avgjerande for kommunen vår. Difor tek eg sikte på å pleia den gode naboskapen også i dei kommande åra.

Eg vil til slutt nytta høvet til å ynskja alle leserane av Bokn Bygdablad ei fredeleg julehelg og eit godt og fargerikt nytt år.

Ordføraren

November 2011

Fram for eit raust Bokn

Kjære sambygding

Bokn kommune er ein liten og sårbar organisasjon der kvar medarbeidar tel. Når me i nasjonale undersøkingar stadig blir rangert mellom dei beste kommunane, er ikkje det minst eit resultat av at me i alle ledd har framifrå dugelege, entusiastiske, idealistiske, lojale og sjølvgåande medarbeidarar. Dei har difor den fleksibiliteten som trengst for å yta innbyggarane eit dagleg tenestetilbod på høgd med det beste i landet. For overtida får dei likevel sjølvsagt ei betaling i samsvar med gjeldande lønnsavtalar.

Også leiargruppa gjer ein innsats det er å ta av seg hatten for. Men i motsetnad til andre tilsette, får dei ikkje overtidsbetaling eller anna form for kompensasjon. Det gjeld uansett kor lenge arbeidet strekkjer seg ut over normalarbeidstida. Såleis kan dei vederlagslaust sitja på møte til langt på natt.

I kommunar flest er det stor gjennomtrekk av rådmenn. Kvar veke les me stillingsannonsar frå kommunar i desperat jakt etter gode rådmenn. I kontrast til dette har me neste år her i Bokn vore så heldige å ha hatt Jan Erik Nygaard som kommunens øvste administrative leiar i ein mannsalder. Faktisk er han den rådmannen med lengst fartstid i heile Rogaland. I løpet av desse åra har fleire generasjonar med boknpolitikarar fått gleda av å samarbeida med han. Og truleg kan dei alle skriva under på at han har vore ein lojal, samvitsfull og særs hardtarbeidande administrasjonssjef som alltid søkjer dei gode løysingane på ein smidig, profesjonell og diplomatisk måte.

I det heile er det ei stor utfordring å skaffa nøkkelpersonell til dei kommunale administrasjonane kring om. I dette må Bokn konkurrera med mykje større og meir sentrale kommunar. Dette er dess meir utfordrande sidan me nett nå er inne i eit omfattande generasjonsskifte av nøkkelpersonell. Når Bokn likevel er blitt attraktiv, heng det truleg mellom anna saman med at det også for kommunalt tilsette er blitt kjekt å vera her. Gradvis har inntrykket bygd seg opp at Bokn er ein velstyrt og velfungerande kommune der det rår ein inspirerande, inkluderande, raus og motiverande atmosfære og ein romsleg personalpolitikk. Skal Bokn kommune vera liv laga, er det viktig å ta vare på denne profilen.

Fleire nøkkelpersonar har slutta dei siste åra eller er på veg ut av kommunen. Dette gjeld og seksjonssjefar. Mange og viktige saker har blitt liggande. Rådmannen har i denne situasjonen delvis gått inn i den formelle rolla som seksjonssjef med ei stor auke i arbeidsoppgåver utan å krevja noka form for honorering. Bokn kommune har spart pengar utan at drifta blei forstyrra. I det heile har det vore ei vesentleg auke i arbeidsmengda for rådmannen.

Dette var utgangspunktet då formannskapet i møte den 14. juni i år diskuterte  kompensasjon til rådmannen. Resten av historia har blitt grundig referert i dagspressa. Det som skulle vera ein hyggeleg gest og klapp på skuldra til rådmannen vår for lang og tru teneste, blei ei trist sak som gjennom negativ vinkling av ei konspiratorisk presse skada omdømmet til Bokn kommune. Sjølvsagt nytta dei også høvet til å stilla spørsmålsteikn ved om små kommunar har livets rett.

Nå gjeld det å leggja denne saka bak oss. Me må sjølvsagt læra av det som har skjedd, men løfta hovudet og sjå framover og konsentrera oss om dei viktige sakene for boknarane. Me skal ikkje la oppslaga i pressa få øydeleggja den positive stemninga som har rådd i bygda i dei seinare åra. Ein skal lyfta blikket og visa boknarane som rause, inkluderande og positive. Det biletet av boknarane er det me skal visa verda!

Ordføraren

Oktober 2011

Kjære sambygding

Takk for tilliten
Det nye kommunestyret konstituerte seg på Boknatun tysdag 18. oktober. Då blei nytt formannskap og andre politiske utval vald, i tillegg til ordførar og varaordførar. I den samanhengen fekk eg fire nye år som ordførar.
Eg vil då takka veljarane for tilliten dei viste Arbeidarpartiet og kandidaturet mitt ved valet, og ikkje minst for den tilliten som kommunestyret viste ved samrøystes å velja meg til ordførar i Bokn.

Eg er viss på at samarbeidet i kommunestyret blir godt og positivt i komande periode. Det betyr ikkje at me skal vera einige i alle spørsmål, men at me er i stand til å samla fokus og krefter når det er naudsynt til fellesskapets beste.

Eg vil at me saman skal finne fram til dei gode løysingane. I denne prosessen skal me utløyse kreativitet, inspirera og motivera kvarandre og frigjera nye, positive krefter. Slik eg kjenner alle våre kommunalt folkevalde, er eg trygg på eit konstruktivt og ektefølt engasjement som tek vare på dei forventningane boknarane har til oss.

Ipad til folkevalde
Sytten splitter nye iPad II med kommunevåpen låg klare til dei folkevalde då kommunestyret konstituerte seg 18. oktober.
iPaden er ikkje stort større enn ei vanlig bok, men mykje tynnare. Det er ein slags mini-PC med lang levetid på batteriet. Med denne tek me farvel med den  tradisjonelle måten å presentera saksdokumenta. Ipaden har alt ein treng til å kunne lasta ned og lagra saksdokument, kart og bilete, i tillegg til å kunne laga eigne notat.

Kommunar over heile landet arbeidar for å fjerna dei store papirbunkane. Mange har innført, eller vurderar innført, dei såkalla nettbretta. Saman med Sola og Hjelmeland er Bokn blant dei fyrste kommunane som tek i bruk iPad i Rogaland. Også Stortinget har levert lesebrett i form av iPad til alle stortingsrepresentantane.

Me har nådd ei tid med omfattande elektronisk informasjonsflyt. Difor er dette eit verktøy som både politikarar og tilsette vil ha stor nytte av. Papirmengda har etter kvart blitt for stor. Dette tiltaket er miljøvennleg og eit nettbrett er enklare enn ein PC. I det heile tatt er nettbrettet eit flott og framtidsretta reiskap.

Eg håpar overgangen frå papir til Ipad skal gjera lokalpolitikk både enklare og kanskje litt kjekkare, samstundes som kommunen kan spara fleire hundre tusen kroner på reduserte kopi- og portoutgifter, i tillegg til innspara arbeidstid for dei tilsette ved servicetorget.

Statsbudsjettet
Den 6. oktober la regjeringa fram statsbudsjettet for neste år – eit budsjett som er blitt omtala som både nøkternt og stramt. Regjeringa vil neste år bruka 2,4 milliardar mindre enn det den såkalla handlingsregelen tilseier.

Regjeringa har ei ramme på statsbudsjettet på 1.006 milliardar kroner for 2012. I fylgje finansminister Sigbjørn Johnsen er budsjettet tilpassa ein økonomisk situasjon med stor internasjonal uro, og er spesielt innretta for å trygga arbeidsplassar, verdiskaping og velferd framover.

For kommunesektoren inneber likevel forslaget til statsbudsjett at kommunane får ei reell inntektsauke på fem milliardar kroner neste år. Om lag 3,75 milliardar av denne auken kjem som frie inntekter. På toppen av inntektsauken på fem milliardar, som svarar til ein reell auke i overføringane på 1,4 prosent, vil kommunesektoren få ein milliard meir i skatteinntekter i 2011, ifylgje nye overslag som regjeringa har gjort.

I Rogaland blei faktisk Bokn ein av budsjettvinnarane med ei auke i dei frie inntektene frå 2011 til 2012 på 5,5 prosent. I same periode er anslått landsgjennomsnittleg vekst på 4,7 prosent, og for Rogaland 4,9 prosent. Til samanlikning fekk Utsira og Kvitsøy høvesvis 3,4 og 3,3 prosents auke. Auken i dei frie inntektene skuldast i all hovudsak den flotte auken i folketalet det siste året. Per 1. juli var det folkeregistrert 854 innbyggarar i Bokn – ein auke på 17 personar sidan 2010.

Ordføraren

September 2011

Kjære sambygding

Kommune- og fylkestingsvalet 2011
Etter dei tragiske hendingane 22.juli var me spente på i kva grad veljarane ville bli mobiliserte til kommune- og fylkestingsvalet. Frammøtet var litt betre enn tidlegare,  men ikkje så bra som mange hadde håpa. Positivt er det likevel at ein negativ trend er snudd. På landsbasis var frammøtet på 63,8 %. Bokn var langt betre med 73, 2 %, ein framgang på 4 %. Av 623 røysteføre, møtte 456 på Boknatun valdagen, mens 66 hadde førehandsrøysta. Etter at alle tala var summerte, blei tre jamstore og eit lite parti representerte i kommunestyret.

Som i alle andre kommunar var det også i Bokn hektisk aktivitet og samtalar mellom ulike parti i dagane etter valet. Etterkvart falt brikkene på plass. Posisjonar blei fordelte, mange blei fornøyde, andre blei skuffa. Uansett håpar, og trur eg, at ein samlar den politiske viljen og energien etter konstitueringa i oktober og ser framover. Det nye kommunestyret er samansett av vel kvalifiserte og engasjerte politikarar innstilte på krafttak for boknafelleskapet.

Kommunale avgifter
Dei siste åra har forfallsdato på kommunale avgifter vore den 30.04 for 1.termin og  den 31.10 for 2.termin. På grunn av ei omlegging av faktureringa og problem med ein ekstern tenesteleverandør, blir det for 2011 sendt ut tre rekningar. Dette har tidlegare blitt varsla i Bokn Bygdablad.

Rekninga som blei sendt ut i august var for 1. termin 2011. Rekninga for 2.termin 2011 kjem i november. Økonomiavdelinga reknar med at dei ordinære forfallsdatoane (30.04. og 31.10.) vil bli haldne når problema med ekstern leverandør er løyste.

TV-aksjonen 2011
TV-aksjonen går i år til Norsk Folkehjelp og deira arbeid med å rydda miner og klasevåpen i ei rekke land i Afrika, Asia, Europa og Midt-Austen. I tillegg skal delar av dei innsamla midla gå til opptrening av minehundar i Norsk folkehjelp sitt eige globale treningssenter i Bosnia-Hercegovina. Norsk Folkehjelp er allereie ei av verdas største humanitære organisasjonar innan minerydding.

Kvar dag  blir uskuldige menneske drepne og lemlesta av attliggjande miner og klasebomber. Norsk folkehjelp skal bruka pengane frå TV-aksjonen i sju land med mineproblem i Asia, Afrika og Europa. I alle landa skal dei innsamla midla bli brukte til konkrete mineryddingsprosjekt.
Fjerning av miner og klasevåpen vil skapa tryggleik som opnar for gjenreising og utvikling av område som lenge har vore avstengde på grunn av trusselen frå eksplosiva.

Norsk folkehjelp har gitt TV-aksjonen 2011 slagordet ”Fra frykt til trygghet”. Det er kringkastingssjefen som formelt tildelar TV-aksjonen etter tilråding frå NRK sitt innsamlingsråd. I alt 10 organisasjonar søkte om å få tildelt TV-aksjonen for 2011. Norsk Folkehjelp har fått TV-aksjonen to gonger tidligare, i 1983 og 1994.

Bokn formannskap ynskjer å bidra og har løyvd kr. 22 per innbyggar, noko som utgjer totalt 18788 kroner til årets TV-aksjon.

Eg vil oppmoda alle boknarar om å ta godt i mot bøssebærarane den 23. oktober og bidra med pengar til ei særs viktig sak.

Ordføraren

August 2011

Kjære sambygding

Stem mot terroren!
Terroren som råka regjeringskvartalet og Utøya den 22. juli var ei frykteleg, uverkeleg og sjelsetjande hending som det endå er vanskeleg å setja ord på og forholda seg til. Skadeomfanget og talet på drepne gjer henne til den verste valdshandlinga på norsk jord i fredstid.
”Vi er så få her i landet, hver fallen er bror og venn” skreiv Nordahl Grieg i 17. mai-diktet sitt i 1940. Noreg er eit lite land der innbyggarane står kvarandre nær. Kvar fjerde innbyggar kjenner nokon som blei ramma av terroren i sommar. Difor sto det norske folket unisont opp mot terroren og tok landet tilbake etter åtaket. Heile nasjonen viste omsorg og medkjensle med dei som blei ramma gjennom folkeleg deltaking i ulike arrangement, minnemarkeringar og nedlegging av blomar i det offentlege rom. Medkjensla kom også sterkt til uttrykk gjennom kondolanseprotokollen som låg framme i servicetorget på Boknatun.

Ut av det vonde har det grodd fram noko godt. Fellesskapet og samhaldet i landet blei styrka over natta. Ingen ropa på hemn. ”Vårt svar er meir demokrati” sa statsminister Jens Stoltenberg i Oslo Domkirke. Det norske folket møtte hatet med kjærleik og menneskeleg varme. Me har stadfesta for kvarandre at me høyrar saman, og me har stadfesta viktige sider med det som me oppfattar som vår nasjonale identitet. Idèen om at mennesket er ei øy som klarar seg åleine, mista fotfeste dagane etter den 22. juli. Då fellesskapet blei truga av ein ytre fiende, søkte me saman og stadfesta at me høyrer saman som menneske.

All form for fundamentalisme er farleg, same om han spring ut frå høgre- eller venstresida. Det er nå viktig å henta inn kunnskap om høgreradikale miljø.
Terroren ramma landet vårt som ein knyttneve, ikkje frå aust, men frå ”mørkeste hjerte midt i blant oss”. Slike som massemordaren på Utøya kan vera intelligente på bestemte område og målbevisste i planlegginga.

Og skremmande nok, tankegodset hans når fram til små grupper. Dette veit ein gjennom meiningsytringar frå ytterleggåande politikarar, grupperingar og bloggarar som har sympatiar med massemordaren sit forskrudde syn på samfunnet. Det er særs viktig at denne type ytringar blir møtt med argumentasjon– ikkje teia i hel. For å kunne forstå handlinga, må ein forstå den ideologiske samanhengen. Samfunnet må ta eit oppgjer med denne ideologien, på same måte som me har gjort med islamistisk ekstremisme.

Den regjeringsnedsette 22. juli-kommisjonen har eit svært omfattande, tungt og viktig arbeid framføre seg, og det er store forventningar til den endelege rapporten. Det er nå viktig å snu kvar stein i denne saka og bruke det som trengst av ressursar for å finne flest mogleg svar og få mest mogleg lærdom.

Deltakinga ved kommune- og fylkestingsvala har tradisjonelt vore låg. Berre 59 prosent brukte stemmeretten ved kommunevalet i 2003. Den beste måten å svara på terroren som råka Noreg den 22. juli er å bruke stemmeretten ved årets val. På den måten styrkar me demokratiet og hegnar om verdiane våre. Gjennom demokratiet endrar og utviklar me samfunnet vårt og ikkje gjennom frykt og vald.

Godt val!

Ordføraren

Juni 2011

Kjære sambygding

Drosje i Bokn
Det er fleire år sidan sist det var stasjonert fast drosje i Bokn. Det er difor hyggeleg å kunne melde at det frå seinsommaren igjen blir eit eige drosjetilbod i kommunen. Helga Marie Dagsland, som i dag driv drosje i Skjoldastraumen, har etter søknad fått tildelt eit løyve frå Rogaland fylkeskommune.

Bokn er på fleire måtar eit samferdslemessig knutepunkt med anløp av både snøggbåtar, ferjer og buss og behovet for drosjetransport til og frå anløpsstadene er tilstades. Også boknarar og lokale verksemder har sakna eit slikt tilbod etter at den siste stasjonerte Bokn-drosjen la opp i 2003. Særleg har dette vore ei utfordring for eldre utan bil eller førarkort. Fleire bevegelseshemma og andre funksjonshemma har såkalla TT-transportkort der ein får rabatt med drosje, men som ikkje har fått brukt desse korta på skikkeleg måte på grunn av mangel av drosjetilbod i kommunen.

Eg håpar Dagsland lukkast med denne satsinga og at boknarane støttar opp om tilbodet og blir flinke til å bruke drosjen. På sikt håpar eg også at Bokn-drosjen får etablert avtalar om fast kjøring for ulike føretak og verksemder i nærområda slik at eigarane får eit best mogleg grunnlag for drift i bygda.

Namn på ny gassferje
Fjord1 inngjekk i vår kontrakt med Fiskerstrand BLRT AS om prosjektering og bygging av verdas største gassferje som skal setjast inn i sambandet Arsvågen-Mortavika i november 2011. Med den trafikkauken me opplever på Boknafjordsambandet er eg glad for at regulariteten blir tatt i vare med ei tredje ferje.

Som ordførar i vertskommunen for dei nordre anløpa, Arsvågen, har eg eit ynskje om at namnet på den nye ferja kan ha ei tilknytting til det geografiske området ferja skal operera i. Difor har eg sendt brev til leiinga i rederiet der eg føreslår at ferja får eit namn som har Bokn i seg, dømesvis ”Bokn” eller ”Boknafjorden”. Dette blei også gjort i 1996 av dåverande ordførar, Svein Ove Alvestad, i samband med bygging av dei nåverande ferjene som seinare fekk namna ”Stavangerfjord” og ”Mastrafjord”.
Fjord1 har tradisjon for å bruke ”fjord” i skipsnamna, difor er det kanskje mest nærliggande å tru at ”Boknafjorden” kan vera eit aktuelt namn. I så fall må dette namnet bli frigjort då namnet er i bruk på eit anna farty i dag.
Eg håpar Fjord1 vurderar dette innspelet og at den nye gassferja kan få eit namn som er knytt til lokalområdet vårt, og med det syt for at eit eldgammalt stadnamn blir endå meir synleg.

Lærlingar i Bokn
Bokn kommune hadde tidlegare lærlingeplassar knytt til skule/barnehage og i seksjon helse. På grunn av vanskar med rekruttering samt innsparingar i seksjonane, blei desse læreplassane inndratt i 2006. Den seinare tida har det imidlertid meldt seg eit behov for
lærlingeplassar. Rekrutteringa til mellom anna barne- og ungdomsarbeidarfaget og omsorgsarbeidarfaget/helsearbeidarfaget er blitt større og fleire boknaungdommar satsar på ei slik utdanning.
Difor opprettar Bokn kommune frå og med i haust to læreplassar i kommunen. Bakgrunnen for opprettinga er vanskar med å få læreplassar i andre kommunar, og den enkelte kommune ser ut til å prioritera inntak av eigne ungdommar.

Eg trur det er viktig å legga til rette for våre eigne ungdommar då me veit at kommunen vil ha stor bruk for slike fagpersonar i framtida. Ved å tilby lærlingeplassar i heimkommunen vil ein motivera ungdommane til å satse på å heve  kompetansen sin, samstundes som ein også ynskjer å behalda ungdommen i kommunen.
Læreplassane vil bli lagt inn i ordinære budsjett for åra som kjem.

Kommunal minibuss
Formannskapet gjorde hausten 2010 vedtak om å kjøpe inn ein minibuss til bruk i den kommunale verksemda, for frivillege lag og organisasjonar og privatpersonar. I veke 24 blei bussen levert Bokn kommune.

Minibussen er av merket Mercedes Sprinter og har 17 sitjeplassar inkludert sjåfør og har montert rullestolheis. Minibussen er stasjonert ved Boknatun. Dei fyrste bestillingane på lån av bussen kom leveringsdagen frå mellom anna skulen og dagsenteret.

Administrasjonen ferdigstillar utlånsreglement og vilkår for bruk av minibussen i desse dagar og vil bli publisert på www.bokn.no.

Eg vil spesielt oppmoda lag og organisasjonar i Bokn til å nyttiggjera seg av dette tilbodet og bruke minibussen til turar og utflukter og andre aktivitetar som utløyser transportbehov. Det er hyggeleg, sosialt og miljøvennleg å gjennomføra transportetappar i lag og under same tak. Og det ligg ein aldri så liten folkehelsegevinst i det å sitja saman, trygt og komfortabelt, på veg ut i verda. God tur!
Eg vil ynskja alle lesarane av Bokn Bygdablad ein god og solrik sommar.

Ordføraren 

Mai 2011

Kjære sambygding

Kommuneøkonomi
I kommuneproposisjonen for 2012 varslar regjeringa det økonomiske opplegget for kommunane til neste år. I kommuneproposisjonen som blei lagt fram 13. mai, gjekk det fram at kommunane får mellom fem og seks milliardar kroner i samla inntektsauke neste år. Mellom 3,75 og 4,25 milli-ardar kroner av inntektsauken er frie inntekter.

I revidert nasjonalbudsjett får kommunane om lag 1,3 milliardar meir i skatteinntekter enn det regjeringa la til grunn då statsbudsjettet blei lagt fram. Det er usikkert kva dette vil utgjera for Bokn kommune då Bokn har hatt ein skattevekst under landsgjennomsnittet dei to siste åra.

Auken i skatteinntektene må ein sjå i samanheng med lønnsoppgjeret som ser ut til å gje ein del meirutgifter for Bokn kommune på årsbasis. I tillegg vil endringar i kommunen sine pliktige pensjonavsettingar auke ein del per år. Også dei varsla renteaukene vil innebere ein vekst i utgiftene for Bokn kommune.

I forhold til samhandlingsreforma er det berekna at Bokn kommune sin part av midla til denne reforma vil utgjera 882.000 kroner, i tillegg til 200.000 kroner til utgiftsutjamning. Midla utgjer kommunen si medfinansiering av spesialisthelsetenesta og utskrivingsklare pasientar neste år. I samband med reforma får kommunane nye oppgåver og eit økonomisk ansvar for pasientar som er klar for utskriving frå sjukehusa.

Totalt sett ligg Bokn kommune an til å få ein tilsvarande økonomisk situasjon som i 2010. Men framleis veit ingen sikkert kva kostnad som fylgjer med dei nye oppgåvene i samband med Samhandlingsreforma. Ho trer i kraft frå 2012.

Fattigdom i Bokn
I fylgje presseoppslag tidlegare i månaden har Bokn i prosent flest fattige i regionen i forhold til inn-byggartalet i kommunen. Konklusjonen blei henta ut av regjeringa sin nyleg offentleggjorde oversikt over talet på fattige i Noregs kommunar.

Oversikten har overraska fleire enn meg, spesielt når me veit at Bokn har svært låge sosiale utgifter og få personar utan arbeid, men det er grunn til å ta dette på alvor.

Fattigdom i Noreg handlar meir om sosial utestenging enn om svolt. Men me må ha eit arbeidsliv som gir plass til alle som vil og kan delta. I tillegg har skulen og heile samfunnslivet eit ansvar for å fanga opp fråfall frå skule og finne gode vegar inn i eit godt
arbeidsfellesskap. Det er sløsing med ressursar dersom unge, arbeidsføre menneske ikkje kjem inn i arbeidslivet.

I saman med NAV og helsesjefen prøver me å få ein oversikt over kva som ligg bak  tala. Det er nok samansette grunnar til at me har 40 personar under fattigdomsgrensa i Bokn, men biletet kan nok nyanserast ein del. Me veit til dømes at fleire husstandar i kommunen har ei inntekt, der typisk den eine er i arbeid mens ektefellen  ikkje er i jobb eller jobbar i ei deltidsstilling, og dermed tener mindre enn det som er definert som fattigdomsgrensa. Likevel kan husstanden samla ha ei god inntekt.

Men viss det bak tala skjular seg reell fattigdom, vil me bruke analysen som grunnlag for å setja i verk tiltak som kan avhjelpe på situasjonen.

Kommunebarometeret
Kommunal Rapport har igjen samanlikna tenesteproduksjonen i kommunal sektor og rangert alle kommunane i Noreg. Resultatet ligg føre i Kommunebarometeret, som er ei samanlikning av landets 430 kommunar, basert på til saman 60 sentrale nøkkeltall. Hensikta er å gje dei styrande ein lettfatteleg og tilgjengeleg oversikt over korleis kommunen driv tenesteproduksjonen. Tala er mellom anna henta frå Statistisk sentralbyrå sin Kostra-database, foreløpige tal for 2010, og Grunn-skulens informasjonssystem.

Bokn kom svært godt ut i Kommunebarometeret, og enda på ein sterk 11. plass av 430 kommunar, med det beste kommune i Rogaland. Bokn scorar spesielt høgt på områda pleie- og omsorg, kultur og innan sosial-tenesta. Her ligg Bokn inne blant
landets 10 beste kommunar. Bokn får også høgast mogleg karakter på om-råda grunnskule, barnehage og økonomi.

Dette er sjølvsagt både gledeleg og motiverande. Bokn kommune har flinke, lojale og fleksible med-arbeidarar som gjennom sitt daglege virke syt for at Bokn kommune leverar blant landets beste kommunale tenestar. Det er framleis slik at ein kan bli betre på fleire område, men Kommunebarometeret fortel oss likevel at kommunen har rett retning. Plasseringa er ein stor inspirasjon, både for tilsette i administrasjonen og oss politikarar, og vil vera ein viktig motivasjonsfaktor for at kommunen også framover skal levera dei beste tenestene til boknarane.

Miljøstasjonen i Føresvik
Som ein fylgje av endra innsamlingsordning og omfattande misbruk blei miljøstasjonane i Sandeid, Tysværvåg, Aksdal og i Skjoldastraumen fjerna i vår. I tillegg er miljøstasjonane i Etne og Vindafjord fjerna.

Miljøstasjonane var opphavleg tenkt som returpunkt for papiravfall og glas- og metallemballasje og som ordning for enkelte hytteabonnentar og mindre mengder restavfall frå privatpersonar. I lengre tid har desse miljøstasjonane vore utsette for eit omfattande misbruk. Miljøstasjonen i Føresvik har stort sett framstått som ryddig, men tidvis kan ein sjå at det er for mykje avfall som hamnar utføre containerane. I tillegg blir det plassert avfall som ikkje er meint for denne miljøstasjonen på utsida av containerane, til dømes vaskemaskinar, bildekk, bilbatteri osb.

Eg vil minna om at ei slik framferd er brot på mottaksreglementet og vil kunne innebere at HIM avviklar også denne miljøstasjonen. Brukarane av miljøstasjonen må retta seg etter dei reglane som gjeld, og rydda etter seg og ikkje setja frå seg avfall som er i strid med reglementet.

Eg trur svært mange set pris på å ha ein slik miljøstasjon i bygda. Difor vil eg oppmoda alle brukarane om å ta eit ansvar for at ein i Bokn også i framtida skal kunne ha ein miljøstasjon.

Ordføraren

April 2011

Kjære sambygding

E39 Rogfast og nytt kryss på Austre Bokn
Bokn kommune godkjente som kjent kommunedelplan for Rogfast i februar 2010. I vedtaket la kommunen til grunn at kommunedelplanen for Rogfast, i tillegg til nye kryss på Are og i Knarholmen, også omfattar nytt kryss på Austre Bokn. Statens vegvesen stilte den gangen spørsmål ved om korvidt det siste punktet var gyldig då dette vilkåret blei innarbeida etter at forhandlingane var avslutta.

Spørsmålet om nytt kryss på Austre Bokn har i etterkant vore drøfta med Statens vegvesen ved fleire høve. Bokn kommune har vore tydelege på at ein er oppteken av trafikksikring og miljø på E39, ikkje berre for boknarane men for alle andre som ferdast gjennom kommunen.

Statens vegvesen har i løpet av 2010 utarbeida ei vurdering av E39 Arsvågen-Mjåsund med ei totalvurdering av behov for tiltak på denne strekninga med basis i trafikkmengd, ulukkesanalysar, støyanalysar og ROS-analyse. Strekningsanalysen visar eit stort behov for tiltak allereie med dagens trafikkmengd og vegstandard. Dette er også vurdert i Statens vegvesens stamnettutgreiing for riksvegnettet som blei offentleggjort i april 2011. Her kjem det fram at at det er eit stort behov for kryssutbetringar og gang- og sykkelvegtiltak.

På bakgrunn av dette er det difor gledeleg å kunne melda at Statens vegvesen gjennom nemnde drøftingar har kome Bokn kommune i møte og aksepterar dei vilkåra som Bokn kommune har satt i sitt kommunestyrevedtak. Dette inneber at det blir bygd nytt kryss på Austre Bokn. I samband med varsel om oppstart av reguleringsplan for E39 Rogfast i Bokn kommune, vil ein dermed også varsla oppstart av reguleringsplan av kryss på Austre Bokn. Ein reknar med at dette vil skje i løpet av sommaren 2011. Kostnadane med eit nytt, planfritt kryss på Austre Bokn kjem på om lag 22 millionar kroner og vil primært bli finansiert ved bruk av ordinære midler over statsbudsjettet, alternativt som del av Rogfast-prosjektet.

MC-kriminalitet
Formannskapet gjorde i møte 12. april vedtak der Bokn kommune gir uttrykk for at ein tek problemet med organisert kriminalitet og dei såkalla ”1 %-klubbane” alvorleg og med lovlege midler søker å hindra at slike MC-klubbar får etablera seg i kommunen. Dette er i tråd med vedtak som er gjort i dei fleste andre kommunane på Haugalandet den siste tida.

Bakgrunnen for vedtaket er mellom anna ein dialog som har pågått det siste året med Haugaland og Sunnhordland politidistrikt og kommunane i regionen, der politiet viser til mistanke om at personar i lokalmiljøet har konkrete planar om å etablera lokal avdeling av ein kriminell 1% MC-klubb.

Medlemmene i 1%-klubbane definerar seg seg som den eine prosenten av befolkninga som har meldt seg ut av samfunnet og fylgjer ikkje dei lovane og reglane som gjeld. Klubbmedlemmene skal fyrst og fremst visa total lojalitet til normer og reglar i den enkelte klubb. KS har den siste tida advart kommunane mot å overlata kampen mot klubbane til politiet åleine.

Organisert kriminalitet er i dag ein betydeleg trussel mot samfunnet. Fleire norske kommunar arbeidar aktivt for å hindra at slike miljø blir etablerte. Haugesund kommune har mellom anna gjort vedtak om at 1% MC-klubbar ikkje er ynskja i kommunen, og Haugaland og Sunnhordland politidistrikt har engasjert seg sterkt i å hindra etablering i distriktet. Med den korte vegen det er til Haugesund, og etterkvart Stavanger, meiner eg at det er viktig at også Bokn kommune arbeidar aktivt for å hindra at kriminelle miljø får etablera seg i kommunen.

Ordføraren

Mars 2011

Kjære sambygding

Rekruttering til lokale lister
I Noreg har dei lokale vallistene fram til no vore eit fast innslag i lokal-politikken. Sist kommuneval minka det likevel på kor mange slike lister som stilte til val. Fristen for innlevering av listeforslag til haustens kommune- og fylkestingsval er 31. mars. Det er gildt å sjå at lokalpartia i Bokn har jobba godt med nominasjonen og at alle dei fire partia som er representerte i   kommunestyret har levert lister.

Dei politiske partia utgjer grunnsteinane i det representative demo-kratiet både nasjonalt og lokalt og er sentrale arenaer for politisk deltaking. Vegen inn i politikken, lokalt, regionalt og  nasjonalt, går for det meste gjennom dei politiske partia. Kommunepartia er ein av grunnpilarane i demo-kratiet. Aktive kommuneparti er ein føresetnad for eit velfungerande demokrati, også i kommunen vår.

Over heile landet har ein dei siste åra slite med å rekruttera listekandidatar og medlemer og dei aktive vert stadig færre. I Bokn har partia jobba fram listeforslag som er godt balanserte både når det gjeld alder, kjønn, profesjon og sosial bakgrunn. I tillegg er dei fleste delane av Bokn dekka opp med kandidatar. Den sosiale bakgrunnen til dei folkevalde er viktig fordi det seier noko om korleis det representative  demokratiet fungerar. Dersom det er ønskjeleg å sikra at erfaringane frå ulike grupper vert lagt vekt på i den        politiske debatten, vil det bli vesentleg å få folk frå desse gruppene inn i folkevalde organ.

Utfordringa i Bokn og andre kommunar, er å få  innvandrarar med ikkje-vestleg bakgrunn med på listene og i det heile å få dei til å bruka røyste-retten. Dei same undersøkingane viser også at i dei kommunane der ikkje-vestlege innvandrarar er med i     kommunestyra eller står på vallistene, er valdeltakinga for denne veljar-kategorien høgare enn i andre kommunar. Partia har dei komande åra ei utfordring med å få også desse     gruppene representerte i lokalpolitikken. Mykje tydar på at fleire innvandrarar på listene stimulerar til  høgare valdeltaking.

Det flotte med å bu i ein liten kommune, er at kvar einskild i større grad enn i større kommunar har høve til å påverka lokalmiljøet sitt. Kvar einskild tel med på ein annan måte enn der ein forsvinn i massane. Ved å ta aktivt del i bygdepolitikken, kan du gje deg og dine eit betre nærsamfunn. Dette er ein rett og ein spesiell mulighet i den vesle kommunen vår – bruk han!

Strandsoneforvaltning
Det har vore eit generelt byggeforbod i 100-metersbeltet langs sjøen heilt sidan 1965. I ny plan- og bygningslov som trådte i kraft 1. juli 2009, blei forbodet og reglane om dispensasjon strama inn. I samband med lovarbeidet forutsatte Regjeringa og Stortinget at det skulle utarbeidast retningslinjer om differensiert forvaltning av strandsona langs sjøen.

Regjeringa vedtok fredag 25. mars statlege planretningslinjer for strandsona langs sjøen. Hensikten er å sikra at lokal praksis blir i samsvar med nasjonale mål for strandsona. I denne samanhengen ble Regjeringa sin konklusjon når det gjeld ny lov for 100-meters beltet, ei oppmjuking i forhold til forslaget for mellom anna Bokn kommune og ni andre kommunar i fylket.

Det nye er at landet blir delt inn i tre ulike kategoriar, der kategori eìn er den strengaste, mens kategori tre omfattar område med mindre press på areala, og der ein lettare kan gje unntak frå byggeforbodet og det vil bli gitt større rom for å vurdera utbygging gjennom kommunale planar.

Det var gledeleg, og viktig, at Bokn kommune blei plassert i kategori tre, som ein av to kommunar på Hauga-landet. Det er stor forskjell på tilhøva rundt Oslofjorden og i kyststroka i Rogaland, men med dei nye retnings-linjene blir kommunane gitt større fridom og meir sjølvstyre i utviklinga av strandsona, og dermed sikrar ein mulighetene for utvikling i distrikta. Framleis er det slik at byggeforbodet i 100-metersonen skal gjelda over heile landet, men det skal altså praktiserast med større lokal tilpasning enn i dag.

Det gjenstår å sjå kva dette i praksis inneber for kommunen vår, men eg vil tru me har eit godt utgangspunkt i forhold til nabokommunane våre og eg håpar at dei nye retningslinjene blir eit føremonn for Bokn i arealplanlegginga framover.

Ordføraren

Februar 2011

Kjære sambygding

Trafikksikringsmidler
Den 27.januar fordelte Fylkestrafikksikkerhetsutvalget i Rogaland (FTU) TS-midler (Aksjon skuleveg). Årets løyving omfattar 14.4 millionar kroner til fylkesvegar og 5 millionar kroner til kommunale vegar. Som i fjor har Rogaland fylkeskommune tildelt midler til trafikksikringsarbeid. For fylkesvegane betyr det nå at fylket dekkar heile beløpet. For dei kommunale vegane blir 60% løyvd som tilskott medan kommunen sjølv må dekkja 40%.

For 2011 fekk Bokn kommune løyvd til saman 150.000 kroner delt på tre trafikksikringstiltak i trafikksikringsplanen vår. Det gjeld mellom anna fleire veglys langs Føresvikvegen og langs gang- og sykkelveg frå Alvestadkroken og til busshytte ved E39 og fortau langs delar av Boknatunvegen. Den kom-munale eigendelen blir på 52 000 kroner. Tiltaka skal startast opp og gjennomførast i løpet av 2011.

Formannskapet i Bokn er trafikksikringsutval og den reviderte Trafikksikringsplanen for 2011-2014 er det viktigaste styringsverktøyet. Planen gir oss mål for arbeid og blinkar ut dei prioriterte områda og tiltaka. Alle tiltak som var planlagde på fylkesvegar og kommunale vegar i den førre planen, blei elles gjennomførte.

TS-midlene kjem godt med i strevet med å forbetra lokalvegnettet og sikra skulevegane i bygda. Framleis har me vegstrekk på skulevegane i dei sen-trale stroka av Bokn som manglar veglys og fortau. Men med gjennom-føringa av desse tiltaka kjem me eit godt stykke vidare med å trygga vegane for dei mjuke trafikantane. Slik lever me til trafikksikringutvalets i Bokn sitt eige motto: ” Det skal ikkje vera hardt å vera mjuk”.

Lokomotiv i tunellen!
Dei siste vekene har debatten rasa i regionen om kvar Haugalandet skal venda seg når Rogfast er på plass. Somme meinar dette er ein unyttig debatt mens andre hevdar at regionen vil vera tent med å vita kva han vil i god tid før dei fyrste bilane smett opp av holet under Boknafjorden. Standpunkta er sjølvsagt farga av kvar ein bur i regionen og kva retning ein har vore vand med å orientera seg i.

Fram til Bokn fekk fastlandssamband i 1991 var Stavanger ”Byen” for boknarane.  Boknarane heia på Viking, mange las Aftenbladet, tok utdanning og fann seg ektefelle i sør. Med bruene endra situasjonen seg. Raskt blei Haugesund byen for boknarane, men banda til Stavanger er framleis sterke.

Framleis søker boknarane og Bokn kommune mot Stavanger og Nord-Jæren i eit mangfald av samanhengar. Ikkje minst skapar dei mange fylkesinstitusjonar tette band mellom heile Haugalandet og resten av fylket. I Stavangerområdet finn me også kompetanse og kapital og eit dynamisk næringsliv heilt i tetsjiktet i nasjonal samanheng. I byområdet på Nord-Jæren bur det snart ein kvart million menneske, nokre fleire enn i Sunnhordland. Dei byggbare områda på Nord-Jæren er avgrensa i utstrekning og regionen er i ferd med å sleppa opp for ledige bu- og næringsareal. Dette vil i aukande grad tvinga siddisane til å retta blikket nordover, ikkje minst mot Bokn og Gismarvik-området.

For meg kjennest det kunstig og framandt å forholda seg til Stord og Jondal. Nord-Jæren er den raskast veksande storbyregionen i landet. Held utviklinga fram, vil han om ikkje lenge passera Bergen. Sjølv med eit ferjefritt Vestland i framtida, vil Bergen difor vanskeleg bli det som Stavanger er for oss i dag.

Stavangerregionen er ein motor i forhold til utvikling og aktivitet i landsdelen. Ved at me som region knyter oss til dette nasjonale lokomotivet, vil me oppleva gode synergiar med auka verdiskaping også hjå oss. Eit tett samarbeid med Nord-Jæren vil vera eit viktig supplement for mange av Haugalandets samfunnsinstitusjonar. Eit  samarbeid mellom Høgskulen Stord/Haugesund og Universitetet i Stavanger vil til dømes kunne dra kompetanse hit på område der me manglar ein slik. Der det er naturleg bør ein også kunne samarbeida med Sunnhordland – slik som i dag.

Mykje av samfunnsutviklinga vil likevel gå i eigne retningar, styrt av marknadskrefter på tvers av kommune- og regionsgrenser. Men så lenge me er ein del av Rogaland fylke er det naturleg å samhandla med fylkeshovudstaden. Slik som Sunnhordland truleg kjem til å samhandla endå meir med Bergen når Hordfast er etablert. Mekanismane er slik at Stord alltid vil vera på vakt mot ”Haugesundsk imperialisme”, slik Haugesund er på vakt mot storebror Stavanger. Til tross for gode samarbeidsavtalar og intensjonar er det slik at kommunane er seg sjølv nærast når dei politiske slaga blir utkjempa.

Ordføraren

Desember 2010

Kjære sambygding

Budsjett 2011
Budsjettet for 2011 blei vedteke av kommunestyret den 14. desember og var eit fellesforslag frå partia. I driftsbudsjettet er det lagt opp til ei rekkje mindre tiltak, mellom anna innkjøp av utstyr til legekontoret og skifte av stolar i auditoriet på skulen. Vidare held me fram med å utvida opningstida til biblioteket, og opprettheld aktiviteten på musikkskulen. Det er løyvd pengar til nytt flomlysanlegg på Føresvik stadion, og sett av midlar til vidareføring av filmprosjektet som elevar ved Bokn skule har teke del i og som er i regi av Haugaland Vekst.

Elles blir det investert nær 5,3 millionar kroner mellom anna i overrislingsanlegg på sjukeheimen, utbygging av bustadfeltet i Fyrvegen og oppgradering av Føresvik indre hamn. I dei komande åra vil me også gjera store investeringar i vassforsyninga. Det inneber at offentlege gebyr og avgifter må aukast noko.

I Kommuneproposisjonen og Statsbudsjettet for 2011 har Stortinget lagt grunnlaget for den kommunale aktiviteten. Det viser ein grei vekst for kommunesektoren på landsbasis sjølv om media teiknar eit negativt økonomisk bilete. Kommunar over heile landet rapporterar om innsparingar og budsjettkutt.

I forhold til 2010-budsjettet er Bokn sin del er veksten i frie inntekter kalkulert til omlag 1,3 millionar kroner, eller 2,8 %. Likevel inneber ikkje dette nokon realvekst i budsjettet for neste år. Ei hovudårsak er endringane i småkommunetilskottet. Her har fleire kommunar fått ein reduksjon på omlag ein million kroner. Særleg har dette slått negativt ut for dei minste kommunane, ikkje minst Bokn.

Sidan 2005 har Bokn hatt ein eventyrleg inntektsauke. Men etter sju gode år fylgjer ofte sju magre år. Det ser ut for at me må stramma noko inn i tida framover. Bokn får dårlegare tal i 2011 enn for 2010. I forhold til den daglege drifta skal det gå greitt, men det vil skapa utfordringar når me skal til med større investeringar.

Satsing på barn og unge
Barn og ungdoms oppvekstvilkår er avhengig av langsiktige kommunale prioriteringar og god samordning av tenester og tilbod. Barne- og ungdomsarbeid har dei siste åra blitt eit sentralt politisk satsingsområde i Bokn, og i budsjettet for 2011 fylgjer me opp denne satsinga. Gjennom satsinga på folkehelsekoordinator/Kjekt på Bokn, Filmprosjektet, kulturskulen og biblioteket er det etablert ein flott plattform og eit godt grunnlag for at barn og unge skal trivast i Bokn.

Bokn kommune legg også vekt på eit godt tverrfaglege samarbeid mellom helsestasjonen, skulen og barnehagen. Spesielt helsestasjonen har ei sentral rolle i kommunens folkehelsearbeid. Gjennom helsefremjande og førebyggande arbeid, i tett samarbeid med skulen, barnehagen og, etterkvart, folkehelsekoordinatoren, vil me ha fokus på både psykisk og fysisk helse og sosiale forhold.

I tillegg er gode møteplassar, slike som biblioteket, bygdakinoen og fritidsklubben Petra, viktige for å sikra eit best mogleg oppvekstmiljø i Bokn. Gjennom målretta arbeid og satsing vil Bokn kommune ivareta og fremja bygda og ungdommen sine interesser. Ved at boknaungdommen vender tilbake til heimbygda etter enda utdanning vil kommunens næringsgrunnlag, omdømme og busetnad styrkast.

Satsing på barn og unge er ein langsiktig og viktig strategi for eit lite samfunn som Bokn. Dette er også viktig for motvirka marginalisering og utstøyting ved å fremja brei deltaking, også frå dei svakaste stilte av barn og unge. Lukkast me i dette, blir bygda meir attraktiv for utflytta boknaungdommar.

Medlemskap i Nordsjøvegen
Formannskapet vedtok 30.november å søkje medlemsskap i reiselivsselskapet Nordsjøvegen. Dette er eit samarbeidsorgan oppretta av og for kommunane langs kysten i Rogaland og Vest-Agder. Hovudformål er å fremja reiseruta frå Kristiansand i sør til Haugesund i nord.

Selskapet fremjar reiselivsnæringa i området gjennom felles marknadsføring, produktutvikling og andre fellesoppgåver. Sjølv om Bokn er ein liten kommune i reiselivssamanheng, er staden likevel eit viktig knutepunkt for reisande i regionen. Kommunen vil difor styrka denne posisjonen, spesielt når T-sambandet og Rogfast er realisert.

Det er naturleg at Bokn blir medlem i familien av Nordsjøveg-kommunar. Der vil Bokn kommune bli marknadsført i mykje større grad enn i dag. Gjennom annonser på fleire språk, stands og brosjyren ”Nordsjøvegen” vil me marknadsførast både innanlands og utanlands.

Boknakalenderen 2011
I arbeidet med å laga kalender for 2011 har redaksjonen teke omsyn til innspel i samband med dei tidlegare utgåvene. Engasjementet har vore stort og meiningane mange, men hovudinntrykket er at ein ynskjer fleire slike kalendrar. Eit ynskje har vore kalendrar med fleire bilete som er identifiserbare med Bokn og frå alle delar av kommunen. Ein har også tilpassa sjølve ”kalenderiet” slik at dette er meir brukarvennleg. Difor er formatet også justert ned. Resultatet ligg føre med denne utgåva av Bokn Bygdablad. Eg håpar produktet fell i smak.

Eg vil ynskja alle lesarane av Bokn Bygdablad ei fredeleg julehelg og eit godt nytt år.

Ordføraren

November 2010

Kjære sambygding

Perspektivstudie
I samband med midla Bokn kommune fekk av Rogaland fylkeskommune til moglegheitsstudie for utviklinga i Bokn kommune etter realisering av Rogfast, blei konsulentselskapet Norconsult AS engasjert til å gjennomføre studien og føre han i pennen. Selskapet har brukt hausten til å identifisera moglegheiter og avgrensingar i Bokn kommune som fylgje av endra tilgang til omverda etter realisering av ferjefri kyststamveg mellom Nord-Jæren og Haugalandet. Resultatet ligg nå føre, og stadfestar stort sett det framtidsbiletet som blei teikna av Bokn på felles formannskapsmøte som blei gjennomført på Bokn 3. februar 2010.

Studien viser at Bokn etter Rogfast truleg aukar potensialet sitt som attraktiv bustadkommune. Den viser såleis til erfaringar frå andre kommunar der folketalsauke har virka attraktivt på næringsetableringar. Utsiktene til vekst i Bokn avhenger av etterspurnaden etter tilgjengelege areal både til bustader og industri og korleis nærliggande stader utviklar seg. Mellom anna kan Slåttevik bli ein konkurrent til Bokn. Fordelane til Bokn er likevel at ein har eit komplett kommunesenter i Føresvik med alle viktige funksjonar på same staden.

Bokn er den næraste kommunen til Nord-Jæren nord for Boknafjorden. Med eit arealtilbod større enn etterspurnaden, vil dette kunne trekka til seg både menneske og næringsliv frå Nord-Jæren. Utfordringa ligg i å etablera tenestetilbod og funksjonar som stør opp om Føresvik som kommunesenter og som ein stad for lokal tenesteyting, samstundes som ein legg til rette for å dra nytte av den aukande gjennomgangstrafikken på E39.

Moglegheitsstudien konkluderar med at det er god grunn til å å rekna med at Rogfast vil vera positivt for Bokn. Den held likevel fram at det er uvisst koss og i kva grad Rogfast vil verka inn på Bokn kommune, og kva verknader det vil bli for arealbruk og senterstruktur i kommunen. Rogfast gjer det lettare å reisa til Bokn, men også lettare å kjøre forbi. Uansett vil Bokn kommune møta dei same utfordringane som dei fleste mindre kommunane; Koss kan ein gje innbyggarane eit godt tenestetilbod, gode oppvekstvilkår og ei sunn demografisk utvikling, på same tid som ein sikrar at kommunen har ein arealbruk og senterstruktur som gagnar innbyggarane?

I moglegheitsstudien til Norconsult lanserar ein omgrepet ”Haugalandsporten”, eit omgrep som knyt seg til områda ved Knarholmen. Her ser ein for seg etablering av maritime verksemder ved sjøen og knoppskyting i områda tett opp til E39 med etablering av bensin- og servicestasjon, kro, overnatting og butikk. Føremålet med ”Haugalandsporten” er at han skal vera lett tilgjengeleg for dei reisande og ha attraktive og naudsynte tenesteytingsfunksjonar som reisande vil etterspørja. Dette vil også vera viktige tilbod for nye verksemder i området og for boknarane generelt.

Med denne studien har me fått stadfesta gjennom ord og tal mykje av dei spennande framtidsprognosane Bokn blei førespegla tidlegare i vinter. Moglegheitsstudien vil vera eit nyttig og viktig politisk styringsverktøy dei komande åra, og vil også vera eit viktig supplement til regional plan for Haugalandet. Studien avdekkar mange spennande moglegheiter for Bokn kommune, og eg trur ein vekst i folketalet er ein god start og eit godt utgangspunkt for næringsutvkling, vekst og aktivitet i kommunen vår i tida framover.

Ordføraren 

Oktober 2010

Kjære sambygding

Minibuss
Formannskapet vedtok samrøystes i møte 19. oktober å kjøpe inn ein minibuss som mellom anna skal stillast til disposisjon for lag og organisasjonar i Bokn. Spørsmålet om innkjøp av ein kommunal minibuss har stadig blitt tatt opp, både av politikarar og av innbyggjarane i kommunen. Minibuss har fleire ganger blitt spelt inn som eit av fleire trivselsfremjande tiltak i samband med
kommuneplankonferansar på byrjinga av 2000-talet. Også boknaungdommen har fleire gonger markert eit ynskje om eit slikt transportmiddel i kommunen.

Behov og bruksområde for ein minibuss i Bokn er kartlagt og danna grunnlaget for den politiske saka. Lag, organisasjonar og kommunal verksemd blei kontakta for å danna eit bilete av moglege bruksområde. Utifrå tilbakemeldingane kunne ein kon-kludera med at det var eit breidt spekter av bruksområde ein såg for seg i høve ein minibuss.

Mellom anna ser ein for seg at ein minibuss vil vera eit flott tilskott til aktiviteten ved sjukestova ved at ein kan ta ibuarane med på utflukter. Også Dagsenteret og Psykisk helseteneste vil kunne nyttiggjera seg av ein minibuss i forhold til utflukter og transport frå og til Boknatun.

Fritidsklubben ”Petra” vil kunne ha stor glede av fellestransport i samband med kulturarrangement, kurs, friluftsturar, skiturar, kino, bowling, konsertar og klubbkveldar der arrangementet er i annan kommune. Til-svarande bruksområde gjeld også for organisasjonar som Bokn idrettslag, Bokn sanitetsforening, Bokn pensjonistforening og Bokn Røde Kors, for å nemne nokon.

Administrasjonen vil førebu innkjøp av minibus, som skal vera tilrettelagt for rullestolbrukarar, og utarbeida eit reglement i forhold til bruk og ansvar. Ein vil også vurdera om ein etter vedtekne kriteriar skal kunne opna for å leiga ut minibussen til private føremål.

Minibuss som blir stilt til disposisjon for lag og organisasjonar og kommunal verksemd, er blitt eit vanleg kommunalt tilbod i stadig fleire kommunar landet rundt. Utifrå tilbakemeldingane i Bokn, trur eg ein minibuss vil vera eit kjærkome tilbod også her, med mange bruksområde. I tillegg har det ein eigenverdi for boknaungdommen å kome til fotballcup i ”eigen buss”. Eg håpar dette tilbodet blir godt tatt imot, og at flest mogleg lag og organisasjonar ser seg tent med å bruke minibussen.

Barnevernssamarbeid
Dei siste 10 åra har seks av kommunane på Haugalandet, inklusiv Bokn kommune, delteke i prosessen med å etablera Haugaland Interkommunale Barnevernssamarbeid – BAS. I fyrste omgang var BAS eit treårig tidsavgrensa prosjekt som skulle gå ut 2002. Etter dei tre fyrste åra som prosjekt, vedtok kommunane å vidareføra BAS.

Styret i BAS har dei siste åra brukt lang tid og store ressursar på prosessen for å kunne legga fram eit felles forslag om etablering av eit fullintegrert barnevernssamarbeid for BAS-kommunane. Bokn kommune har vore ein av pådrivarane for eit samarbeid, som ville kunne ha utvikla seg til ei robust og stabil barnevernsteneste med stor fagleg utvikling hjå medarbeidarane og god kvalitet på barnevernsarbeidet. Med eit slikt samarbeid ville ein stå godt rusta til å møte stadig nye krav og arbeidsoppgåver frå statleg mynde, innføre eit fagområde som er tungt å driva for dei fleste kommunane.

Dessverre klarte ein ikkje å kome fram til eit forslag om etablering av eit felles barnevern for BAS-kommunane, mellom anna fordi ein møtte sterk fagleg motstand i ei av deltakarkommunane. Eg trur barnevernet og kommunane hadde alt å vinna på eit interkommunalt samarbeid, mellom anna fordi ein då kunne ha sikra eit kvalitativt godt og stabilt barnevern med høve til å auka kapasiteten på ressurssida. I tillegg kunne ein arbeida for å lettare kunne behalda og rekruttera fagfolk og auka kompetansen gjennom planmessig opplæring og utviklingsarbeid. Barnevernet er eit såpass ressurskrevjande tenesteområde, at nesten ingen av Haugalandskommunane framover vil makta å drifte dette åleine.

Det gledelege er at Tysvær kommune, i kjølvatnet av BAS, har opna for å inngå eit barnevernssamarbeid med Bokn, Sveio og Utsira. Ein opnar også for eit samarbeid når det gjeld PPT-tenesta. Bokn kommune har per i dag avtale med Tysvær kommune om kjøp av barnevernstenester. Dette er eit samarbeid som fungerar godt. Det er også dialog med sistnemnde for å få avtalefesta samarbeid når det gjeld PPT-tenester. Eg trur det nå er viktig å jobba for å inngå i eit robust samarbeid, framføre ei utbygging av eit eige barnevern. Spesielt med tanke på posisjonering i høve til den framtidige samhandlingsreforma.

Ordføraren

September 2010

Kjære sambygding

Gamle skule, kva nå?
Heilt sidan sentralskulen i Bokn stod ferdig i 1973, har den gamle skulen på Boknaberg vore samlingsstad for boknarar uansett alder. Den gamle skulen og området rundt har vore sentrum for mykje kulturell aktivitet, til dømes strikkekafè, veving, Yngres, Artep og paintball. Om kort tid skal også Bokn Gatebilklubb flytta inn i lokala til den gamle brannstasjonen.

Bygningen blei teken i bruk i 1951 og er nå prega av alder og aktivitet. Difor melder behovet for rehabilitering seg med aukande styrke. Det blei i 2009 løyvd pengar til vøling av underetasjen etter fuktskader. Ungdommane i Petra fritidsklubb gjorde då  ein flott dugnadsinnsats med å rydde ut av underetasjen. Bokn kommune tok kostnadane med å skifte ut innvendig røyropplegg.

Formannskapet hadde i vår synfaring. Spørsmålet melde seg då om kva ein vil med  bygningen. Kostnadene ved ei totalrenovering kan bli høge. Spørsmålet er om Bokn kommune skal investera store beløp i bygningen, eller om ein må sjå på andre løysningar. Bør ein til dømes legga bygget ut for sal?

I møte den 14.09.10 kom formannskapet fram til at drifta av kulturhuset inntil vidare skal halda fram og Petra ungdomsklubb kan bruka to av etasjane slik som dei vil. Dreneringa rundt huset skal ordnast, og lokala skal haldast i stand.
Formannskapet ynskjer at ungdommane sjølv skal ta del i dugnadsarbeid i samband med rehabilitering av underetasjen, og dei må aktivt delta i å samla inn delar av dei  midla som trengst. Bokn kommune vil på si side gå inn med sin del. Slik vil det framleis vera lys i lokala på Kyrkjebygd i åra framover, og boknaungdommen vil ha ein god samlingsstad.

Haugaland Vekst
Haugaland Vekst jobbar med næringsutvikling på tvers av kommunegrensene på Haugalandet, og fungerar som Bokn kommune sitt næringsapparat. Selskapet skal bidra til verdiskaping på Haugalandet og vera ein tilretteleggar for god kontakt mellom det offentlege og dei næringsdrivande. Eigarane er Haugesund, Tysvær, Bokn og Utsira kommune saman med Rogaland Fylkeskommune.

I desse dagar er det samtalar med kommunane Karmøy, Vindafjord, Sveio og Etne for at også desse kommunane skal bli medeigarar i selskapet. Ein bakgrunn for desse samtalane er vedtaket som blei gjort den 17. juni i Haugalandsrådet om å leggja ned rådet i den forma det har nå.

Dei fire kommunane som i dag vurderar medlemsskap, ser at det trengst eit slikt regionalt selskap. Ikkje minst er det behov for eit organ som kan ta vare på kommunane sine behov for samhandling i regionale saker innan næringsutvikling og andre aktuelle samfunnsspørsmål. Slik sett er Haugaland Vekst eit alternativ til felles regional satsing på Haugalandet. Haugaland Vekst organiserar allereie i dag ein del aktivitetar der alle haugalandskommunane er med. Døme på dette er skule/næringsliv og regional plankoordinering.

Desse drøftingane for å få utvida Haugaland Vekst er svært viktige for heile regionen.  Haugalandsrådet var ein viktig møteplass for ordførarar og rådmenn, men er altså ikkje meir. Det inneber at viktige strategidrøftingar må inn i nye rammer. Det me treng, er eit tungt, handlekraftig og operativt selskap som samlar alle haugalandskommunane. Gjennom Haugaland Vekst kan me etablera den drivkrafta, kontinuitet og framdrifta som trengst for å møta ein aukande konkurransen frå sterke regionar både i nord og sør.

Med alle kommunane samla i Haugaland Vekst vil Haugalandet få ein tydelegare profil og ein sterkare stemme. Ikkje minst kan Haugaland Vekst bli ein avgjerande faktor for å posisjonera regionen vår i samband med dei nye samferdsletiltaka som kjem.

Ordføraren

August 2010

Kjære sambygding

Omdømmebygging
NRK-profilen Dag Lindebjerg og Arne Larsen Økland gjorde 11. august strandhogg på Bokn med TV-team på slep. Dei kom sjøvegen og la til kai i Alvestadkroken med den innleigde skøyta ”Hardsjø” og blei teke godt i mot av mange boknarar. I løpet av ti produksjonsveker skal Dag Lindebjerg portrettera norskekysten frå Grense Jakobselv til Halden. Dei fire timane som var sett av i Bokn blei nytta særs godt med besøk både på Boknafjellet, Alvestadkroken og i Oksebåsen. Også ei rekkje andre kystkulturinnslag frå kommunen vår blei festa på film.

I samband med Stortingsmeldinga om lokal vekstkraft og framtidstru, er det peika på kor viktig det er å få til ei heilskapleg og god lokal samfunnsutvikling. Det å bygga eit godt omdømme betyr mykje for kommunen sitt arbeid med lokal samfunnsutvikling og i arbeid med å fremja bulyst.

Eg trur det er viktig for Bokn kommune å jobba systematisk med profilering og omdømmeprosessar for å få til auka tilflytting. Å bygga omdømme handlar om å bygga verdi. Det handlar om å ta tak i moglegheitene for å vera ein stad der folk vil bu, som folk snakkar positivt om og som er i stadig utvikling. Omdømmebygging startar med jakta på det unike i eigen kommune, og at me stillar oss sjølve spørsmåla: Korleis ynskjer me å framstå? Kva slags attraksjonar har me? Kva er me gode på? Kva er det unike hjå oss? Korleis kommuniserar me det? Og korleis gjer me alle innbyggarane klar over at dei har ei veldig viktig rolle i dette arbeidet?

Historien om eit lokalsamfunn kan forteljast på mange måter, men å få eksponert det beste Bokn har å by på av kystkultur- og natur på riksdekkande fjernsyn, er ein unik måte å bygga omdømme på. Meir enn 200 stader langs heile norskekysten hadde bedt om å få bli med i programserien, men berre helvta nådde opp. Og boknarane kjente besøkstida si godt, mobiliserte og viste eit flott engasjement slik at NRK fekk nett dei bileta me alle håpa på. Difor vil eg retta ein stor takk til alle som på ein eller annan måte stilte opp på denne viktige dugnaden og bidro til omdømmebygging av Bokn på riksdekkande fjernsyn i beste sendetid.

Noregscup i Trial                      
Laurdag 18. september arrangerar Pluggen motorklubb for andre gang Noregscup i Trial på Torland. Pluggen arrangerte Noregs Cup sist for to år sidan, og det på ein solid måte. Både publikum og utøvarar koste seg i bakkane på Torland og overtydde alle om at klubben også kan gjennomføra store arrangement i vår kommune. Eg set stor pris på at Pluggen tek på seg slike arrangement og på den måten marknadsførar både motorsporten og lokalsamfunnet.

Slike arrangement krev stort og breidt engasjement og mange timars dugnadsinnsats ligg bak før dei fyrste trialkjørarane kan kjøra fram til startstreken på Torland. Men eg er sikker på at verdien er stor av å vera vertsskap for slike arrangement; ein opparbeidar seg kunnskap og erfaring rundt meisterskapsavvikling, utøvararne våre får røyna seg mot dei beste kjørarane i landet og det kjem alltid nokre kroner inn i klubbkassa til slutt.

Eg ser fram til mange spennande løp med utøvarar som vil gje publikum ei flott og spennande oppvisning på Torland i september. Spesielt kjekt blir det å fylgja våre lokale utøvarar gjennom dei ulike seksjonane.

Eg vil ynskja Pluggen lukke til med eit arrangement som set Bokn på kartet og håpar flest mogleg legg turen til Torland denne dagen for å få med seg flotte oppvisingar av både tilreisande og lokale trialutøvarar.

Ordføraren

Juni 2010

Kjære sambygding

Ambulanse
I samband med saka om ambulanse-tenesta og framtidig status og organisering av den akuttmedisinske beredskapen i Bokn, hadde Bokn kommune, representert med underteikna, rådmannen og seksjonsjef Helse, møte på Stortinget 14. juni for å drøfte problemstillinga vår.

I brev frå Helse- og omsorgsdepartementet fekk Bokn kommune opplyst at departementet arbeidar med ei ordning for båretransport av pasientar der ein differensierar mellom ambulansane og stiller ulike krav til kompetanse hjå ambulansepersonellet. Helsedirektoratet har i tildelingsbrevet for 2010 fått i oppdrag å foreslå nasjonale krav til ulike typar ambulansebilar og vurdera behov for endringar i regelverket.  Dette gjer ein for å legga til rette for at frivillege organisasjonar, og dømesvis Bokn kommune, skal kunne spela ei rolle i den akuttmedisinske kjeda.

I møtet med stortingsrepresentantane ba eg om at ein frå sentralt hald også tek omsyn til Bokn kommune sin modell for drift av ambulanseteneste og at ein i samband med gjennomgang av dei nasjonale krava til ambulansebilar også legg til rette for at ein i Bokn skal kunne gjera om dagens ”First responder” til ein ordinær ambulanse ved å tildela same status som ambulansane til dei frivillege organisasjonane i Noreg.

Eg håpar sentrale mynde nå prioriterar arbeidet med å legga til rette for alternative ambulansar som er ein viktig, og sannsynlegvis, avgjerande ressurs i den akuttmedisinske beredskapen i vårt desentraliserte land.

Føresvikvegen
Formannskapet godkjente i juni at forslag til oppgradering av Føresvikvegen skal leggast ut til offentleg ettersyn med eitt alternativ, det vil seia at ein fylgjer eksisterande trasè frå Knarholmen til Føresvik sentrum. Etter planen vil saka bli lagt ut på høyring i haust, og etterkvart som planen tek form vil berørte grunneigarar bli kontakta i høve utløysing av grunn. Ein legg opp til eit løp der ein kan få vedtatt endeleg plan seinast hausten 2011.
I tillegg til fire millionar kroner gjennom sekkeposttiltaka i Haugalands-pakken, har Rogaland fylkeskommune stadfesta at dei går inn med økono-miske midler tilsvarande Bokn kommune sin andel, det vil seia 4   millionar kroner. Dermed er i prin-sippet finansieringa for dette vegprosjektet nå på plass.

Føresvik hamn
Planarbeidet for indre hamn i Føresvik er nå på plass, og problem i høve til klausulerte områder er løyst. Det er gjennomført møter med berørte   grunneigarar og velforeninga i Føresvik. På bakgrunn av innspel frå desse møta utarbeida Norconsult ei skisse til planløysing for oppgradering av kommunen si strandsone i indre hamn og i løpet av sommaren vil Bokn kommune henta inn pristilbod frå ulike entreprenørar. Ein satsar på å kome i gang med gravearbeida på seinsommaren.

Planforslaget inneber at eksisterande fylling blir av slutta med ein steinmur som skal utgjera bryggefronten. Den opne strandsona mot Føresvikvegen blir oppretthalde og blir tilrettelagt som ein badeplass med betre tilkomst via steintrapper og terrasserte steinmurar. I tillegg vil det bli satt opp lys og   benkar. Prosjektet har ei kostnads-ramme på 500.000 kroner.

Hålandssjøen
Administrasjonen skal utarbeida fleire alternative framlegg til utbygging av Hålandssjøen. Formannskapet skal deretter velja kva utbyggingsalternativ ein skal jobba etter. Hausten 2009 blei det kjørt ut meir kjernemasse til sjølve moloen. I tillegg blei moloen plastra mot aust, og det blei deponert     plastringsstein i området for seinare bruk. Våren 2010 blei det i tillegg kjørt ut noko meir plastringsstein. Dermed er ein klar til å kunne ta i mot kjernemasse frå T-sambandet for å fullføra moloen etter dei opprinnelege planane. I fylgje Statens vegvesen vil dei begynna å transportera ut massene til Hålandssjøen seinast innan juni 2011. I mellomtida vil kommunen prøve å skaffe plastringsstein til innsida av moloen.

God sommar
Den sure nordavinden har førebels skapt vanskar for eit aktivt terrasseliv i boknaheimen, men eg håpar at juli byr på eit meir klassisk sommarvêr som gjer at me lettare kan møta vestlandshausten om nokre månader. Når fotball-VM er unnagjort og vinden har løya, ligg alt til rette for ein flott sommar med badeliv, fyr på grillen og lyse kveldar. Eg vil minna om høgdepunktet i sommar-Bokn som er marknadsdagen i Føresvik den 10. juli. Ta turen!

Eg vil ynskja alle lesarane av Bokn bygdablad ein god og nordavindsfri sommar.

Ordføraren

Mai 2010

Kjære sambygding

Vårstemning
Me har endeleg rista av oss tre lange og kalde vintermånader og sola har så smått begynt å gje etterlengta varme til støle kroppar. Våren lot venta på seg, men endringa kom for alvor på sjølvaste nasjonaldagen. Det blei ei flott og tradisjonell 17. mai-feiring med ei boknabygd som viste seg frå si beste side.

Sommarhalvåret både kjem og forsvinn brått på våre breiddegrader. Allereie ved St. Hans snik det seg fram ei kjensle av at sommaren er på hell. Årets lengste dag representerar for meg også ei mental markering, slik som det også gjer i motsatt ende når sola ”snur” den 22. desember; dagane blir gradvis kortare og det går sakte men sikkert mot jul og mørkare tider.

Av denne grunn prøver eg etter beste evne å nyte desse mai og juni-dagane som flyr avgarde fram til skuleferien startar. Etter mi meining er det årets beste periode me er inne i nett nå; lange lyse kveldar, fjåge boknarar som stellar i hagane sine og båtliv i Boknasundet. Dette er også tida for å ta i bruk den flotte boknanaturen som byr på det meste av både fjord og fjell, skog og strand, lyng og hei. Prøv ein sundagstur til Bokn sin utpost i nord, Boknahåve. Kjekt på Bokn-gruppa ”Ta naturen i bruk”, har gjort ein solid jobb med å merka stier, skilta og setja ut benker langs trasèen. Både Bokna-fjellet, Vardafjellet og villmarka nord i Bokn er vel verdt eit besøk i denne flotte årstida.
 
Kommuneproposisjonen
I kommuneproposisjonen presenterar regjeringa politikken sin for kommunane og det økonomiske opplegget for kommunesektoren for det komande året. Framlegg til revidert nasjonalbudsjett (RNB) 2010 og kommuneproposisjonen for 2011 blei lagt fram 11. mai og bar preg av at regjeringa legg opp til mindre bruk av oljepengar. Dei nye talla viser likevel ei vidareføring av den raudgrønne satsinga på kommunane som har gitt 41 milliardar ekstra sidan 2005. Kommunane får mellom 4 og 5 milliardar kroner meir i samla inntekter neste år.

Regjeringa legg også fram eit forslag til nytt inntektssystem for kommunane. Regjeringa peikar på at dei objektive kriteria som seier noko om kor dyr ein kommune er å drive samanlikna med andre kommunar, ikkje har blitt oppdatert på om lag 15 år. På grunnlag av nye statistiske  analysar blir desse såkalla kostnadsnøklane endra slik at kommunane får inntekter etter dei utfordringane dei faktisk har i dag.

Dette betyr ein systemteknisk om-veltning med omsyn til berekning av kommunen sine inntekter og utgiftsbehov. Sentrale stikkord er innlemming av barnhagetilskotet i kostnadsnøkkelen, forslag til nye kostnadsnøkler og skatteandelen av samla inntekter blir reduserert fra 45 % til 40 %.

Så langt rådmannen kan sjå vil dette bety ei tilnærma uendra økonomisk situasjon for Bokn kommune sett i forhold til regjeringa sine føresetnader. Kommuneproposisjonen legg opp til ein effekt på -106 kroner per inn-byggar, omlag 86 000 kroner, som  fylgje av systemendringane, mens fyrste års virkning blir + 254 kr per innbyggar i Bokn, omlag 206 000 kr.

Dei siste åra har regjeringa auka småkommunetilskotet, noko som har har vore positivt for Bokn kommune. Sjølv om effekten er liten for neste år med nemnde systemendringar, likar eg  ikkje at ein nå gjer endringar med eit tilskott som er såpass viktig for Bokn og andre småkommunar. Men med den auken i folketalet ein har opplevd til nå i år og med positive folketals-framskrivingar for kommunen dei   neste åra, trur eg likevel systemendringane på sikt vil kunne slå positivt ut for Bokn kommune.

Ordføraren

April 2010

Kjære sambygding

Investeringsplan
Kommunestyret gjorde i møte den 13. april prinsippvedtak om brutto- og nettoinvesteringar for den neste fem-års perioden i Bokn. Bakgrunnen for dette er mellom anna dei nye framskrivingane Bokn kommune har blitt førespegla ved ulike høve dei siste månadene. Ei auke i innbyggartalet på mellom 1000-1500 personar dei neste 20 åra vil føra til store investeringskostnadar. For å møte desse utfordringane har ein difor funne det naudsynt å laga til gjennomtenkte investeringsplanar basert på eit ansvarleg økonomisk opplegg.

Bokn kommune står framfor fleire store investeringar, mellom anna innan samferdsel, vassforsyning, utbygging av nytt bustadfelt og ferdigstilling av molo i Hålandssjøen. Sjølv om Bokn kommune har forholdsvis høg lånegjeld i høve til andre Rogalands-kommunar, har ein også hatt ei god inntektsutvikling frå 2002 til 2010. Den økonomiske handleevna er styrka både som fylgje av sterkt redusert lånegjeld og ei styrking av disponibelt fond.
Med den vedtekne investeringsplanen tek ein høgde for investeringar på opp mot 23 millionar kroner dei neste åra.

I høve til ny fleirbrukshall vedtok kommunestyret i nemnde møte også å utreda moglegheita for å kombinera ein ny fleirbrukshall med ny skule. Bakgrunnen for dette vedtaket heng også saman med den forventa folketalsauken i Bokn kommune dei neste 20 åra. Slår prognosane til vil ein merke presset tidleg i høve til skulen. Allereie i dag har ein utfordringar i høve til areal ved Bokn skule. Politisk ynskjer ein difor å avdekka kva som er mest lønnsamt; å bygga ut nåverande skulebygg eller bygga heilt nytt.

Arbeidsgruppa som har jobba med å utreda ny fleirbrukshall det siste året har lagt eit godt grunnlag for kommunen. Dette er ei stor, viktig og spennande sak for kommunen vår. Samstundes har føresetnadane endra seg ein del undervegs. Det er difor viktig for kommunestyret å bruka den tida som er naudsynt for å treffa mest mogleg gode og framtidsretta vedtak. Dette gjeld mellom anna i høve til plassering, drift og romprogram.

Kommunestyret vil ta stilling til korvidt ein også skal prosjektera ny skule inn i ein fleirbrukshall innan sommarferien. Til den tid skal administrasjonen ha gått gjennom og kvalitetsikra dei økonomiske sidene ved eit slik prosjekt, basert på ein allereie utført moglegheitsstudie frå eit uavhengig konsulentfirma. I dette arbeidet skal ein også sjå på kva tilskott ein kan løysa ut frå det offentlege.

Kultursoge
Kommunestyret vedtok i møte den 13. april å få skrive kultursoge for Bokn kommune. Birger Lindanger, som også har ført i pennen ”Bokn, gard og ætt”, blir engasjert til å skriva kulturhistoria for bygda.
Det har vore eit ynskje å få samla Bokn si kulturhistorie mellom to permar heilt sidan den siste gards- og ættesoga blei gitt ut i 2002. Ei generell bygdesoge vil vera eit naturleg og viktig framhald av det bygdehistoriske arbeidet i Bokn. I tillegg har Bokn ei uvanleg rik og spennande fortid som det er viktig å formidla. Slekts- og gardshistoria representerar dei fyrste historiske nivåa, og difor er det naturleg at ein i Bokn nå går i gang med det tredje nivået: Bygdesoga.

Ei bygdesoge vil så og seia starta i år 0 og vil skildra alle sider ved bokna-samfunnet fram til forfattaren avsluttar arbeidet sitt om to år. Det historiske materialet for Bokn er omfattande og vil bli ei viktig kulturhistorisk skildring og dokumentasjon for komande generasjonar.

Bygdesoga vil naturleg innehalda informasjon om mellom anna naturgjevne tilhøve, steinalderen, mellomalderen, gjenreisinga, ut-vandringa på 1800-talet, verdskrigane, busetnadsutviklinga, jordbruk og fiske, handel og samferdsel, kyrkje og kristenliv, skulestell, kommunepolitikk og mykje meir.

Birger vil gå i gang og førebu dette arbeidet allereie i mai, og går arbeidet etter planen vil kultursoga for Bokn kunne ligga under juletreet i 2011.

Ordføraren

Mars 2010

Kjære sambygding

Ambulanse
Bokn kommune har over ein periode på 20 år hatt eit samarbeid med Helse Fonna om lokalisering og drift av ambulanse i Bokn. Helseføretaket har gitt driftstilskott til kommunen og har stilt kjøretøy til rådvelde. Bokn kommune har i all hovudsak hatt ansvar for å bemanna ambulansen med kvalifisert personell.

Som fylgje av nye forskrifter har Helse Fonna kome med utspel om at ambulansen på Bokn må leggast ned frå 01.04.10. Dette fordi ambulanse-personalet på Bokn-ambulansen frå denne datoen ikkje oppfyller dei lovpålagte kompetansekrava.

Ordninga med ambulanse stasjonert i Bokn har fungert godt for inn-byggarane i Bokn, og har samstundes vore eit viktig supplement til den akuttmedisinske beredskapen på E39 i både Bokn og delar av Tysvær kommune.

Bokn kommune ser nå på moglege løysingar for å kunne ivareta den akuttmedisinske beredskapen i kommunen. I tillegg har eg teke opp saka med Helse- og omsorgsdepartementet for å avdekka moglege opningar som gjer at det går an å vidareføra ambulansedrifta i Bokn i sin nåverande form.

Bokn kommune vurderar også ei løysing med ein såkalla ”First res-ponder”-bil. Dette vil vera ein kommunal akuttmedisinsk beredskapsbil som vil vera knytt opp mot AMK-sentralen i Haugesund. Ein slik beredskapsbil vil vera eit utrykningskjøretøy som i hovudsak vil ha same bemanning som dagens ambulanse, men som ikkje vil kunne transportera pasientar til sjukehus. Beredskapsbilen vil likevel ha same responstid som dagens ambulanse og skal vera stasjonert i Føresvik.

Saka blei handsama politisk i formannskapet den 23. mars. Mot eì stemme blei det vedteke å omgjera ambu-lansen til ein kommunal redningsbil, ”First responder”, dersom Helse Fonna seier opp gjeldande avtale om ambulansedrift i Bokn kommune.

Ordninga med ein kommunal redningsbil blir ei prøveordning ut året. Tenesta vil bli evaluert i samband med budsjetthandsaminga for 2011.

Planlegging
Bokn blei forespegla lyse framtidsutsikter av innleiarane på det felles formannskapsmøtet som blei avholdt i auditoriet på Bokn skule den 3. februar. Etter dette møtet har lokale medier fylgd opp med fleire spennande artiklar frå bygda, og viser med dette at framskrivingane av den framtidige folketalsauken blir teken på alvor, også utføre våre kommunegrenser.

Med realiseringa av Rogfast som bakteppe, har ein politisk for alvor starta opp prosessen med å planlegga framtida i Bokn. Formannskapet jobbar nå med ein overordna investeringsplan for kommunen der ein forsøker å ta høgde for dei framtidsutsiktene me er blitt presenterte for. Det er ein spennande, men krevjande prosess for politikarane i Bokn å planlegga for framtida.

Utgangspunktet for rullering av kommuneplanen har endra seg radikalt sidan den eksisterande planen blei jobba fram. Sentrale og viktige spørsmål dukkar opp: Kor mange innbyggarar skal ein planlegga for? Kvar skal dei bu? Korleis skal utviklinga skje? Korleis skal ein styra utviklinga? Kva næringsutvikling ynskjer ein og kvar skal utviklinga skje? Skal det byggast opp nye sentrumsfunkjonar utanom Føresvik?

Politikarane i Bokn har i løpet av vinteren blitt eksponert for heilt nye krav til det politiske handtverket i den komande kommuneplanen. Kravet til presisjonsnivå i høve til dei strategiske tankane, krev innleving, engasjement og nytenking hjå dei folkevalde og administrasjonen. Det er viktig å treffe godt på den strategiske planlegginga om me i Bokn skal klare å ta vare på dei moglegheitene me ser vil koma i kjølvatnet av Rogfast.

Me har fått god hjelp av våre naboar i Rennesøy kommune – kanskje den einaste kommunen i Noreg som har opplevd ei utvikling som det Bokn er blitt forespegla. Den 17. mars gjennomførte Bokn næringsforum tema kveld der Rogfast var hovud-tema. Ordførar på Rennesøy, Ommund Vareberg, var invitert til å fortella om dei erfaringane Rennesøy hadde gjort seg i åra etter Rennfast. Tilhøyrarane fekk mange nyttige innspel og råd i høve til korleis me i Bokn skal kunne handtera ei ekspansiv utvikling. Dette er nyttig kunnskap i den vidare planlegginga.

Bokn kommune har også fått løyvd midler frå Rogaland fylkeskommune til ein mulighetsstudie rundt Rogfast-prosjektet. Ein systematisk og ana-lytisk studie av alle sider med Rogfast vil vera eit viktig dokument og eit godt beslutningsgrunnlag for lokalpolitikarane når vedtak skal fattast. Dette dokumentet vil også vera eit viktig supplement til regional plan for Haugalandet, næringsplanen for Bokn og andre planverk som blir førande for bygda i åra framover.

Eg trur at ei positiv folketalsutvikling er ein føresetnad for næringsutvikling, vekst og utvikling i Bokn kommune. Vekst i folketalet både trur, og håpar eg, vil kome allereie om eit par år når T-sambandet står klart og bu- og arbeidsmarknaden på Haugalandet blir knytt endå tettare saman. Det er difor viktig at ein politisk visar at me trur på framskrivingane, og brukar framskrivingane til å skapa aktivitet. Dette blir viktig all den tid me veit at aktivitet genererar meir aktivitet.

Ordføraren

Februar 2010

Kjære sambygding

Bygdabladet 25 år
Bokn Bygdablad er i år inne i den 25 årgangen. Det fyrste prøvenummeret av Bokn Bygdablad kom ut i oktober 1985. Den fyrste utgåva av bladet omhandla mellom anna planane om å bygga Boknatun.

Fleire kommunar i distriktet begynte å gje ut bygdeblad i denne perioden. Også i Bokn fann ein ut at dette ville vera ein god måte å ivareta kommunen si informasjonsplikt på. Å gje ut ei avis er imidlertid ressurskrevjande og administrasjonen i Bokn kommune var nok den gangen i minste laget til å kunne setta av ressursar på å gje ut eit slikt produkt, som heller ikkje er lovpålagt. Det meste av det redaksjonelle arbeidet blei difor utført på fritida og med små ressursar av Reidar Alvestad, som var redaktør frå 1985 til 1997. Bygdabladet blei i denne perioden kopiert opp på kopimaskin, bretta og stifta saman for hand.

Men interessa for Bygdabladet var stor, både blant fastbuande og utflytta boknarar. Bladet har i desse åra hatt på trykk artiklar om små og store hendingar frå boknaren sin kvardag. Frå 1997 endra bladet utsjånad og blei trykt på trykkeri. Dette medførte at bladet kunne setja på trykk bileter med forholdsvis høg kvalitet. I dag sit Bokn kommune på eit rikhaldig biletgalleri på fleire tusen bileter. Bilet-arkivet utgjer saman med utallige artiklar ein svært viktig og verdifull kulturell arv for våre etterkommarar, og dokumenterar kvardagen i Bokn.

Ein må heile tida tilpassa bladet i høve til den tida ein lever i, og 1. april 2003 nådde Bygdabladet ein ny milepæl då bladet fekk si eiga nettside, og etterkvart fekk abonnentane også fekk høve til å lasta ned bladet i pdf-format. Dette medførte at andre medium lettare kunne fanga opp saker frå Bokn kommune. Det er fleire døme på saker som har blitt fulgt opp av andre medier med utgangspunkt i Bygdabladet, og sistnemnde har også levert bilete i samband med større hendingar til andre aviser.

I tillegg til å vera Bokn kommune sin viktigaste informasjonskanal, trur eg Bygdabladet også er ein særs viktig identitetsbyggar for boknarane. I tillegg er bladet med å tena og stimulera demokratiet, kulturen, organisasjonane og næringslivet i Bokn.
Med små ressursar har ein makta å etablera ein nyttig og truverdig mediekanal lokalt, som også langt på veg er eit viktig supplement til regionavisenes heller sporadiske dekning av kommunen vår.

Eg vil nytta høvet til å gratulera Bygdabladet med sine fyrste 25 år, og takka alle som gjennom desse åra har bidratt til eit godt og nyttig blad.
Særleg vil eg takka redaktør Jardar Havikbotn for den jobben han har gjort med å løfta Bygdabladet til det gode produktet det er i dag og spesielt for hans sans for ei gjennomarbeidd sideutforming.
Lukke til med dei neste 25 åra.

Felles formannskapsmøte i Bokn
Bokn kommune var vertskap for det fjerde felles formannskapsmøtet på Haugalandet den 3. februar. Om lag 80 politikarar frå heile regionen møttest i auditoriet på Bokn skule for å markera oppstarten av det regionle planarbeidet og for å få ei orientering om framdrifta av Rogfast.

Dette var eit viktig møte og blei gjennomført på eit gunstig tidspunkt. Symbolverdien av at sentrale politikarar på Haugalandet samla seg på denne måten på Bokn var stor, spesielt etter at byrådsleiaren i Bergen og ordføraren i Stavanger i januar møttest i vår eigen bakgård for å markera starten på eit tettare samarbeid mellom dei to storbyane. Fleire meiner at Haugalandet har hamna på sidelinja i prosessen med å samla politiske krefter i nord-sør aksen på Vestlandet.

Det nyttar ikkje for Haugalandspolitikarane å sutre over det som skjer. Ein må tvert i mot forholda oss til det faktum at Rogfast nærmar seg ein realitet og førebu oss på dei utfordringane som kjem i kjølvatnet av fastlandssambandet med nord-jæren. For Bokn vil det utvilsamt vera ein stor fordel å få bu- og arbeidsmarknaden på nord-jæren 20 minuttar unna oss. Det som er positivt for oss, er også positivt for Haugalandet. Og omvendt. Lukkast det for Bokn å ta vare på og utnytte dei moglegheitene som Rogfast gjev oss, vil det i fylgje det norske konsulentselskapet Econ Pöyry gje kommunen vår store, positive ringverknadar. Mellom anna vil det kunne gje positive utslag for folketalet.

Haugalandet må nå legga til sida frykta for Stavangerregionen og heller jobba saman for å styrka regionen vår. Me må samla kraft og fokus for å styrka og vidareutvikla Haugesund lufthavn, Karmøy, Høgskulen Stord/Haugesund, sjukehuset, handelsstanden og andre sentrale samfunnsinstitusjonar på Haugalandet. Me bur i den mest ressursterke regionen i Noreg. Med gode strategiar og godt samarbeid skal me klare å ta den posisjonen eg meinar Haugalandet har føresetnad for, og på den måten unngå at Haugalandet blir ein sovande forstad til Stavanger etter at Rogfast er opna for trafikk.

Ordføraren

Desember 2009

Kjære sambygding

Budsjettet
Statsbudsjettet gjev kommunane ei inntektsvekst i 2010 på om lag 8 milliardar kroner. I forhold til budsjettet for 2009 er auken i frie inntekter for Bokn i 2010 berekna til om lag 2,3 millionar kroner, eller om lag 5,5 %. Til samanlikning er den samla, nominelle veksten for dei andre Rogalandskommunane 4,4 %.

Kommunestyret vedtok i møte 15.12.09 budsjettet for 2010, og var eit fellesforslag frå dei fire partia som er representert i kommunestyret. Sjølv om Bokn kommune har eit akseptabelt overskot på drifta, har me framleis høg lånegjeld. Det vedtekne budsjettet for neste år er stramt, men politikarane har prioritert å oppretthalda og vidareføra det gode tenestetilbodet Bokn kommune har hatt i 2009. Det er mellom anna lagt inn i budsjettet ei auke på 25% stilling til styrking av musikk- og kulturskulen. I tillegg er det løyvd midler til eit prøveprosjekt i 2010 med ei auke i opningstida for biblioteket på kveldstid.

Vidare er det løyvd midler til Petra fritidsklubb for oppgradering av interiør og anna utstyr som er relevant i forhold til drifta på Kyrkjebygd kulturhus, og det er satt av 200.000 kroner til oppretting av folkehelsekoordinator i samband med partnarskapsavtalen for folkehelse som Bokn kommune inngjekk med Rogaland fylkeskommune i haust. Rogaland fylkeskommune skal etter planen gå inn med tilsvarande beløp.

Bokn kommune står framfor store utfordringar når det gjeld investeringar. For å posisjonera kommunen i forhold til dette, har ein styrka disposisjonsfonda med 1 million kroner til utbetring av Føresvikvegen og 1 million kroner til bygging av fleirbrukshall. I tillegg vedtok kommunestyret ei investering på 300.000 kroner til opparbeiding av indre hamn i Føresvik. Av det budsjetterte overskotet på nær 5,6 millionar kroner, er det satt av 650.000 kroner til vidareføring av ”Kjekt på Bokn”.

Kulturprisen 2009
Kulturprisen i Bokn blei i år delt ut av underteikna på Bokn musikkorps sin luciafest sundag 13.12.09, og gjekk til Odd Grønnestad for lang og tru teneste i Bokn musikkorps. Spesielt har han gjort ein stor innsats det siste året for å unngå nedlegging av skulekorpset. Prisvinnaren var som spelande medlem med og starta korpset i 1964. Han har også seinare spelt i Bokn Brass. Han har vore styremedlem i mange år og formann i fleire av desse åra, noko han også er ved 45 års jubileet.

Kulturprisen blei fyrste gang delt ut i 1993 og siste gangen i 2005. I 2007 blei han av ulike grunnar ikkje delt ut. Ein såg det då som naturleg at 2009 blei året for neste tildeling. Kulturprisen blir delt ut til personar som har utført eit særleg verdfullt arbeid på kulturområdet eller i nærmiljøet i Bokn kommune. Boknarane har gjennom Bygdabladet blitt oppmoda om å kome med forslag på kandidatar. Årets kulturprisvinnar blei vedteke av eit samrøystes formannskap den 08.12.09.
Mine gratulasjonar går til Odd Grønnestad. Eg håpar prisen kan vera til motivasjon i det vidare arbeidet med Bokn musikkorps og det øvrige kulturarbeidet i Bokn kommune. Innsatsen til Odd er viktig for å oppretthalda eit levande kulturliv i bygda, og er utvilsamt til stor glede for boknarar i alle aldre.

God jul
For eitt år sidan trur eg dei fleste av oss var usikre og spente framføre det året me skulle gå inn i. I dag kan me så smått oppsummera og trekka nokre konklusjonar og kanskje eit aldri så lite lettelsens sukk. 2009 har vore ruglete, men blei heldigvis ikkje det året me frykta. Det siste året har vore utfordrande for næringslivet i Rogaland, men mange meinar nå at marknaden er på veg oppover igjen, sjølv om utviklingstakten er vesentleg dempa.

Sjølv om verdensøkonomien ser ut til å ha stabilisert seg, vil konkurranseutsatt sektor framleis ha nokre tøffe år framføre seg. Høg rente og høgt kostnadsnivå i oljenæringa vil også påvirke aktivitetsnivået i mange Rogalandsbedrifter i tida framover.

Det har heldigvis vist seg at Haugalandet, og områdene frå Stavanger til Bergen, har vore så ressurssterk som eg har trudd og håpet på. Bedriftene har hatt evna til å halde hovudet kaldt. Dei har mellom anna skjerma lærlingmiljøa og har tenkt langsiktig, spesielt med hensyn til opplæring og kompetanse.
Sjølv om me ikkje kan avblåsa finanskrisa heilt endå, kan me alle ta ein pust i bakken og innvilga oss ein velfortent julaferie og gå inn i det nye året med framtidstru og optimisme.
Eg vil takka for året som har gått og ynskjer samtlege boknarar, og øvrige lesarar, ein god og fredfull jul og eit godt nytt år.

Ordføraren

November 2009

Kjære sambygding

Kalender
For tredje året på rad er Bokna-kalenderen sendt ut med november-utgåva av Bygdabladet. Dette er samstundes ei stadfesting på at tradisjonen med ein lokalprodusert kalender er i ferd med å setja seg.
Tilbakemeldingane har vore gode og det ser ut for at kalenderen blir brukt i stor utstrekning – både i heimane og på arbeidsplassane. Kalenderen er med på å bygga opp om den lokale identiteten, og er meint å vera ein kilde til inspirasjon for dei som ynskjer å ta i bruk den flotte boknanaturen.

Eg meiner årets kalender har teke steget opp eit nivå takka vera dyktige hobbyfotografar som har sendt inn sine bidrag til redaksjonen. Bileta i kalenderen held eit høgt teknisk nivå, samstundes som fotografane har hatt evna til å fanga motiva på ein slik måte at dei skapar undring og begeistring. Mange vil nok spørje seg om bileta verkeleg er tekne på Bokn.

Temaet for Boknakalenderen 2010 er natur og dyreliv gjennom årstidene. Kvar måned har i tillegg fått fylgje av ein matoppskrift med lokal tilknytning. Utforminga er noko endra i høve til 2009. Sjølve kalendariet er tona ein del ned, mens bileta i større grad er framheva.

Eg håpar kalenderen fell i smak og eg vil samstundes oppmoda lesarane om å bidra med sine blinkskot frå Bokn til 2011-kalenderen.

Rogfast
Prosjekteringa av Rogaland fastlandssamband – Rogfast – pågår for fullt i fylket, kommunen og hjå Statens vegvesen. Kommunedelplanane i dei berørte kommunane Randaberg og Kvitsøy er nett vedtekne, og etter planen blir saka lagt fram for kom-munestyret i Bokn på det fyrste møtet i 2010.

Bokn har fått aksept for sine krav hjå vegmyndene om eit eige kryss på Are og oppgradering av krysset i Knar-holmen til planfritt kryss. Samstundes pågår det ein dialog mellom fylket og Statens vegvesen og Bokn kommune om punktet som omhandlar risiko- og sårbarleiksanalyse på den framtidige E39-trasèen over Bokn. Den framtidige trafikkauken vil representera ein heil del ulemper og utfordringar for boknasamfunnet, slik som til dømes eit meir samansett ulukkesbilete og støy-problem.

Bokn kommune meinar det er vesentleg at kostnadar knytt til utbetrings-tiltak på strekninga Arsvågen-Mjåsund blir kjent for politikarane før finansi-eringa av prosjektet er på plass. Desse kostnadane bør kome inn i Rogfastbudsjettet, og ikkje i samband med reguleringsplanarbeidet – noko som erfaringsmessig vil vera mindre
forpliktande.

Aktuelle utbetringstiltak er til dømes midtrekkverk, breiare vegbane, støyskjerming, veglys, kryssutbetring på Austre Bokn og Ognøy. Dette er viktige trafikksikringsmoment, ikkje berre for boknarane, men for alle som

kjører på E39 gjennom Bokn. Eg er innstilt på å finne ei minneleg løysing på desse spørsmåla saman med
Statens vegvesen og Rogaland fylkeskommune slik at også Bokn kan få vedteke sin kommunedelplan.

Svineinfluensa
Bokn kommune har kome godt i gang med vaksinering i samband med den såkalla svineinfluensaen og har til nå vaksinert i overkant av 50% av befolkninga. Ein er nå ferdig med risiko-gruppene og svinebøndene, og i veke 45 fekk Bokn kommune tilbake 200 dosar frå Tysvær kommune. I den
samanhengen blei delar av den friske befolkninga vaksinert, mellom anna barnehagen, skulen og dei opp til 30 år. Dei resterande vaksinane blei brukt til øvrige interesserte.

Sjølve gjennomføringa av dei organiserte vaksinasjonsdagane har gått bra. Boknarane har vore flinke til å møte opp når dei skulle, samstundes som få personar har blitt avvist på grunn av mangel på vaksinar eller kapasitet. Stemninga har vore god på vente-rommet, der det blei servert kaffi og ein fekk høve til å slå av ein prat med naboen.

Det er i skrivande stund uklart når Bokn får tilsendt nye forsyningar med vaksine frå sentral helsemynde, men ein reknar med å motta 500 nye dosar før jul. Gå inn på www.bokn.no for oppdatert informasjon om vaksinasjon.

Ordføraren

Oktober 2009

Kjære sambygding

Statsbudsjettet
Den 13. oktober blei statsbudsjettet for 2010 lagt fram. Kommunesektoren får ein vekst i samla inntekter på 8 milliardar kroner, der 4,2 milliardar er frie inntekter.

Av dette er 230 millionar kroner øyremerka samhandlingsreforma, mens eìn milliard går til samferdsle. Men i framlegget var det heller ingen bidrag til å betre kommunesektorens økonomiske balanse, som i utgangspunktet er for svak. Sjølv om den økonomiske situasjonen i Bokn er tilfredsstillande, slit heile kommune-noreg med låge netto driftsresultat og ei sterk auke i gjelda.

Framlegget til statsbudsjett viser at det er små direkte konsekvenser for 2010-budsjettet i Bokn. Det ligg inne ei lita auke i rammetilskottet på om lag 5,5 % og dette tilseier at driftsnivået frå 2009 vil kunne vidareførast i 2010. Rammetilskott og skatt er berekna å utgjera om lag 44 millionar kroner for 2010 mot kroner 41,4 millionar i 2009.

Det er nå heldigvis klare teikn på at den økonomiske aktiviteten er på veg oppover igjen, etter ei særs svak utvikling mot slutten av 2008 og inn i 2009. For 2010 legg ein til grunn ein vekst i BNP for Fastlands-Noreg på vel 2 prosent, etter ein nedgang på 1 prosent i år. Den anslåtte veksten i 2010 er lågare enn trendveksten i økonomien, men ein ventar at arbeidsløysa vil auka noko også frå i år til neste år.

Folkehelsekoordinator
Bokn kommunestyre vedtok i møte 13.10.09 å inngå partnarskapsavtale for folkehelse med Rogaland fylkeskommune. Rogaland har sidan 2006 vore med i den statlege satsinga innan folkehelse i Norge, med oppbygging av eit partnarskap for folkehelse.

Bokn kommune er godt i gang med rullering av kommuneplanen, og med nemnde vedtak har politikarane i Bokn støtta opp under eit av dei viktigaste satsingsområda, som er folkehelse.

For å kunne gjera gode prioriteringar når kommuneplanen skal utarbeidast, er det viktig at kommunen sit på god kunnskap om helsetilstanden i kommunen og dei faktorar som er med å påverka helsa. Ved å inngå partnarskapsavtale kan Bokn kommune få tilskott til å bygga opp ein infrastruktur for folkehelsearbeidet og styrka koordineringsfunksjonen. Dette kan m.a. innebera at ein brukar dei tildelte midlene til å tilsetja ein folkehelsekoordinator i Bokn.

Gjennom ”Kjekt på Bokn” har ein etablert eit godt fundament for det vidare folkehelse-arbeidet. Tanken er at ein gjennom partnarskapet med fylkeskommunen kan styrka, utvida og vidareutvikla dette arbeidet.

Gründerånd i Bokn
For ein kommune som Bokn er det viktig for heile samfunnet at engasjementet og viljen til å setta i gang ny næringsaktivitet er tilstades. Høg aktivitet er eit sunt teikn og gjev signal om utvikling. Denne utviklinga håpar me skal gje ei folkeauke, bustadbygging og nye arbeidsplassar.

Den siste tida har eg registrert at det er stor etablerarvilje i kommunen. Til nå i år er det innvilga midler frå næringsfondet til heile seks søkjarar. Desse etablerarane representerar ulike næringar, dømesvis innan fiske, båttransport, fritidsbåtsegmentet og grønn omsorg.

Eìn av desse søkjarane var Roy Olsen. Han fekk innvilga midler frå næringsfondet til å utvikla vidare forretningsidèen sin. Prosjektet hans oppfylte også kriteria for å bli teke opp i Haugaland Vekst sitt inkubatorsystem.

Ein inkubator bidreg til å utvikla innovasjonsbedrifter i ein tidleg fase ved bruk av kompetanse og nettverk som inkubatoren har. Inkubatoren kan bistå med administrative tenester og kontorleige. Inkubatoren sit også på eit kompetansenettverk som syt for at gründeren får det optimale utgangs-punktet for utvikling forretningsidéen.

Eg vil ynskja Roy lukke til med prosjektet og eg håpar at innsatsen hans på sikt kan skaffe fleire arbeidsplassar til bygda, samstundes som etablerarviljen hans kan vera til inspirasjon for andre gründarar i Bokn.

Ordføraren

September 2009

Kjære sambygding

TV-aksjonen 2009
NRK har tildelt årets TV-aksjon til ei av verdas største hjelpeorganisasjonar – CARE.
CARE er ein hjelpeorganisasjon som jobbar med naudhjelp og langsiktig bistand i fleire av verdas fattigaste land. Kvart år får om lag 65 millionar menneske hjelp i 71 land verda over. Organisasjonen har fokus på kvinner sine rettar og jobbar for at alle skal leva eit verdig liv. CARE jobbar ut i frå filosofien om at kvinner som får hjelp og muligheiter, sjølv finn vegen ut av fattigdommen.

NRK har plukka ut ein verdig organisasjon til årets TV-aksjon. Er du fødd som jente i eit fattig land, har du alle odds mot deg. Det er mellom anna mindre sjanse for at du går på skule og at du får tilgang til helsetenestar når du treng det. CARE fokuserar på kvinner og jenter, og syt med det for at stemma deira blir høyrt.

Den 18.oktober kan du vera med å gje verdas fattigaste kvinner og familiane deira eit betre og meir verdig liv. I fjor satte me innsamlingsrekord i Bokn. Eg vil oppmoda boknarane til å ta vel i mot årets bøssebærarar og gje slik at me slår fjorårets innsamlingsresultat. Formannskapet har allereie lagt grunnlaget for eit godt resultat då dei i formannskapsmøte 30. september løyvde kr. 20 per innbyggjar til denne viktige saka.

Trafikkultur
Den siste tida har det vore fleire oppslag om trafikken på europavegen over Bokn, der fokus har vore på stor fart og farlege forbikjøringar. I likskap med mange andre boknarar, brukar eg nesten dagleg denne vegen. Og nesten dagleg er eg også vitne til medtrafikantar som driv risikosport i form av tråkling av ferjekøar og stor fart.

Dagleg har me tusenvis av gjester som er innom kommunen vår. Som vertskap for E39 forventar eg at gjestane våre oppførar seg fint den stunda dei er her – om det så berre er for 20 minuttar. Eg trur dei fleste er enig med meg i at me bør kunne forventa at gjestene våre held lovar og reglar når dei gjestar kommunen vår. Me forventar at dei har ei framferd som ikkje set eigne eller andre sine liv i fare.

Likevel er eg nesten dagleg vitne til forbikjøringar som kvalifiserar til førarkortbeslag og fartsbrot som ville medført fengsel utan vilkår. Og det på ein europaveg som i røynda held same standarden som ein forstadsveg med 60-sone og gangfelt.

Grunnane er mange og gode for at Bokn kommune nå har kontakta naboen i aust, Tysvær kommune, og ein kommunikasjonsrådgjevar for å sjå om det er grep me kan gjera saman for å justera trafikkulturen på E39, før det går nye liv tapt. Me ynskjer å trekka inn fleire aktørar i dette samarbeidet, slik som til dømes vegmynde, politiet, andre kommunar, lokalt næringsliv, Fjord1 med vidare. Sveio kommune, Haugaland og Sunnhordland politidistrikt og Utrykkingspolitiet har til nå gjeve uttrykk for at dei ynskjer å delta i ein ”trafikksikringsdugnad” saman med Bokn kommune.

Det offentlege, både politiet og vegmynde, har opp gjennom åra kjørt mange ulike trafikksikringskampanjer med vekslande hell. Det me snakkar om i vår kommune er førebels ein ”småskalakampanje” der ein med små midler heller må vektlegga det kreative og vera nytenkande.

Kanskje det er i den subtile bodskapen nøkkelen ligg til å endra folks kjøreadferd – i alle fall så lenge dei er i vår kommune? Inntil me får svaret på dette spørsmålet: Kjør forsiktig.

Ordføraren

August 2009

Kjære sambygding

Svineinfluensa
Det er førebels ikkje påvist svine-influensa ved Bokn legekontor, men ein har hatt nokre tilfeller med klinisk mistanke. Bokn kommune har førebudd seg godt, og i tråd med retningslinene frå sentrale mynde. Pandemiplan for Bokn blei ferdigstilt i veke 33 og kommunen gjennomførte i byrjinga av august eit informasjonsmøte med dei ulike kommunale einingane samt eksterne aktørar i kommunen.

Mange meinar det har vore svært mykje oppstyr rundt denne pandemien, men det er viktig for offentlege mynde og kommunane å ha gode planar og strategiar for å kunne handtera eit verstefallsscenario. Bokn kommune sitt fokus er å kunne halda hjula i gang og kunne få drifta tilbake til ein normalsituasjon så raskt som råd, uansett kva prognoser som måtte slå til.

Prognosene viser at pandemien vil nå ein topp i midten av september. I dei verste vekene av epidemien reknar Folkehelseinstituttet med at det totale sjukefråveret maksimalt kan koma opp i 25 %. Tida vil vise om desse prognosane slår til, men inntil vidare bør alle fylgja dei råda som er gjeve om hygiene i samband med svineinfluensaen.
 
Dominoaksjon
Den 9. november er det 20 år sidan Berlinmurens fall. Dagen vil bli markert med ein to-dagars fridomsfest på begge sidene av Brandenburger Tor i Berlin. Det vil i dette høvet bli satt opp ein dominomur langs delar av trasèen der den opprinnelege muren stod plassert.

10. klasse ved Bokn skule skal på studietur til Polen i september med Aktive Fredsreiser, og i den samanhengen blei klassen invitert til å dekorera ein av desse dominosteinane. Som den einaste skulen i Rogaland skal elevane frå Bokn dekorera eit bodskap om historikken til muren og murens fall på steinen.

Meir enn 1000 steinar skal dekorerast, og det vil bli brei omtale av prosjektet i media. Dekorasjonane vil i tillegg bli foreviga i boka ”Buch der Steine”, som kjem ut på 20-års dagen.

Det er veldig hyggeleg at Bokn skule er eìn av 12 skular i Noreg som blei trekt ut til å delta i ei viktig historisk markering. Dette blir utvilsamt ei spesiell oppleving for 10-klassingane og vil setta ein spiss på ein spennande utanlandstur. Eg vil ynskja heile reisefylgjet god tur og lukke til med prosjektet.

Val 09
Valdagen for Stortings- og sametingsvalet er 14. september 2009.
Valkampen har for alvor blitt intensivert dei siste vekene. Politikk og partiprogram blir diskutert både i fjernsyn, radio, aviser og på nettet. Ved Fylkestingsvalet i 2007 låg landsgjennomsnittet for valgdeltaking på kun 61,2 prosent, noko som er svært lågt spesielt med tanke på at Noreg blir rangert som nummer to på FN si levekårsliste. Både Sverige og Danmark har høgare valdeltaking enn me har i Noreg.

Med dette som bakgrunn har ein i samband med årets val utfordra kommunane til å delta i Demokratimesterskapet. Dette er ein nasjonal konkurranse der alle  kommunane i landet  konkurrerar om å få høgast valdeltaking under Stortings- og sametingsvalet. Målet er auka valdeltakinga i kommunane og skapa eit positivt engasjement kring det norske demokratiet. Vinnaren får 100. 000 kroner.

Bokn kommune er meld på i denne konkurransen, og i denne samanhengen vil eg oppmoda alle boknarar om å bruke stemmeretten sin. Val er ein av dei absolutte grunnsteinane i eit oppbygd samfunn, og dette gjev kvar enkelt høve til å delta i ei opinions-danning og dermed påverknad av samfunnsutviklinga. Dette åleine er god nok grunn til ikkje å sitje heime valdagen, men nå kan du også bidra til at Bokn er med i kampen om 100. 000 kroner til fellesskapet og god omtale i media.

Bruk stemmeretten. Godt val!

Ordføraren

Juni 2009

Kjære sambygding

Fleirbrukshall
Det siste halvåret har gruppa som utredar ny fleirbrukshall i Bokn jobba tett saman med utvalet som skal vurdera utbygging av skule og barnehage. Gruppene har hatt fleire synfaringar på anlegg som kan danna grunnlag for eit nytt bygg i Bokn. Gruppene har også vurdert ulike tomtealternativ for eit slikt prosjekt. Men me er framleis berre ved startstreken for prosjektet. Det er ei rekke forhold som må ha ei avklaring før ein kan få ei endeleg politisk tilslutning til prosjektet.

Bygging av fleirbrukshall er ei stor sak i Bokn, og vil vera eit stort økonomisk løft for kommunen. Dette er ikkje utelukkande eit kommunalt prosjekt, men ei sak som vedkjem både lag og organisasjonar og boknarar flest. Difor er det viktig at ein kjører ein grundig og god prosess som inneber ei brei deltaking og involvering, og eit aktivt engasjement frå både lag og oganisasjonar i Bokn. Det vil vera ein avgjerande faktor for at ein skal kunne lukkast med eit så stort prosjekt.

Fleirbrukshall er eit godt og viktig prosjekt i Bokn, og har vore etterspurt i mange år.
Prosjektet bør likevel innordnast den økonomiske situasjonen i kommunen – utbygginga må ikkje i alt for stor grad gå ut over den kommunale drifta og dei kommunale tenestetilboda elles. Men med det engasjementet eg har sett, både i arbeidsgruppene og på bygda, har eg god tru på at me skal kunne lukkast med eit prosjekt som vil gjera det endå kjekkare å bu på Bokn.

Samhandlingsreforma
I juni la regjeringa fram samhandlingsreforma i form av ei stortingsmelding. Reforma har som mål at meir av helsetenestane skal føregå nærare der pasienten bur. Innbyggarane skal få fleire spesialiserte helsetenestar lokalt, både når det gjeld førebyggande helsearbeid, behandling og oppfylgjing av kronisk sjuke og eldre. Dette inneber at oppgåver skal flyttast frå spesialisthelsetenesta til kommunehelsetenesta.

Kommunane får også økonomisk ansvar for utskrivingsklare pasientar frå 2012. Regjeringa vil at kommunane skal få overført pengane det kostar å ha desse liggande på sjukehus. Føremålet er å gje kommunane ein økonomisk stimulans til å etablera eit billigare kommunalt alternativ.

Tanken bak samhandlingsreforma er god, og ei gjennomføring vil kunne gje samfunnet meir helse ut av kvar krone, meir likeverdig tilbod og betre tenestar der folk bur. Men det er også ei omfattande og kostbar reform, og slik eg ser det bør ikkje reforma bli gjennomført utan ordningar som avgrensar den økonomiske risikoen for små kommunar. Pasientar med ein samansett diagnose vil kunne gje urimelege utslag i økonomien i små kommunar.

For å kunne lukkast med gjennomføringa av samhandlingsreforma i Bokn, trur eg ein må bygga vidare på det gode og tette samarbeidet ein allereie har på Haugalandet. Med å inngå i eit stabilt, interkommunalt samarbeid i vår region, trur eg ein har kraft til å gjennomføre reforma etter intensjonen. Og på den måten også unngå kommunesamanslåing.

God sommar!
Starten på juni har vore opplyftande med sol og høge temperaturar. Og med slike vêrforhold blir ikkje behovet for å setja seg på syden-flyet like stort. Når sola skin kan eg berre stadfesta at Noreg er vårt nærmaste – og flottaste ferieland. Bruk nærområdene våre for det det er verdt i sommar. Bokn har mykje å by på, sannsynlegvis alle ingrediensene for dei gode ferieminnene; skjærgård med innbydande badeplassar, gode fiskevatn, turstiar, lynghei, kulturlandskap, fjell og vestnorsk skog. Og kanskje også nokre uoppdaga perler?

Ta på shortsen, fyr opp grillen og nyt det gode liv på terrassen. God sommar!

Ordføraren

Mai 2009

Kjære sambygding

Team Hanne
Eg vil gratulere Team Hanne, og vår eigen Anne Tove Øvrebø, med sigeren i det Store Korslaget på TV2 laurdag 2. mai. Med knappast mogleg margin blei det koristane frå Haugalandet som vann premien på 500.000 kroner.

Team Hanne har gjennom heile våren levert solid korsong og koreografi i beste sendetid til heile landet, og eg var aldri i tvil om at haugalendingane ville kome heilt til finalen. Hanne Krogh, Anne Tove og resten av koret, har vore særs gode ambassadørar for regionen vår, og det var ekstra hyggeleg at dette ikkje berre blei eit Haugesundsprosjekt, men ein kulturell dugnad der folk frå nabokommunane også deltok.

Pengepremien skal gå til eit fond for unge kulturtalent på Haugalandet. Dette er ein fornuftig måte å forvalte friske kulturmidler på, og som vil vera til god hjelp og inspirasjon for dei mange flinke og kreative ungdommane me har på Haugalandet.

Gratulere med sigeren og takk for flott underhaldning!

Tiltakspakke
I januar blei det kjent at kommunane hadde fått ei ekstra løyving for kommunale tiltak til vedlikehald. Bokn sitt tilskott var på totalt 772.000 kroner, fordelt med 548.000 kroner som tilskot til vedlikehald og 224.000 som frie inntekter. Tiltakspakka skal brukast til vedlikehald, oppgradering og rehabilitering av kommunale bygg, anlegg og vegar.

I møte den 5. mai fordelte formannskapet midlene på aktuelle tiltak i Bokn kommune for inneverande år. Det blei då bestemt at ein skal rehabilitera og setja i stand to av leikeplassane som i 2006 blei rive etter kontroll av leikeplassinspektør. Det blei løyvd 150.000 kroner til dette tiltaket. Vidare blei 50.000 kroner løyvd til sikring av farlege område rundt skulen, samt nytt gjerde rundt fotballbanen i Føresvik.

Formannskapet nytta også høvet til å henta inn noko av vedlikehaldsetterslepet ein har på kommunale kaiar og løyvde 100.000 kroner til gjennomgang av tilstand og vedlikehald. Utover dette blei det løyd midler også til andre mindre tiltak i kommunen, slik som utskifting av vindauge på Boknatun, rehabilitering av feristar og vedlikehald langs vegar og uteområde i kommunen.

Haugalandspakken
Styringsgruppa for Haugalandspakken bestemte i møte 30. april handlingsprogrammet for perioden 2010-2013. I denne samanhengen kom fylkesveg 890 Føresvik-E39 inn i dei såkalla sekkeposttiltaka som er prioritert i perioden. Med dette vedtaket kom til slutt alle Haugalandspakke-kommunane inn i handlingsprogrammet med prioriterte prosjekt. Lenge var Bokn og Sveio dei einaste kommunane som ikkje låg inne i pakken med sine prosjekt. Difor var det gledeleg at dei blei satt av 4 millionar kroner til utbetring av Føresvikvegen i perioden 2010-2013.

Dei siste 10 åra har ein hatt ei markant auke i trafikken på Føresvikvegen, frå E39 ved Knarholmen og til Føresvik sentrum. Trafikkavviklinga er ikkje optimal med den vegutforminga ein har i dag, og spesielt næringslivet i området har peika på utfordringa med å få fram store kjøretøy.

Av denne grunn trur eg tida er inne til å vurdera ei mogleg oppgradering av denne vegen og ei forlenging av sykkel- og gangsti til Knarholmen, og det blei i vinter starta ein prosess for å førebu dette arbeidet. Mellom anna har Bokn kommune hatt fleire møter med Statens Vegvesen om saka, og i veke 18 og 19 hadde ein utplassert ein trafikkteljar som registrerte talet på passerande kjøretøy ved teljepunktet sør for miljøstasjonen i Føresvik. Desse registreringane vil vera med og danna grunnlaget for det vidare planleggingsarbeidet i området.

Reguleringsarbeidet vil truleg starta opp til hausten, og i fylgje samferdslesjef i Rogaland, Gunnar Eiterjord, vil sekkeposttiltaka bli starta opp fortløpande når reguleringsplanane er klare i den enkelte kommune.

Ordføraren 

April 2009

Kjære sambygding

Rogfast
Den 13. mars la regjeringa fram Stortingsmeldinga om Nasjonal Transportplan 2010-2019. Rogaland kom godt ut av det og fekk med mange viktige samferdselseprosjekt. Det viktigaste for Bokn sin del var likevel at Rogaland fastlandsamband, Rogfast, var eit av dei prioriterte prosjekta i løpet av planperioden.

Etter ein langvarig økonomisk vekst, der Rogaland har vore den regionen med sterkast vekst, har Rogfast vokst seg fram til å bli eit samfunnsøkonomisk godt prosjekt, eit prosjekt med høg nytte – kost faktor. Dette, saman med eit målretta arbeid med dei andre vestlandsfylka, har nå gitt resultat. For Bokn vil ei vegutløysing med ein undersjøisk tunnel til nord-Jæren, kanskje vera av ei like stor betydning som den gang me blei landfast. Men effektane av Rogfast vil, både trur og håpar eg, bli mykje større enn i 1991. Trendene i det statistiske materialet Bokn kommune brukar som sitt grunnlag i samfunnsplanlegginga, er generelt positive. Folketalsauke, sysselsetjingvekst, auka trafikk gjennom kommunen og ein styrka tilgang til viktige arbeidsmarknader i både nord og sør tyder på at framtidsutsiktene er gode.

Føresetnaden er likevel at ein politisk møter dei utfordringane som ein ser i desse framskrivingane. Korleis kan til dømes Bokn kommune utnytta marknadspotensialet til det store – og aukande – trafikkvolumet til E39? Kvar skal folk bu? Kvar ynskjer ein nyetableringar og korleis tilpassar ein infrastrukturen?

Dette og mange andre viktige spørsmål må politikarane i Bokn nå for alvor ta tak i når ein skal planlegga framtida. Desse utfordringane gjer det også spennande å vera lokalpolitikar, og spesielt i desse dagar kor me er i gang med rullering av kommuneplanen i Bokn.

Utfordringa vår er å harmonera våre visjonar med det realistiske framtidsbiletet, og på det grunnlaget ta dei rette avgjerdene. Det vil bli ein krevande, men spennande jobb.

Tannlege
Overtannlege Eivind Hauge i Tannhelse Rogaland FKF, Nord-Rogaland, opplyste til meg før påske at stenginga av tann-legekontoret på Boknatun berre var midlertidig, og grunnen var svangerskapspermisjon hjå fleire av tannlegane.

Tannlegekontoret er nå oppe og går att, og opningstidene er kvar måndag kl. 08-15, førebels fram til august. Det vil vera tannpleiar på Boknatun også kvar onsdag fram til sommaren.

I august kjem den faste tannlegen tilbake frå permisjon. Det er usikkert om det då blir endringar på opningsdagen. Utanom opningstida ved Boknatun, kan ein for andre henvendingar ta kontakt med tannklinikken i Tysvær, m.a. ved akutte tilfelle.

Overtannlege Hauge kunne også fortelja at det for tida er god tilgang på tannlegar på Haugalandet, men at det var tilfeldige omstende som førte til at ein var nøydd for å stenga tannlegekontoret i Bokn.

Kjekt på Bokn
Den 22. mars blei re-start av prosjektet ”Kjekt på Bokn” markert ved fleire arrangement i kommunen, m.a. tur til Boknafjellet og vårkonsert på skulen. Til tross for det ustabile vêret, var det eit godt oppmøte både av turgåarar og på konserten.

Dei tre arbeidsgruppene i Kjekt på Bokn har vore aktive sidan nyttår. Alle gruppene har hatt fleire møter der ein m.a. har plukka ut ulike tiltak, store og små, som ein konkret skal jobba vidare med.

Eg har opplevd eit stort engasjement i alle gruppene, og dette er ein avgjerande faktor for at dette prosjektet, som er forankra i Bokn sin kommuneplan, skal vera levande og kunne bære frukter.

Prosjektet har eit langsiktig perspektiv med eit overordna mål om å gjera Bokn til ein stadig kjekkare plass å bu, og å få endå fleire til å flytta her. Eg opplever at både gruppemedlemmene, politikarar og andre boknarar har teke denne visjonen på alvor, fyrst og fremst gjennom dei positive tilbakemeldingane me har fått, men også gjennom det utruleg flotte engasjementet som er vist i dei tiltaka som er gjennomført.

Eg vil oppmoda alle boknarar til å kome med innspel til nye tiltak, engasjera seg i gjennomføringa av nye tiltak og elles, på ein positiv måte, støtta opp om dette viktige små-samfunnsprosjekt. Med dette som grunnlag trur eg me langt på veg skal kunne nå målsettinga i visjonen vår for Bokn. (Sjå også s. 4 - red.anm.)

Ordføraren

Februar 2009

Kjære sambygding

Tiltakspakke frå regjeringa
Regjeringa presenterte i veke fem ei tiltakspakke som har til formål å stimulera den økonomiske aktiviteten i kommunesektoren. Kommunane i Rogaland fekk 279,7 millionar kroner i vedlikehaldstilskot og 79, 8 millionar kroner i auka frie inntekter. Av dette fekk Bokn kommune 772 000 kroner, der 548 000 kroner er vedlikehaldstilskot og 224 000 kroner er frie inntekter. Eg er godt nøgd med beløpet, som blei fordelt etter innbyggjartalet, sjølv om eg hadde for-venta at krisepakka skulle vera endå større. Uansett er det positivt å få pengar, som ein ikkje har budsjettert med, i inngangen til eit nytt år.

Tilskotet er eit eìngangstilskot for 2009. Midla må brukast på prosjekt som blir sett i gang i 2009. Kommunane må utforma og dimen-sjonera tiltaka sine i tråd med denne føresetnaden, og i etterkant rapportera om bruken av tilskotet til fylkesmannen. Rådmannen vil utarbeida ei liste til formannskapet over prosjekt som harmonerar med føresetnadane til regjeringa, og så vil ein politisk foreta ei prioritering av konkrete vedlikehaldsprosjekt som skal gjennomførast i Bokn.

Kommunesektoren har med dette eit flott høve til å dra inn mykje av det etterslepet ein har når det gjeld ved-likehald av til dømes kommunal bygningsmasse. Sjølv om brorparten av den kommunale bygningsmassen i Bokn er av nyare dato, er det også hjå oss mange oppgåver å ta fatt i. Ved-likehaldsoppdraga vil ha positive effekter for sysselsettinga innan bygg og anleggsbransjen.

Tannlege
Frå nyttår blei Bokn dessverre utan tannlegetilbod, og det er uklart når me igjen får tannlege på Boknatun. Eg vil be om møte med Rogaland fylkes-kommune for å få ei avklaring på situasjonen. Det eg veit er at det er ein generell mangel på tannlegar i landet, og i denne samanhengen er distrikta ofte særs sårbare.

Inntil vidare vil det koma ein tannpleier til å ta seg av prioriterte grupper som til dømes barn. Elles vil det koma tannlege til Boknatun etter behov. Andre grupper er dessverre ikkje prioriterte.

Grasrotandelen
Regjeringspartia har i desse dagar vedteke ein såkalla ”grasrotandel”. Frå 1. mars 2009 kan alle som spelar hjå Norsk Tipping bestemma kva lag eller foreiningar i lokalmiljøet som skal motta inntil fem prosent av det beløpet som det blir spela for.
I denne samanhengen vil eg oppmoda lag og organisasjonar i Bokn til å melda seg inn i Frivillighetsregisteret slik at ein i neste omgang kan ta del i den nye ordninga. Alle som sender inn melding til Frivillighetsregistereret innan 1. februar er garantert å koma med i Grasrotandelen frå 1. mars under føre-setnad av at det er sendt inn korrekt informasjon og laget/foreininga er  kvalifisert for deltaking i ordninga.
Grasrotandelen går ikkje utover innsatsen eller premien, men kjem i tillegg til det ein spelar for. Føresetnaden er at laget eller foreininga er registrert i Frivillighetsregisteret. Grasrotandelen er tilgjengeleg i alle dei spelekanalane som Norsk Tipping har.

Ordføraren 

Desember 2008

Kjære sambygding

Budsjett
Budsjettet for 2009 blei vedteke i kommunestyremøte den 09.12.08 og var eit fellesforslag frå dei fire partia som er representerte i kommunestyret.

Det er, slik eg ser det, eit godt budsjett der ein fann rom for fleire nyinvesteringar. Me veit at Bokn i åra framover skal utreda fleire større, konstnadskrevjande prosjekt slik som til dømes nytt høgdebasseng på Vaulen, utbygging av skulen og barnehagen samt fleirbrukshall.

Dette har politikarane hatt i bak-hovudet, samt den usikre situasjonen i verdsøkonomien, når ein har jobba fram neste års budsjett. Difor har ein vist måtehald og ikkje latt seg friste til å gape over meir enn det som ein vurderar som forsvarleg.

Men av nye investeringar kan nemnast kr. 1.000.000 til nytt bårehus ved kyrkja, midler til asfaltering av kommunale vegar og området ved miljøstasjonen i Føresvik, samt kr. 200.000 til opprusting av areala rundt Føresvik indre hamn.

I tillegg er det satt av midler til trafikksikringstiltak i kommunen og det er løyvd midler til styrking av musikkskule/kulturskule frå og med hausten 2009.

I driftsbudsjettet er det lagt opp til ei rekkje mindre tiltak, mellom anna diverse nyinnkjøp  av interiør til skulen, nytt utstyr til gymnastikksalen, utvikling av uteområdet til barnehagen med innkjøp av fleire leikeapparat og nytt og breiare kinolerret i auditoriet, samt oppgradering av kinolyden. Sistnemnde tiltak vil gje kinopublikummet ei mykje betre kinooppleving.

Grunnlaget for den kommunale aktiviteten blir i hovudsak lagt i Stortinget gjennom Kommuneproposisjonen og Statsbudsjettet. Trass i konjuktur-nedgang på verdsbasis, har ein i Bokn framleis ein situasjon som inneber at ein opprettheld drifta i kommunen.

Finanskrisa har skapt usikkerheit i mange kommunar rundt nivået på skatteinntektene for 2009, og mange kommunar har i tillegg tapt pengar på grunnfondsbevis og aksjar. Av denne grunn har fleire rogalandskommunar redusert i drifta til neste år.

Det siste utspelet frå regjeringa inneber at kommunane likevel kan forutsei framtida betre ettersom eventuell
skattesvikt vil bli kompensert. Regjeringa legg opp til at sektoren vil bli kompensert viss skatteinntektene til kommunesektoren blir lågare enn anslått i budsjettet. Dermed kan kommunane likevel budsjettera ut frå føresetnadene som ligg i stats-budsjettet.

God jul
Det er berre få dagar til julaftan og denne perioden blir eit kjærkome avbrekk frå hektiske dagar for mange av oss. Me får høve til å ta ein ”time-out” frå dagleglivets pålegg og krav, og me kan senka skuldrene litt og lada opp batteria saman med familien.

I tillegg ”snur” sola den 21. desember og det går mot lysare tider. For mange trur eg vintersolvervet gjer ein mentalt betre rusta til å møte dei to vinter-månadene som står att. Men me har hatt ein fin haust med  mange flotte godvêrsdagar, slik at vintersolvervet tross alt ikkje var så ”påkrevd”. Men me får nå altså god anledning til å feira at dagane blir lengre.

Eg vil takka for året som har gått og ynskja alle lesarane våre ein god og fredfull jul og eit godt og innhaldsrikt nytt år.

Ordføraren

November 2008

Kjære sambygding

Fleirbrukshall
I samband med kommunesaman-slutningsprosessen som pågjekk i Bokn for eit par år sidan, blei det blåst liv i tanken om å bygga ein fleirbrukshall i kommunen. Ved ei eventuell samanslåing ville det bli løyd pengar til eit slikt prosjekt frå staten. Då det ikkje blei noko samanslutning mellom Bokn og Tysvær, blei desse planane lagt vekk.

Behovet for ein fleirbrukshall er likevel tilstades. I dag fungerar gymnastikksalen på skulen som kommunen si storstove og samfunnshus. Pågangen til å bruke desse lokala er til ei kvar tid stor, og frå tid til anna må aktivitetar avlysast.

Den hyppige bruken gjer at slitasjen på gymnastikksalen er stor. I tillegg kan ein koma i konflikt med brannforskrifta ved større arrangement.

Formannskapet innstilte i møte 18.11.08 ei prosjektgruppe som skal utarbeida eit forslag til bygging av ein fleirbrukshall i Bokn. Prosjektgruppa sitt mandat er å laga ein funksjons- og kvalitetsskildring, samt kostnads-overslag for anlegg og infrastruktur for ferdigstilling av ein fleirbrukshall innan 2012.

Prosjektgruppa skal utarbeida forslag til byggestad, kva type hall ein ynskjer å bygga, finansieringsplan, bruksområde og drift.

Eg har hatt inntrykk av at ein fleirbrukshall har stått høgt på ynskjelista til boknarane i mange år. Eg trur det er på tide å blåsa liv i desse planane igjen og jobba for at bygda får eit bygg som møter behova til dei ulike laga og organisasjonane og det øvrige kulturlivet i Bokn. Med ein slik hall vil ein bygga for framtida og gjera Bokn til ein endå meir attraktiv kommune å flytta til, samstundes som ein utvidar tilbodet til dei som bur i bygda.

Formannskapet er styringsgruppe i samband med prosjektet. Prosjektgruppa arbeidar på frivilleg basis. Saka skal til behandling i kommunestyret den 9. desember.

Julebordsesong
Me er allereie godt inne i julebord-sesongen og mange av oss skal setja av opp til fleire kveldar for å koma saman med gode kollegaer og venner og nyta god mat og drikke.

I ein hektisk kvardag er det ikkje alltid tid til å stikke innom nabokontoret for å ta ein drøs med arbeidskollegaene over ein kaffikopp. Men den uformelle, fem-minutts drøsen, har ein viktig sosial funksjon i ein jobbsamanheng; han fungerar som smøring i samfunnets maskineri og det fremjar trivsel på arbeidsplassen.

Julebordet blir difor ein arena der ein har høve til å ivareta delar av dette.
Det er likevel grunn til å minna om å vise omsyn i ein hektisk julebord-sesong. Det viser dessverre alle avisoppslaga i kjølvatnet av desse til-stelningane. Ein av ti har droppa sosiale tilstellingar på jobben, mellom anna julebord, fordi det blir drukke for mykje alkohol. Det kjem fram i ei ny undersøking som er gjort av Synnovate MMI for Sosial- og helsedirektoratet.
Det er viktig å ikkje satse på at alko-holen skal vere einaste underhaldninga på julebordet. Det må vere gode alkoholfrie alternativ: Somme vil ikkje ha alkohol, mange skal på jobben dagen etter eller dei som skal køyre heim eller heim til familien.

Kos deg på julabordet, det er vel fortent. Vis omsyn og la julebordet bli ei hyggeleg oppleving for alle.

Ordføraren 

Oktober 2008

Kjære sambygding

Kalender
I desember-utgåva av bygdabladet utfordra eg lesarane til å bidra med bilete frå Bokn til ”Boknakalenderen 2009”.
Resulatet ligg ved dette bladet i form av ein ny kalender med nye og spennande motiv frå Bokn. I tillegg har me hatt eit samarbeid med forfattar Kjetil Hamre, som i desse dagar gjev ut si andre diktsamling i bokform. Han har skrive to-vers dikt til kvar måned, med utgangspunkt i dei ulike motiva. Resultatet har blitt ”spretne” og artige dikt med god rytme og ein humoristisk snert.

Det er gjort nokre endringar i høve til 2009-kalenderen, og den viktigaste endringa er sjølve formatet. A3-formatet i neste års kalender gjer at bileta kjem meir til sin rett.
Det er flott at så mange fotografar har bidratt med sine beste motiv frå kommunen. Fjorårets utfordring står framleis ved lag; ta med deg fotoapparatet, gå ut i naturen og knips i veg. Er du dyktig, og litt heldig, kan du altså få biletet på trykk i Boknakalenderen 2010.

Finanskrise
Det er vanskeleg å ikkje ta inn over seg den globale finanskrisa som er omtala i dei fleste av landets medium, og mange boknarar lurar nok på om dette får noko betydning for drifta ved Bokn kommune. Til dette er det å seia at finansuroen i utgangspunktet ikkje får direkte konsekvensar for Bokn kommune. Dette skuldast fyrst og fremst at Bokn ikkje har bundet opp midler i aksjer og dermed ikkje står i fare for å tape finansinntekter. På kort sikt får Bokn kommune tvert i mot ein liten gevinst i form av høgare renter på innskot.

Det som kan bli eit problem for kommunane i Noreg på kort sikt, er å få innvilga lån av dei viktigaste bankkontaktane, slik som til dømes Kommunalbanken. Desse bankane hentar for tida inn kapital frå utlandet, men på grunn av kapitaltørke i utlandet får heller ikkje kommunane sine viktigaste bank-kontaktar tilgang til friske pengar. Dermed blir det reduksjon i byggeaktiviteten i kommunane, og større investerings-prosjekt blir inn til vidare lagt på is. Dette førar igjen til ei auke i arbeidsløysa.

Eg håpar at situasjonen normaliserar seg i løpet av eitt års tid, men dette er det umogleg å seia noko om i dag. Eg er likevel førebudd på at kommunane sin skatteinngang neste år kan bli kraftig svekka på grunn av dagens konjunkturendring.

Budsjett
I slutten av oktober hadde politikarane og administrasjonen den fyrste gjennomgangen av budsjettet for neste år. Kort fortalt blir det ikkje lagt opp til store investeringar i 2009, men det blir heller ingen reduksjon i den kommunale tenesteproduksjonen.

Som tidlegare nemnd har me i Bokn ein forholdsvis høg lånegjeld per innbyggjar, og dette gjer at det endå går ei stund før me kan legga opp til større investeringar i budsjetta. Sjølv om lånegjelda er på veg ned, gjer store kapitalutgifter at Bokn i ein del år framover vil slite med høge finanskostnader.

Ordføraren

September 2008

Kjære sambygding

Full bemanning
Bokn kommune er nå i den situasjonen at alle kommunale stillingar er besatt. I kommunal samanheng er dette ein ganske unik og gledeleg situasjon, og går på tvers av det biletet ein ser elles i landet.

Konsekvensen av den høgkonjukturperioden me har bak oss her til lands, var at både offentleg og privat sektor hadde problemer med å rekruttera kvalifisert personell til ledige stillingar. Dette er framleis kvardagen for dei fleste andre kommunane i fylket, sjølv om ein nå så smått ser endringar i kjølvatnet av rentehevingane den siste tida. 

Sjølv om situasjonen fort kan snu, kan me per i dag altså gleda oss over at me i Bokn har tilsatt dyktige medarbeidarar i alle seksjonane.

Kommuneplanrullering
Ein av dei viktige jobbane som skal gjerast denne perioden, er rullering av kommuneplanen for Bokn. Måndag 08.09.08 hadde kommunestyret oppstartsmøte der inviterte foredragshaldarar presenterte ulike infrastrukturprosjekt som vil få betydning, direkte og indirekte, for boknasamfunnet i tida framover.

Nå når det viktigaste styringsdokumentet for Bokn skal utarbeidast, må ein politisk og administrativt planlegga med utgangspunkt i etablering av både næringsparken i Gismarvik og næringsparken ved Hydro på Karmøy, som legg til rette for mange hundre nye arbeidsplassar i nærområdet vårt, oppstart av T-sambandet, som kortar ned reisetid- og avstand i regionen vår, samt Rogfast.

Bokn har med sin sentrale plassering, størst vekstpotensiale i regionen, både befolkningsmessig og økonomisk, i fylgje foredragshaldarane. Leiinga ved næringsparkane har som målsetjing at det innan 2020 skal investerast for 20 milliardar kroner. Med eit slikt utgangspunkt blir det ein spennande prosess for oss folkevalde å jobba fram eit dokument som skal seia noko om korleis Bokn skal sjå ut i framtida.

Planprosessen er open og difor er det også ynskjeleg at innbyggjarane kjem med innspel til oss politikarar, slik at kommuneplanen blir så utfyllande som mogleg.

TV-aksjonen 2008
Sundag 19. oktober er det klart for nok ein nasjonal dugnad i Noreg. NRK eig tv-aksjonen og NRK sitt innsamlingsråd tildelte i år tv-aksjonen til den diakonale felleskristne avhaldsorganisasjonen Blå Kors.
Aksjonen har som mål å hjelpa menneske som slit på grunn av eige eller andre sitt rusmisbruk, med særskilt fokus på barn. Pengane som kjem inn skal delast likt mellom prosjekt i Noreg og utlandet.

Eit døme her til lands er ”Barnas stasjon”. Dette er meint å vera ein trygg møtestad for barnefamiliar der barna skal stå i fokus. Barnas stasjon skal vera eit verkemiddel for at barn skal få høve til å veksa opp i eigen heim, og i eit trygt og godt nærmiljø.

Eg håpar flest mogleg meldar seg som bøssebærarar denne dagen, og eg vil samstundes oppmoda boknarane til å ta godt i mot dei frivillege og bidra til ei viktig sak.

Ordføraren

August 2008

Kjære sambygding

Kommuneundersøking
I ein nyleg publisert undersøking der Dagens Næringsliv har rangert kommunane etter kor gode dei er å bu i, kom Bokn på ein 145 plass. Når ein veit at det er 431 kommunar i Noreg, er ikkje Bokn sin rangering så aller verst.

Avisa har rangert kommunane etter fleire indikatorar, m.a. levestandard, sosiale tilhøve og tenestetilbod. Jamnt over var det småkommunane som kom best ut i kåringa. Dette er eit tankekors i høve til partia som tek til orde for kommune-samanslåing med tvang.

Likevel vil me i Bokn kommune i tida framover freista å bli ein endå betre, spesielt på dei forholda som me har direkte innverknad på.

Noregscup i Trial
Sundag 7. september arrangerar Pluggen motorklubb Noregscup i Trial på Torland. Dei siste åra har Pluggen opparbeidd seg god erfaring med å avvikla større løp i Bokn. Det er svært hyggeleg at Pluggen tek på seg slike arrangement då dette er eit flott høve til å marknadsføra og visa fram kommunen vår. 

Eg vil spesielt framheva alle dei engasjerte foreldra som utgjer eit solid støtteapparat for klubben, og som, saman med øvrige medlemmar, gjer ein stor innsats i samband med arrangementa.

Eg ser fram til mange spennande løp med utøvarar som vil gje publikum ei flott oppvisning i kombinasjonane balanse, koordinasjon og konsentrasjon. Spesielt kjekt blir det å fylgja våre lokale utøvarar gjennom dei ulike seksjonane.

Eg vil ynskja Pluggen lukke til med arrangementet og håpar flest mogleg, både boknarar og andre, tek med nistepakke og termos og legg turen til Torland denne dagen.

Snart haust
Sjølv om august er ein sommarmånad, ser me fleire teikn på at hausten nærmar seg. Etter ein flott sommar har kvardagen innhenta oss. Skulen har starta opp att, administrasjonen og det politiske livet har vakna til liv og me går inn i nokre arbeidskrevjande månader med m.a. budsjetthandsaming og kommuneplanarbeid.

Parallelt med dette arbeidet pågår det fleire andre prosjekt, slik som t.d. helseplanarbeid og Kjekt på Bokn.

Eg er å treffa på Boknatun dei fleste vekedagane. Tidvis er det mykje møteverksemd så det kan vera lurt å ta kontakt for å avtala tid viss du ynskjer å snakka med meg.

Ordføraren 

Juni 2008

Kjære sambygding

Kommuneproposisjonen
Den 15.05.08 la kommunaldepartementet fram kommuneproposisjonen med forslag til nytt inntektssystem for kommunane. Regjeringa har i sitt forslag lagt opp til at Bokn får behalda sitt regionaltilskot. Dette var svært gledeleg, og viktig, for vår kommune. Proposisjonen skal handsamast av Stortinget den 15. juni, og eg har god tru på at det nye inntektssystemet vil bli vedteke her.

Folketalsutviklinga for Bokn har i 2006 og 2007 vore svært god, og dette håpar eg også skal slå positivt ut i høve til regjeringa sitt forslag om eit såkalla vekstkommunetilskot.
I dag veit me ikkje sikkert korleis dette eventuelt kan slå ut for Bokn, men ut i frå dei prinsippa regjeringa legg til grunn for det nye tilskotet, er det grunn til å tru at Bokn kan få ein positiv, økonomisk effekt ut av folketalsauken i kommunen.
 
Ambulansen
I samband med trafikkulukka i Knarholmkrysset den 21.05.08, blei det gjennom media retta kritikk mot Helse Fonna då amk-sentralen lot vera å kalla ut Bokn-ambulansen til oppdraget. Bokn kommune hadde i etterkant kontakt med Helse Fonna for å få ei grunngjeving, og i denne samanhengen blei det, frå helseforetaket, gjeve uttrykk for at ambulansen skulle ha vore kalla ut og at det var ein menneskeleg feil som var årsaka til dette.

Eg trur Bokn-ambulansen er eit viktig tilbod for boknarane, og eit viktig bidrag til trafikktryggleiken i nærområdet vårt. I dei fleste situasjonar der det er aktuelt å kalla ut ambulanse, handlar det som regel alltid om minuttar og sekundar. Difor er det trygt å vite at me har høve til å få pasientane frå Bokn raskt i transport mot Haugesund.

Bokn kommune brukar til dels mykje ressursar på å halda ambulansen operativ, og difor er det avgjerande at han også blir brukt når han skal. Det er viktig for helsepersonellet å jamnleg få ulike oppdrag slik at ein kan opparbeida seg erfaring. Bokn kommune har eit svært godt samarbeid med Helse Fonna, og eg tek forklaringa deira til etterretning og ser på dette som ei enkeltståande hending.

Skytebane
Bokn skyttarlag har i fleire år systematisk arbeidd for å få realisert ein ny skytebane på Gunnarstad ved m.a. å setta av kommunale kulturmidler og andre inntekter. Formannskapet gjorde i møte 10.06.08 vedtak om å løyva 150.000 kr. til dette prosjektet. I tillegg har Rogaland fylkeskommune løyva 150.000 kr. til det same føremålet.

Dermed er skyttarlaget nær ein full finansiering av eit anlegg som vil bety mykje for framtidsutsiktene for dette idretts-laget. Ein slik skytebane vil også bli ei viktig brikke i å sikre breidda i eit allereie mangfaldig fritidstilbod i Bokn.

Sommarferie
Me er allereie godt inni den fyrste sommarmånaden og folk flest er i ferd med å kome i feriemodus. Nokre skal reise vekk, mens andre satsar på Bokn-ferie. Uansett kva planar den enkelte lesar har, håpar eg at ferien vil innehalda ein del av dei ingrediensane som er synonymt for omgrepet ferie, nemleg sol, restitusjon, familie, sjø, reiseradio, makrell, is og optimisme. Får me ein repetisjon av sommaren 2006, trur eg uansett dette går i boks.

Eg vil ynskja alle leserane ein sol- og innhaldsrik sommar 2008!

Ordføraren 

Mai 2008

Kjære sambygding

Sørheimutvalet
Onsdag 16.0.08 var eg og rådmann Jan Erik Nygaard i møte med kommunalministar Magnhild Meltveit Kleppa i kommunaldepartementet og drøfta Sørheimutvalet si innstilling til nytt inntektssystem for kommunane. I tillegg hadde eg med meg ordførar og rådmenn frå Kvitsøy og Utsira, samt tre Stortingsrepresentantar og Kjetil Lie frå Telemarksforskning.

I møtet fekk me høve til å seia noko om framtidsutsiktene for desse tre kommunane, og kva utslag me meinar at Sørheimutvalet si innstilling vil gje. Kommunalministaren kunne naturleg nok ikke gje lovnadar i møtet, men det viktigaste for oss var å presentera utfordringane våre ved ei endring av inntektssystemet for kommunane.

I tillegg fekk Kjetil Lie frå Telemarksforskning høve til å gå gjennom forslaget om småkommunetilskotet, som er meint å vera ein kompensasjon for bortfall av regionaltilskotet. Sakshandsamarar frå embedsverket var også tilstades på møtet, og fekk høve til å setja seg grundig inn i modellen. Kommunalministaren fortalde meg dagen etter møtet at embedsverket hadde teke med seg notatene frå møtet og jobba utover kvelden med modellen vår.

Problemstillinga til Bokn er etterkvart godt kjent både blant stortingspolitikarar, i kommunaldepartementet og i embedsverket. Ved å halda trykket oppe i denne saka, håpar eg at Bokn ved neste korsveg får ei løysing som gjer at me kan oppretthalda det kommunale tenestetilbodet på dagens nivå. Bodskapet mitt til kommunalministaren er at Bokn ikkje har råd til å tapa ei einaste krone ved ei endring av inntektssystemet til kommunane. Saka er til handsaming i departementet og regjeringa nå, og den 15. mai skal regjeringa kome med sitt syn i saka. Me får håpa me nådde fram med bodskapet vårt i saka.

Kjekt på Bokn
Kommunestyret vedtok den 15.04.08 at prosjektet Kjekt på Bokn blir vidareført i samsvar med vedtak gjort i forrige kommunestyreperiode. Slik eg ser det er dette eit stort og viktig prosjekt i bygda då føremålet er å gjera Bokn til ein betre stad å bu for eksisterande og komande innbyggjarar.

Konkret blir det nå m.a. jobba med å opparbeida sti til Hognahåve. Det er bestilt gjerdeklyvarar, bord og benkar til traséen, samt skilt i henhold til skiltplanen for området. I tillegg blir det nå også jobba for å få på plass eit utkikkstårn på Boknafjellet.

Bokn kommune fekk god uttelling på RUP-søknadane sine (Regionalt utviklingsprosjekt), og fekk løyva tilsaman 275 000 kr. til prosjektet. Med kommunestyrevedtak og friske midler trur eg at dette er med og blåsa liv i eit spennande prosjekt, og eg håpar at det positive engasjementet ein opplevde både hjå folkevalde og boknarar flest i forrige kommunestyreperiode, vil halda fram i tida framover. 

Ordføraren

April 2008

Kjære sambygding

Næringsfond
Bokn kommune er i ferd med å bygga opp det kommunale næringsfondet, og i byrjinga av april blei fondet tilført 200.000 kroner frå Rogaland fylkeskommune. Det er ti år sidan Bokn sist hadde eit slikt fond. Den gangen fekk kommunen jamnleg påfyll frå kommunaldepartementet. Formannskapet skal forvalta næringsfondet, medan nye ved-tekter og retningslinjer for fondet skal godkjennast av kommunestyret

Bokn kommune ynskjer å stimulera til vekst på sterke område i sitt næringsarbeid, samstundes som ein skal vera med å legga grunnlag for knoppskyting.
Med eit næringsfond har ein høve til ivareta ein del av desse hensyna, m.a. ved å kunne løyva midler til t.d. produktutvikling, kompetanseutvikling og opplæring i verksemda. EØS-reglar legg ein del avgrensingar i høve til at ingen verksemder direkte skal subsidierast, men ein skal kunne løyva midler i mindre målestokk.

Breiband
Fredag 04.04.08 blei det klart at Telenor får anbudet på utbygging av breiband i Bokn. Dette vil seia at dei områda i Bokn som ikkje har breibandsdekning i dag, slik som t.d. Jøsen/Loden-området, vil bli knytt til nettet. Telenor har forplikta seg til å bygga ut breibandet i kommunen innan seks månader frå anbudet blei tildelt. Oppstartsdato er ikkje fastsatt, men utbygginga skal vera ferdigstilt innan utgangen av oktober dette året.

Det er frå før av satt av 100.000 kr. i kommunal eigenandel til føremålet. Summen var basert på ein stipulert kostnad frå den gangen prosjektgruppa gjekk i gang. Det er hyggeleg å kunne konstatera at eigenandelen er blitt kraftig redusert etter kvart som prosjektgruppa har jobba med saka. Endeleg eigenandel for Bokn kommune ser ut til å enda på om lag 24.000 kr.

Skulle det visa seg at einskilte husstandar likevel ikkje blir knytt til breibandet etter ferdigstilling, vil desse bli teke med i eit eige ”oppsamlingsheat”. Dermed skal heile Bokn etterkvart bli knytt opp til breibandet.

Rådmann Jan Erik Nygaard har vore Bokn kommune sin representant i prosjektgruppa, som har jobba på vegne av kommunane i Haugesundsregionen. Eg vil gratulera prosjektgruppa med eit vel utført arbeid.

Fysioterapi
For å styrka fysioterapitilbodet i Bokn blei det i formannskapet 01.04.08 løyvd 30.000 kr. til innkjøp av laserapparat. Apparatet skal brukast i behandling av muskel- og skjelettplager samt reumatisme. Saman med dei behandlingsformane som fysioterapeuten allereie gjev, vil ein kunne oppnå ein auka effekt i eksisterande behandlingsforløp, og ein vil meir effektivt kunne behandla lidingar og plager som ein i dag
ikkje kan.

Det er mange som brukar det fysioterapeutiske behandlingstilbodet i kommunen, og det er hyggeleg å kunne styrka dette tilbodet. Eg håpar dette vil kunne gje behandlings- og helsemessige gevinstar, noko som også kan vera med og redusera sjukefråveret i samfunnet.

Ordføraren 

Mars 2008

Kjære sambygding

Folketalet
Folketalsstatistikken for Bokn visar at per 01.01.08 er me 823 innbyggjarar i kommunen. Dette er ein auke på heile 30 personar frå 01.01.07. På landsbasis ligg me på fjerde plass over dei kommunane som har hatt prosentvis størst auke i folketalet, med solide 3,78%. Dette er svært gode og, ikkje minst, viktige, tal for Bokn.

Det er viktig for Bokn å ha ein viss auke i talet på innbyggjarar framover, ikkje berre i høve til dei økonomiske effektene dette gjev kommunen, men også for det reproduktivitetspotensialet som naturleg fylgjer av at boknarane blir fleire.

I tillegg må det nemnast at utsiktene for Bokn til å styrka posisjonen som eigen kommune aukar med kvar person som er folkeregistrert i bygda. Dette var som kjent eit vesentleg moment i Telemarksforskning sin utredning i samband med kommunesamansluttingsprosessen for eit par år sidan.

Framskrivingane for Bokn den gang viste ein jamn nedgang i åra framover. Men marginane er også små all den tid Bokn faktisk er ein av landets minste kommune. Så snart ein barnerik familie meldar utflytting, vil dette gje til dels store utslag på statistikkane våre. Likevel må me gleda oss over den utvikla som faktisk skjer nå med tanke på folketalet i Bokn.

Administrasjonen
Per 01.03.08 er det igjen full bemanning i administrasjonen vår. Dei siste to-tre åra har ein administrativt, av ulike grunnar, mangla dei ressursene som gjev ein optimal tenesteproduksjon i kommunen. Ut over vintaren har brikkene byrja å falle på plass, og den 03.03.08 tok Tore Bøe Olsen til med arbeidet som ny seksjonsjef for helse, sosial og barnevern. I tillegg er leiar for seksjon teknisk tilbake i full jobb, og den nye kommunelegen har for lengst teke i bruk legekontoret og har i inngangen til denne månaden teke i mot dei fyrste pasientane. I denne samanhengen vil eg oppmoda boknarane til å vurdera å føra opp Dag-Helge Rønnevik som sin fastlege.

Næringslivet
Kommunen har det siste kvartalet gjennomført møter med dei viktigaste næringslivsaktørane i bygda, HighComp/Bokn Plast, GriegSeafood, Bokn Sjøservice og Coop Bokn.

Samtlege meldar om vekst og høg verdiskapning og planar om utviding av verksemdene i Bokn. HighComp er allereie i gang med å planera ut området sør for eksisterande hall i
Føresvik. Etter planen skal det setjast opp ny produksjonshall i dette området. Grieg Seafood har også planar om nye utbyggingar i Trosnavåg og planlegg elles ein auke i produksjonskapasiteten ved sine smoltanlegg i kommunen.

Bokn Sjøservice har fulle ordrebøker og aukar aktiviteten i Knarholmen og Krovågen, og Coop Bokn hadde ei fin omsetnadsauke i 2007 og vil også i løpet av dette året renovera og oppgradera butikken i Føresvik. Eg gler meg stort over desse tilbakemeldingane då dette gjev viktige synergieffektar i bygda, slik som t.d. fleire arbeidsplassar og nye oppdrag for lokale underleverandørar.

Ordføraren  

Februar 2008

Kjære sambygding

Turgåarar
2124 personar har i 2007 skrive seg inn i gjesteboka på toppen av Boknafjellet, og tradisjonen tru har me trekt ut to vinnarar av eit krus frå Bokn kommune. Denne gong blei det Gabriel N. Hetland og Kristin A. Eide. Me gratulerer!

Stavanger08
Opninga av Stavanger som kulturhovudstad fann stad laurdag 12.01.08. Bortimot 60 000 menneske hadde funne vegen til Stavanger sentrum denne januar-dagen for å få med seg den storslagne opninga av kulturhovudstaden.

Bokn var representert i gateparaden og viste godt igjen med flotte fargar, kostymar og musikk. Eg vil retta ein stor takk til alle som stilte opp og bidrog til at Bokn blei marknadsført på ein framifrå måte.
 
Midtskyssen
Regjeringa har fastsett at det skal innførast fem
ekstra veketimar undervisning i skulane frå 01.08.08. Som fylgje av dette blei fag- og timefordelinga for småskulesteget justert i formannskapsmøtet den 05.02.08.
Vedtaket får ikkje innverknad på dagens midtskyssordning. Dette vil seia at dagens ordning med midtskyss to av dagane i veka held fram, i tillegg til vanleg skuleskyss.

Sørheimutvalet 
Den 28.01.08 var høyringsfristen for Sørheimutvalets forslag til nytt inntektssystem. Administrasjonen vår har jobba godt og effektivt i denne saka, samstundes som ein politisk har markert problemstillinga inn mot departementet og partia.

Bokn har jobba tett opp mot kommunane Utsira og Kvitsøy, som har samanfallande problemstillingar som Bokn. I tillegg blei Telemarksforskning engasjert til å utreda konsekvensane for desse tre kommunane.

Bokn har i denne samanhengen lansert eit forslag om ein småkommunemodell – ein modell som skal gjelda kommunar med færre enn 2000 innbyggjarar. Desse kommunane skal etter denne modellen ha ein kompensasjon ved eit eventuelt bortfall av m.a. skjønnsmidler og regionaltilskot.

Formannskapet ga i høyringsuttalen elles uttrykk for at ein er sterkt kritisk til Sørheimutvalet sitt forslag til endring i inntektssystemet – ei endring som vil få store, utilsikta og uføresette verknadar for små-kommunar som Bokn.

I tida framover kjem eg og ordførarane i Utsira og Kvitsøy til å markera saka både opp mot eigne parti, stortingspolitikarar og departementet. Me har også bedt om eit felles møte med kommunalminister Magnhild Meltveit Kleppa.

Biblioteket
I desse dagar er det fem år sidan Bokn bibliotek flytta inn i nye og tidsriktige lokale i Føresvik. Biblioteket blir flittig brukt av både store og små, og dette visar igjen på statistikken. Bokn ligg på utlånstoppen i fylket, berre slått av Utsira, med om lag 14 utlån per innbyggjar.

Dette visar at biblioteket etterkvart har blitt ein viktig møtestad og kulturarena i kommunen. Eg vil oppmoda endå fleire boknarar til å ta i bruk biblioteket vårt, anten det er for å ta ein drøs over ein kaffikopp eller det er for å låna Hélène Cixous siste roman. Begge delar er gratis.

Ordføraren 

Desember 2007

Kjære sambygding

Kvart år etterspør fleire kalender med motiv frå Bokn, og med denne utgåva av Bygdabladet ligg det vedlagt ein slik kalender – ”Boknakalendaren 2008”.
Kalendaren er ei gåve til alle abonnentane våre og inneheld både nye og gamle motiv frå Bokn, med litt tekst knytt til kvart motiv. Kalendaren ligg også for sal på servicetorget. Ein har eit ynskje om å gje ut ein slik kalender kvart år, til glede for alle som har ei tilkytning til, eller forhold til, kommunen. Utfordringa til alle lesarane våre er å bidra med bileter til 2009-kalendaren. Det er nok av flotte motiv å velga frå kommunen vår, og ein står fritt til å knipsa det ein måtte ynskja.

Budsjett
Desember er budsjett-månaden i dei fleste kommunar, og kommunestyret i Bokn handsama og vedtok budsjett for 2008 tysdag 18.12.07. Budsjettet som er vedteke er stramt, det er m.a. ikkje lagt opp til større investeringsprosjekt i 2007, dette som fylgje av at kommunen har høg lånegjeld, om lag 42 millionar kroner per oktober 07. Det er løyvt midler m.a. til utviding av barnehagekapasiteten, oppstart av bygdeboka og til gjennomføring av IKT-planen for skulen, for å nemna noko.

I forhold til budsjett for 2007 er auken i frie inntekter for Bokn i 2008 berekna til om lag 2,4 millionar kroner, eller om lag 6,9 %. Til samanlikning er den samla, nominelle veksten for dei andre Rogalands-kommunane 4,2 %.

Kriminalstatistikk
Formannskapet hadde besøk av den nye politimeistaren i distriktet, Kaare Songstad, tysdag 11.12.07. Han har fungert som politimeister i om lag eitt år og har i haust besøkt alle kommunane i politidistriktet. Saman med lensmannen i Tysvær, Racin Tjøsvoll og politistasjonssjef Johan Sortland, ga han ei orientering om kriminalitetsbiletet i Bokn.

I løpet av 2007 blei det registrert 45 kriminelle forhold i kommunen, halvparten av desse var trafikklovbrot, for det meste fartsbrot med førarkortbeslag på E39. Resten av lovbrota fordelte seg på m.a. innbrot og nokre tilfelle av grove tjuveri. Med andre ord har ein ikkje noko omfattande kriminalitetsbilete i Bokn.

I distriktet elles har det vore ein generell nedgang i kriminaliteten og dette skuldast, i fylgje politimeistaren, gode tider i det norske samfunnet – ”heleribransjen” har mista grep pga. folk flest ikkje kjøper tjuvegods sidan varene innan dette segmentet er billege og lønningane høge.

God jul
Julehøgtida står for døra og for dei fleste blir dette eit viktig avbrekk frå tidsklemma som mange føler på kroppen i form av tidsfrister som skal overhaldast, jobb, levering av barn i barnehage, innkjøp, planlegging av middag, fotballtrening og mykje meir. Bruk julehøgtida til det ho er meint for; legg vekk eventuelle bekymringar, kos deg med familien og dei som betyr noko for deg, slapp av og la julefreden synke inn over deg. Gled deg over at sola snur den 22. desember – det går mot lysare tider!

Eg vil ynskja alle lesarane våre ei god og fredeleg jul og eit godt nytt år.

Ordføraren 

November 2007

Kjære sambygding

Tala for 3. kvartal viser at Bokn framleis har ei auke i folketalet. Auken ligg på vel 2,5 prosent og gjer at innbyggjartalet i kommunen per 15.11.07 var på 813 personar. I løpet av heile 2007 har me hatt ei auke på totalt 20 personar, og dette er svært gledeleg. Me har likevel ei utfordring med å skaffa nok bustadar til alle innflyttarane. For tida er det nesten ikkje husvere å oppdriva i Bokn, verken for sal eller utleige.

Ein ynskjer ikkje å koma i ein situasjon der det er mangel på bustader som stoppar den positive utviklinga i folketalet. Prosessen med å leggja til rette for ei utviding av byggjefeltet i mellom anna Fyrvegen, har difor prioritet, både politisk og administrativt.

Seksjon teknisk
På grunn av sjukdom, permisjonar og vakanser i seksjon teknisk, er sakshandsamingstida noko lengre enn vanleg. I tillegg kan det til tider vera vanskeleg å få kontakt med saksansvarleg på
telefon eller ved oppmøte. Ein ber brukarane ha forståing for dette. Ein håpar situasjonen i seksjon teknisk vil betre seg utover vinteren 2008.

I tillegg er kulturkontoret ubemanna ut året på grunn av sjukdom. Dette medfører mellom anna at kommunen si nettside ikkje har same frekvensen på oppdateringar som tidlegare. 

Sørheim-utvalet
Som kjent har det regjeringsoppnemnde utvalet, det såkalla Sørheim-utvalet, lagt fram ei innstilling med forslag til endringar av overføringssystemet til kommunane. Den fyrste oversikten
viste at Bokn var den kommunen i landet som kom dårlegast ut.

I november tok me kontakt med kommunar som har samanfallande problemstilling som Bokn, mellom anna Utsira og Kvitsøy, for å sjå litt på kva strategi ein må leggja opp til for å vinna fram med vår argumentasjon i saka. Vidare vil me engasjera eksterne konsulentar for å utreda konsekvensane for Bokn kommune ved eit eventuelt bortfall av regionaltilskotet. Eg vil også be om eit møte med kommunalminister Magnhild Meltveit Kleppa (SP) på nyåret for ein dialog rundt dette temaet.

Kyrre  

Oktober 2007

Kjære sambygding!

Siden forrige utgåve av Bygdabladet har me i Bokn gjennomført kommune- og fylkestingsval og konsti-tuert eit nytt kommunestyre for dei neste fire åra. I den samanhengen blei eg vald til ny ordførar. Eg vil nytta høve til å takka boknarane for tilliten. Det er med stor motivasjon eg tek fatt på denne viktige jobben.

Læringskurven er nok forholdsvis bratt, men eg ser fram til å veksa inn i rolla. Oktober har elles vore prega av at heile regionen har levd i eit ”politisk vakum” der dei politiske vedtaka har uteblitt i påvente av at lokaldemokratiet skal opp å gå att med nye folkevalde.

Unge politikarar
Bokn har etter valet fått eit kommunestyre med regionens lågaste gjennomsnittsalder på representantane. I tillegg har me fått eit fullstendig skifte av formannskapet og nye andlet i dei fleste utvala. Kommunestyret er breidt samansett både når det gjeld kjønn, alder og profesjon, samstundes som me har fått med oss politikarar som har vore med tidlegare. Sistnemnde representerar kontinuiteten i kommunestyret og er viktige aktørar i den politiske prosessen.

Avslutning
Tysdag 23.10.07 inviterte kommunen til middag på Sjøhuset i Alvestadkroken for å markera avslutninga for det avgåtte kommunestyret og opninga av det nye kommunestyret.

Dette var også kvelden for å takka av Svein Ove Alvestad for den jobben han har gjort som ordførar i kommunen dei siste åtte åra. Eg hadde også gleda av å dela ut Kommunenes Sentralforbund sin heiders-medalje til Sigurd Johnny Svendsen og Sigmund Alvestad, som kvar har stilt opp for fellesskapet i 24 år.

Lege
Når det gjeld situasjonen i helsesektoren, jobbar administrasjonen i desse dagar med å få på plass m.a. ny kommunelege og seksjonsjef for seksjon helse, sosial og barnevern. Det har blitt gjennomført intervju av aktuelle søkjarar, men p.t. er ikkje noko avklart. Meir informasjon fylgjer i neste utgåve av Bygdabladet. Bokn tannklinikk opnar igjen tysdag 20. november etter å ha vore stengt ein lengre periode.

Sørheimutvalet
Fredag 26.10 la inntektssystemutvalet, det såkalla Sørheim-utvalet, fram si innstilling med forslag til endringar av overføringssystemet til kommunane. Eit av forslaga går ut på å endra prosentsatsen i jamningsmodellen frå dagens 55 % til 60%. Dette betyr at rike kommunar blir fråteken fem prosent meir av sine inntekter over gjennomsnittet, enn tidlegare. Ei førebels utrekning visar at Bokn kan bli ein av dei kommunane i landet som tapar mest på ei slik om-legging.

Eg og rådmannen kjem til å gå grundigare gjennom denne innstillinga for å avdekka betre kva utslag dette vil få for Bokn. Det kjem meir informasjon om saka i neste utgåve av Bygdabladet.

Svein Ove Alvestad:

September 2007

Reguleringsplanen for Rogfast
Kommunestyret har i sitt siste møte gitt ein uttale til reguleringsplanen for Rogfast. Synlige inngrep ved Rogfast er små, då tunnelopningane blir i nærheten av dagens oppstillingsplass.

Men det som er ei problemstilling er at der ikkje ligg inne av- og påkjørsel på Are. Kommunestyret vil ha det, og ber om å få det utreda. Så får det arbeidet visa om det lar seg gjennomføre trafikksikkerhetsmessig og arealmessig. Utbedring av krysset i Knarholmen ligg nå inne i prosjektet. Kommunestyret viser og til ein rapport om trafikk-sikkerheten på E39, samt støyplager, og ber om at det blir utbedra i prosjektet.

Kommunestyret skal endelig godkjenne reguleringsplanen i eit møte i november.

Kjekt på Bokn
Kommunestyret har nå vedtatt ein plan for framdrift av prosjektet Kjekt på Bokn. Planen er delt inn i kortsiktige og langsiktige tiltak. Av dei tiltaka ein jobbar mest med nå er å få fiksa opp avkjørselen til E39, ferdigstilling av nær-miljøanlegget ved Fyren, bruk av Boknafjellet og mange mindre tiltak som vil auke trivselen på Bokn.

Arbeidsgruppene som er nedsette får eit viktig ansvar med å utvikle og gjennomføre tiltaka. Det er derfor viktig at det store engasjementet som har vore held fram, noko eg har stor tru på.

Reguleringsplanen for Føresvik er nå godkjent etter at kommunestyret ga etter for innsigelsen frå Fylkesmannen om at ca. 25 meter strandlinje på Hviding sin eigendom skal regulerast til friområde og ikkje til naust. Det er ufatteleg at ein skal bruke så mykje tid og ressursar på ein så liten sak, når Bokn i tillegg har milevis med uberørt standlinje. Det er og min påstand at Fylkesmannen er med på å hindre ei god utvikling på Bokn.

Takk for meg
Etter åtte år som ordførar er det slutt for min del. Det har vore åtte år med mykje arbeid og mange spennande oppdrag. Eg føler sjølv at me har klart å sette Bokn på kartet og fått fram vårt syn.

Perioden har vore prega av både oppturar og nedturar, men det er svært godt å overlate ein kommune i vekst med god kontroll over økonomien og eit svært godt utbygd kommunalt servicetilbod til eit nytt kommunestyre. 

Dei siste to, tre åra skulle eg gjerne deltatt meir blant lag og organisasjonar og vore meir involvert og “på hugget” i fleire saker, men eg blei dessverre fråtatt den muligheten, og det vil eg beklage overfor dykk som valgte meg.

Så vil eg gratulere Kyrre med eit godt val og ønske han lykke til som ny ordførar, slik det ser ut i skrivande stund, og håpar at han får mulighet til å gjere den jobben som me forventar og som blir kravd for at Bokn skal bli høyrt ut i den store verda.

Det har vore kjekt og givande å få gjere ein slik jobb for Boknasamfunnet, og til slutt vil eg takke for meg.

Svein Ove  

August 2007

Vel overstått sommar. Véret har ikkje vore det beste, men me får håpe at sola dukker opp når skulen startar opp og at hausten blir fin.

Sommaren er ei rolig tid i kommunen og prega av ferieavvikling. Eg får håpe at kommunen likevel har klart å yte den service som blir forventa av dykk.

Vanskeleg arbeidsmarknad
Kommunen opplever nå eit problem med å skaffe fagfolk til fleire stillingar. Det arbeidast kontinuerlig med ny rekruttering i ein vanskeleg arbeidsmarknad, og i tillegg må kommunen satse endå meir på vidare-utdanning av eksisterande arbeidskraft for å kunne ha ein tilfredstillande kompetanse.

Dette kan medføre at kommunen kan få problem med å yte den service og hjelp som trengst. Det vil og bety ei auka belastning på dei som er på jobb.

Eg ber om litt forståing for dette og eg kan forsikre dykk om at dei tilsette gjer det dei kan, og meir til, for at me skal merke dette minst mulig. For dei tilsette og oss innbyggarar blir situasjonen betre når kommunen har fått fleire tilsette i ledige stillingar.

Vinn-vinn situasjon
Kommunen foretar ei ombygging av sine lokaler. Kommune, NAV, og SR-Bank skal samlokalisera fleire av sine tenester.

Bakgrunn for denne endringa er at SR-Bank ville redusere opningstida til 2 dagar og arbeidet med å etablere NAV-kontor i alle kommunar.

Arbeidet enda då ut i at kommunen, NAV og SR-Bank inngår i eit unikt samarbeid. Det vil medføre betre tilgjenge til sentrale tenester for oss som innbyggarar og betre bruk av personalressursar.

Me får ein vinn-vinn situasjon der kommunen vil få meir ressursar til service for oss innbyggarar, betre tilgjenge og samarbeid for NAV og sosialtenesta og banken får 5 dagar opningstid.

Val 2007
Det nærmar seg nå kommuneval og det er viktig for demokratiet at flest mulig går til valurnene og avgir sin stemme. Eg oppfordrar alle til å stemme den 10 september eller nytte muligheten til å forehands-røyste.

Godt val.                   

Svein Ove

Juni 2007

Møte med Bufetat
Som eg skreiv om i forrige bygdablad så skulle me ha møte med Bufetat om omlegginga av barnevernsarbeidet og konsekvensane for Boknasamfunnet: I tillegg blei der holdt eit folkemøte med bra oppmøte og engasjement.

Tilbakemeldinga til Bufetat frå innbyggjarar og politikarar er heilt klart, og det er at me ikkje ønsker nokon endring av drifta ved Bufellesskapa på Bokn. Styret ved Bufellesskapa er og innstilt på å fortsette som nå.

Det gjenstår nå å sjå kva som blir det endelige utfallet av denne saken. Mitt håp og ønske er at Bufetat viser forståing for Boknasamfunnet og velger å samarbeide med Bokn Bufellesskap som nå.

Rekneskap 2006
Rekneskapen for Bokn kommune 2006 er klart og vise eit udisponert overskudd på 3,7 mill kr. Svært høge skatteinntekter, auka regionaltilskudd og ein god og effektiv drift av kommune er hoved årsaker til dette rekord overskuddet. Overskuddet blir brukt til å styrke disposisjonsfondet med 2,4 mill kr, dekke underskudd for 2004 med 1 mill kr og 300 000,- til vedlikehold av kommunale vegar.

Eg vil takke alle tilsette for den gode innsatsen dei gjer for kommune og dermed for oss alle.

Styrking av pleie– og omsorgstenesta
Kommunestyre har og vedtatt å styrke pleie og omsorg med 1,8 årsverk ut året for å avlaste ein svært krevande situasjon. Fram til 31/12 vil ein ha ein gjennomgang av situasjonen for å komme fram til ein meir permanent ordning.

Midtskyss frå august 2007
Kostnaden ved midtskyss har auka kraftig til 260 000,- og der har vært ein diskusjon om den kan fortsette. Fleirtalet av foreldrene vil ta den vekk og ha 4 dagars uke for småskulen. Fleirtalet i kommunestyre ønsker å oppretthalde dagens ordning med 5 dagars uke og dermed midtskyss.

Reguleringsplan i Føresvik
Kommunen har vært i møte med fylkesmannen om innsigelse til reguleringsplan i Føresvik. Innsigelsen går på bruk av ca 30 meter strandlinje avsatt til naustformål kor fylkesmannen vil ha friområde. Kommunestyre ønsker å stå på forslaget som inneber at der skal avsettast arealer i strandsonen til naust formål.

Der vil nå bli formell mekling før saken eventuelt sendes til miljøverndepartementet for endelig behandling.

Rogfast
Vegvesenet arbeider med forslag til kommunedelplan for Rogfast og den vil komme ut til høyring nå i sommar. Der er to alternativ til løysning på Bokn, ein mot Arsvatnet før vegen går inn på E39 og ein ned mot sjøen før vegen går inn på E39. Det er ikkje dei store inngrepa men begge alternativa inneber at der ikkje blir avkjørsel til Are/Bokn her.

Forslaget inneber at krysset i Knarholmen skal byggast ut og ein må bruke gamle vegen for å komme til Are. Kommunestyret vil uttale seg om saka ved den ordinære høyringa seinare i haust.

Så får eg ønske alle ein kjempefin sommar.

Svein Ove

April 2007

Som alle er eg og prega av den tragiske dødsulykka på E39 der Leif G. Hansen omkom. Sjølv om den pregar oss alle så er det mest vondt for hans barn, barnebarn og resten av familien. Dei har vår djupaste medkjensle og omtanke og treng vår støtte i ei vanskeleg tid.

Tilfeldighetene ville det og slik at kommunestyret i møte den 24. april vedtok at det berre er ein ferjefri kryssing av Boknafjorden, Rogfast, som oppfyller krav om redusert reisetid og betre forutsigbarhet for trafikk over Boknafjorden.

Kommunen og Vegvesenet har i arbeidet med Rogfast fått utarbeida ein rapport om konsekvensar for trafikksituasjonen etter Rogfast. Konklusjonen er at trafikken vil auke endå meir og der er foreslått fleire utbetringar av vegen. Kommunen har allereie starta arbeidet med å få i gang utbetringar.
Det er og nærliggande å få vurdert midtskille på ein så sterkt ulykkesbelasta og trafikkert vegstrekning som E39 gjennom Bokn.

Barnehagen
Til barnehageopptaket nå i vår har der vore stor søknad og barnehagen er sprengt. Kommunestyret har derfor vedtatt ei midlertidig utviding av barnehagen for å gi eit tilbod til alle søkarane. Den midlertidige løysinga vil bli på skulen. Samtidig med dette er der eit arbeid på gong for å vurdera det framtidige barnehagetilbodet på Bokn. Det vil omfatte kapasitet og type tilbod, f.eks. friluftsbarnehage.

Førebyggande arbeid
Kommunestyret behandla og revidering av psykriatriplanen. Den vidarefører dagens tilbod med ei framtidig satsing på førebyggande arbeid blant barn og unge. Det er tenkt ved å opprette ein barne og ungdomsarbeidar i 50% stilling.

Bokn Bufellesskap
Barnevernsarbeidet er under omlegging, og det vil gjelda boknasamfunnet då me har Bokn Bufellesskap her. Eg føler at samarbeidet mellom Bufellesskapet, kommunen og lokalsamfunnet har godt greit til nå, sjølv om me i den seinare tid har følt at belastninga på lokalsamfunnet til tider har blitt for stort.

Ved ei større belastning fryktar både formannskapet og lokalbefolkninga at det blir for mykje for eit lite lokalsamfunn som Bokn, og ein frarår derfor Bokn Bufellesskap å ta i mot endå meir belasta ungdom. Eg er glad for at styret i Bokn Bufellesskap tok desse signala å sa nei til å ta imot endå meir belasta ungdom.

Styreleiar i bufellesskapa og eg er nå kalla inn til møte med Bufetat, Statens barnevern, for å drøfte situasjonen. Eg er usikker på kva staten vil gjere, men eg synest at Bokn har tatt ansvar og tatt sin del av det vanskelige barnevernsarbeidet til nå.

Til slutt vil eg ønske alle velkommen til årets tradisjonsrike 17. mai-feiring på Bokn.

Svein Ove

Mars 2007

Overskot
Som de kanskje har sett i avisene har kommunane i Norge gode overskot på rekneskapen for 2006. Sånn ser det ut for Bokn også. Bokn kommune vil gå med ca. 4 mill. kroner i overskot takka vere svært god skatteinngang og reduserte kostnader på drifta. Kommunestyret vil ta stilling til korleis pengane skal brukast.

”Kjekt på Bokn”
Kommunestyret har hatt ein foreløpig informasjon og behandling av prosjektet ”Kjekt på Bokn”. Under arbeidet i dei forskjellige gruppene har der komme opp mange gode og spennande idear for vidare utvikling av Bokn, og eg vil takke alle for arbeidet og ideane så langt.

Gruppene har delvis jobba med tiltak innan same tema og innan same område og formannskapet og kommunestyre såg det derfor som nødvendig å sortera litt i oppgåver for gruppene. Resultatet blei at ei gruppe får i oppdrag å planlegge alle tiltak rundt Boknafjellet. Det arbeidet settes i gong med ein gong. Eit anna tiltak som blir sett i gong nå er å skisse opp korleis me vil at avkjørselen til Bokn frå E39 ved Knarholmen skal sjå ut.

Kommunestyret samla seg og om at nærmiljøanlegget på Fyren skal gjerast ferdig etter gjeldane planar, at all vidareutvikling av Føresvik blir samla i ei gruppe og at alle større tiltak som ny trailbane, museum, kultur- og idrettsbygg og badeanlegg skal vidareutviklast.

Dei tri arbeidsgruppene får kvar 50 000,- kr til å sette mindre tiltak, som skilting av turstiar, matkurs og førstehjelpskurs, ut i livet og til å arbeide vidare med enkelte idear.

Kommunestyret har valgt denne måten å gjere det på for å sleppe å vente på endeleg behandling av prosjektet og komme raskt i gong med konkrete tiltak.

Edderkopp
Etter kommunestyret si oppfatning vil det nå bli svært viktig å få på plass ein som kan vera ansvarleg for heile prosjektet. Prosjektet og framdrifta er avhengig av ein som kan samla alle trådane, syta for framdrift, skaffa økonomiske midlar til tiltaka og sikre at me får noko ut av dette prosjektet. Håpet er å ha på plass ein person som har ansvar for prosjektet til sommaren.

Eg har tru på at me skal få mykje ut av dette prosjektet som vil gjere det kjekt å virke på Bokn som innbyggjar, næringsmessig eller i fritida.

Svein Ove

Februar 2007

Sjølv om det er noko seint så vil eg ønske alle godt nytt år!

Ut på tur
Det er vanskeleg å få eksakt oversikt over antal tur-gåarar som har skrive seg opp i boka på Boknafjellet i 2006. Dette kjem av litt rot og feilføringar med tal, men tradisjonen tru har me trekt ut to vinnarar av eit krus frå Bokn kommune. Denne gong blei det Tobias Ytreland Øvrebø og Augustin Thuestad. Me gratulerer!
Det er gledeleg at mange tar turen til Bokn for å nyte utsikten og ta seg ein tur ut i friluft.

Tannlege og lege
Etter endeleg å ha fått tannlege på Bokn igjen var det svært skuffande og overraska at me rett etter nyttår fekk brev frå Fylkestannlegen om at han vil legga ned tannklinikken på Bokn, saman med tre andre. Det er to argument som blir brukte og det er økonomi og vanskar med å få tannlege til Bokn.

Me tok straks saka opp med Fylkestannlegen og fekk avtalt møte med han. På møtet kom me fram til ei løysning som sikrar tannlege ut 2007. Det er ei forutsetning at styret for Tannhelse Rogaland godkjenner løysinga.

Nå blir det arbeiddt mot Rogaland fylkeskommune for å sikra ordninga også etter 2007. Ein viktig føresetnad for å ha eit tannlegetilbod på Bokn er at der er tannlegar som vil arbeide her, og det vil nok bli den store utfordringa framover.

Når det gjeld legetilbodet ser det endå vanskeligare ut. Til nå har ein ikkje lykkast å få aktuelle søkarar til stillinga, men ein arbeider fortsatt, både innanlands og utanlands, for å få ei løysing. 
 
Positiv utvikling
Interessa for Bokn til etablering av bedrifter og busetting er større enn på lenge. Folketalsutviklinga for 3. kvartal viser ei positiv og fin utvikling, får håpe det også er tilfelle pr. 1/1. Det opplevde me og rundt år 2000, men då fekk me ein tildels kraftig tilbakegang etterpå, noko det kan sjå ut til at me kanskje ikkje skulle få nå.

Det er svært godt at Bokn opplever positiv utvikling nå når Norge og Rogaland går som det suser. Hadde me hatt ein tilbakegang eller stagnasjon i desse gode tidene hadde framtidsutsiktene vore mykje verre.

Den positive utviklinga viser at Bokn er blitt eit alternativ for folk som vil etablera seg med bustad eller bedrift. Bokn begynner å bli meir kjende, andre veit om oss og ser på Bokn som ein kjekk og god plass å bu. Det er gledeleg.

I og med at me har vore gjennom kommunesamanslåingsprosessen og nå arbeider godt med prosjektet ”Kjekt på Bokn”, og den positive utviklinga ellers i kommunen, føler eg at me har fått ein litt ny giv for Boknasamfunnet, kor me ser mange muligheter og vil få noko til å skje på Bokn.

Eit slikt engasjement er heilt nødvendig for små lokalsamfunn som Bokn i ei verd kor sentraliseringa går sin gang. Dette engasjementet gler meg og eg vil arbeide for at kommunen vil støtte opp om dette og ”smøre” arbeidet med dei ressursene kommunen har.

Eg ser fram til eit aktivt år.

Svein Ove

Desember 2006 

Budsjett 2007
Kommunestyret har nå vedtatt budsjettet for 2007. Alle partia var godt fornøgde med det framlagte budsjettet frå rådmannen, og det blei berre gjort små endringar på budsjettet utover rådmannen sitt forslag.

Debatten bar preg av stor einigheit og låg temperatur, men nokre endringar samla med oss om; Kr. 100.000,- i planleggingsmidlar til barnehagen og trafikksikringstiltak blei tatt ut og prosjektet ”Kjekt på Bokn” blei styrka med 100.000,- kr., tilskott til lag og organisasjonar blei auka med 30.000,- kr og det blei avsett 10.000,- kr. til ny varmvasstank på sjukestova.

Kommunestyret vil óg fikse opp og asfaltera ute-området ved Kyrkjebygd aktivitetshus og langs steingarden ved kyrkjegarden.

Dei kommunale avgiftene aukar med 3% med unntak av vassavgifta som aukar med 4%, noko som er lågare enn lønns- og prisauken.

I tillegg har kommunestyret bedt om ei sak på korleis ein best kan sikra nødstraum til Boknatun og ei sak om arbeidsmiljø og tiltak i kommunen.

Destinasjon Haugaland, regionen sitt reiselivsselskap, er vedtatt opphørt og eit nytt aksjeselskap er planlagt stifta 18/12 for å ein mykje sterkare og samlande satsing på reiseliv på Haugalandet. Bokn kommunestyre har vedtatt å være med på satsinga og går inn med 25.000,- kr.

Det var kjekt at dette kommunestyre, som vedtok sitt siste budsjett, kunne gjere det samrøystes. Etter min meining viser dette at det er stor einigheit om drifta og utviklinga til Bokn kommune, noko eg trur er svært viktig skal me lykkast i framtida.

Bokn kommunestyre vil vere med på eit samarbeidsprosjekt innan nærings- og bygdeutvikling saman med Fylkesmannen, innovasjon Norge Rogaland og kommunane på Haugalandet. Hovudarbeidsområda vil bli omstillinga og nye næringar innan landbruket.

Etter nye krav frå departementet må kommunen laga ein barnehageplan for å visa korleis mål om full barnehagedekning innan 2007 skal bli nådd.

Kommunestyret har vedtatt ein barnehageplan og ber rådmannen greie ut alternative løysingar for utviding av barnehagekapasiteten viss der blir behov for det. Det var og ein gjennomgang av opningstider og betalingssatsar sett opp mot kontantstønaden.
Kommunen fann ikkje nå å kunne endre på opnings-tider eller betalingssatsar, og det blir som før med ein endring av satsane frå 1/8-07.

Tilbakelagt stadium
Sjølv om året har vore prega av ueinigheit i kommunesamanslåingsdebatten føler eg det er eit tilbakelagt stadium og at alle ser framover og gjer det dei kan for ei god utvikling for lokalsamfunnet på Bokn. Utviklinga i folketalet ser positivt ut og me får arbeide for og håpe at det vil fortsette i 2007.

Med dette vil eg ønskje alle ei fredeleg og god jul og eit godt nyttår.

Svein Ove

November 2006

Rådmannen har lagt fram eit ekspansivt budsjett for 2007 med økonomiplan for 4 år.

Sjølv om kommunane har fått auka rammer frå staten gir det ikkje rom for store endringar av drifta. Bokn fekk auka overføringane med 1.910.000,- kr, noko som høyrest bra ut, men nesten 1.900.000,- går til lønsauke. I tillegg er der usikkerheit rundt pensjonskostnader, renteauke og ny sjukelønnsordning.

Det som er positivt er at eigedomsskatten vil auke i åra 2008 og framover p.g.a. gasskraftverket, og at lånegjelda vil minka.

Eigen lege
Av nye tiltak som er føreslått vil eg nemna at kommunen arbeidar med å få eigen lege, noko som vil komme til å koste mykje meir enn i dag, og rådmannen har satt av 450 000,- ekstra for å prøve og få lege og 200.000,- til legevaktsamarbeid.

Nye lærebøker og ikt-utstyr på skulen er og ei satsing med henholdsvis 150.000,- og 460.000,- kr. Der er og sett av 137.000,- kr. til oppgradering av gymsalen på skulen. Drift av kyrkja er og styrka med 107.000,-.

Kultursoge
Eg har og arbeiddt med å få ei finansiering av utgiving av kulturhistoria for Bokn og rådmannen har lagt inn 500.000,- kr. i økonomiplanen som kommunen sin del. Resten, ca 550.000,-, er tenkt finansiert med støtte frå næringsliv og enkeltpersonar. Allereie nå har me fått 100.000,- og signal om meir. Er det nokre som vil bidra er det berre å ta kontakt.

I investeringsbudsjettet er det og tatt med 600.000,- kr. til kjøp av nytt bustadfelt og 700.000,- til prosjektet ”Kjekt på Bokn”. Samla investeringar er på ca 2,8 mill kr. og tenkt finansiert ved bruk av fond. Etter mi meining er det eit godt budsjett som vidareføre den drift kommunen har i dag, men kanskje litt for ekspansivt. Politikarane vil nå gå gjennom budsjettet og komme med sine forslag til endringar. Det er mitt mål at alle parti blir einige om eit budsjett til behandling i kommunestyre den 12/12.

Svein Ove

Oktober 2006

I landstoppen
Først vil eg gratulera alle med eit fantastisk fint resultat på innsamlingsaksjonen. Bokn blei nest best i Rogaland og femte best i Norge med over 112,- kr pr. innbyggar. Dette viser at boknarane er eit raust folkeslag som bryr seg om andre. Det skal me vera stolte over.
Eg vil takke alle som var med og gjekk med bøsser, SR Bank som talde opp og ikkje minst elevar og lærarar på skulen som stelte til basar og fekk eit rekordresultat.           

Ordførarval
Kommunestyret har hatt møte og vedtatt at Bokn ikkje skal søke om å få delta i forsøk med direkte val av ordførar. Årsaka var at forsøket måtte skje på ein spesiell måte, val etter den såkalla preferansemodellen. Den innebere at me måtte stemma på to kandidatar, nr. 1 og nr. 2. Og viss ingen fekk over 50% la ein saman alle nr. 1 og nr. 2-stemmene på dei to kandidatane med flest stemmer for å kåre ordføraren.

Samtidig kom det fram i kommunestyret at i og med det som skjedde rundt nedsetting av ordførarstillingen til 50% er ikkje partia klar til å avgjere dette spørsmålet nå.

Haugaland interkommunale miljøverk (HIM)
Kommunestyret vedtok og at Bokn blir med i Haugaland interkommunale miljøverk IKS saman med Haugesund, Tysvær, Etne og Vindafjord. Karmøy blei ikkje med.

Ambulerande skjenkeløyve
Kommunestyret oppretta også  to ambulerande skjenkeløyve for øl og vin til lukka lag. Det betyr at lag og organisasjonar kan arrangera t.d. årsfestar og bryllup med øl eller vin til maten.

Ny beredskapsplan til bruk ved større ulykker og katastrofar blei også vedtatt. Får håpe me ikkje får bruk for den.

”Kjekt på Bokn”
Under prosjektet ”Kjekt på Bokn” er fleire arbeidsgrupper i gong for å komme med gode tiltak som kan gjennomførast for å betre trivselen på Bokn.
Mange spennande tankar blir lufta og arbeidet vil munna ut i nokre prioriterte tiltak.

Det blir viktig å få satt fleire av tiltaka ut i livet snart, slik at det blir resultat av arbeidet og ein kan arbeida vidare med nye tiltak. Engasjementet er godt og det lover godt for eit vellukka arbeid som vil gjere det gode liv på Bokn betre.

Svein Ove

September 2006 

Hei!

Boknarane skal fortsett styre i eigen kommune, var det klare svar boknarane gav i folkerøystinga om Bokn og Tysvær skulle slå seg saman. Boknarane har det svært godt og vil styre eigen kommune er min konklusjon på resultatet.

Eg har stor respekt for denne avgjersla og vil sjølvsagt følgje den opp og fortsette arbeide for å få ein god utvikling for Bokn framover.

Me er alle opptatt av at Bokn skal vere ein god plass å bu, drive næring eller bruke fritida, men det var to syn på korleis me best skulle lykkast i framtida.
Eg håpar at alle har respekt og toleranse for det andre synspunktet og at me i framtida også kan arbeide godt saman for å få til det me ønskjer på Bokn..

For å nå fram og lykkast i ein stadig meir sentrali-serande verden er det avgjerande viktig for oss å dra lasset i lag.

Eg føler det har vore rett å køyre denne prosessen for å få lagt spørsmålet om kommunesamanslåing eller ikkje dødt for ei tid framover. Spørsmålet har komme opp med visse mellomrom, etter fastlandssambandet blei etablert i 1991, og skapt litt usikkerhet om fram-tida.

Prosessen var og god med godt engasjement og høg deltaking. Eit lite hjertesukk til slutt. Gjer ikkje dette til ei sak i neste val. Alle som stiller til val ved neste kommuneval er innstilt på å gjere ein best mulig jobb for Boknasamfunnet.

Nå er saken om kommunesamanslåing avgjort og alle må rette blikket framover.

Svein Ove

August 2006

Vel overstått sommarferie. Det er fantastisk godt for kropp og sjel å få ein så fin sommar, og den har i alle fall gitt meg energi til å stå på utover hausten og vinteren.

Godt val
Det nærmar seg nå svært folkerøystinga om kommunesamanslåing. Kvar enkelt har nå ei viktig oppgåve med å finne svar på kva som tener Bokn som samfunn best i framtida.

Korleis sikre rett og lik behandling av alle innbyggarane? Korleis best sikre tenestetilbodet og tilbod om det me har krav på? Korleis får me næringsutvikling og unngår nedgang i folketalet?, og kor lenge får me sjølv avgjere og påvirke løysninga om Bokn får vere eigen kommune eller ikkje?

Som eit lite lokalsamfunn er Bokn avhengig av å få til ei auke i folketalet, spesielt unge familiar, for å over-leve som eit levande lokalsamfunn med dei tilbod me har i dag. Klarar me dette best med å fortsette som eigen liten kommune eller å bli ein del av ein større kommune? Korleis me trur at me lykkast best i framtida er det me nå må tenke gjennom.

For å få endå betre grunnlag for avgjerda di kan du gå på folkemøte den 5/9 for å få delta i diskusjonen. Det er derfor svært viktig at alle gjer seg opp ei meining og går og stemmer den 18/9, eller førehandstemmer. Kommunestyre har sagt at dei vil følgje det rådet de som innbyggarar gir og behandlar saka på kommunestyremøtet den 26/9. Godt val.

Framtidige kontorlandskap
SR-Bank har vore i ein prosess for å sjå på opnings-tider og drift av avdelinga på Bokn. I denne samanheng har det vore ein dialog med kommunen om å vurdere samarbeidsløysingar. Kommunen og banken er nå blitt einige om å få eit felles kontorlandskap med banktenester og kommunalt servicekontor. På sikt vil me prøve å få til eit fullverdig NAV-kontor med trygd og sosialkontor her, sjølvsagt skilt fysisk.

Svein Ove

Juni 2006

Engasjement og folkerøysting
Diskusjonen om ei eventuell kommunesamanslåing går etter det eg høyrer godt. Det er bra med engasjement og deltaking i ei så viktig sak. Eg vil og minne om folkerøystinga 18/9. Det vil bli mulegheit for førehandsrøysting på Boknatun, det vil bli opplyst nærmare om det.

Folkemøtet den 7/6 var svært godt besøkt og tilbakemeldingane eg har fått tydar på at det var eit godt og svært sakleg møte med gode innleiingar ar fylkesordførar Roald Bergsaker(H) og tidlegare fylkesordførar Odd Arild Kvaløy(SP). Det vil bli eit folkemøte til etter sommarferien med hovudfokus på tilgjenge og omfang av kommunale tenestar framover.

Eg trur at - sjølv om me er for eller i mot ei kommunesamanslåing - så er det lærerikt og nyttig å ta denne diskusjonen nå. Me får god innsikt i korleis stoda er og me får informasjon om korleis utviklinga vil bli framover.

Men kanskje det viktigaste resultatet blir at me på Bokn engasjerer oss kraftig for å ta vare på det fine lokalsamfunnet me har. For det må ikkje herska tvil om at utan eit kraftig engasjement frå oss på Bokn vil det bli vanskeleg med ei positiv utvikling på Bokn i framtida, uansett eigen kommune eller ikkje. Eg trur og det er godt å bli ferdige med spørsmål om kommunesamanslåing for ei tid.

Rekneskapen
for 2005 er klar og viser eit overskot på ca 930 000,-, som skuldast litt høgare inntekter og lågare driftskostnader enn budsjettert. Overskotet blir foreslått brukt til delvis å dekke underskotet frå 2004. Bokn kommune har kontroll over økonomien, men budsjettet er svært stramt og kommunen har svært lite handlingsrom til små og store nye tiltak som burde vært gjennomførte. Det er gledelig at låne-gjelda minkar og er nå på ca. 45,5 mill kr. og at finansutgiftene dermed også minkar. Får håpe at renteauken ikkje blir stor framover.

”Samfunnslimet”
Formannskapet har fordelt 120 000,- i kulturmidlar til frivillige lag og organisasjonar. Det er eit svært viktig arbeid desse lag og organisasjonar gjer for lokalsamfunnet på Bokn. Fleire seier at dei er limet som får heile samfunnet til å henga saman. Eg må berre få takka alle som gjer ein innsats, og understreke igjen at det er svært viktig for Boknasamfunnet.

Mindre tilgjengeleg
Til slutt vil eg komme med ei orientering om mi eiga stilling. Som de veit reduserte kommunestyret ordførarstillinga til 50%. Eg vil nå begynne i arbeid i dei resterande 50%. Dette vil medføre at eg ikkje blir så tilgjengeleg som før og at det er best å prøve og møte eller snakke med meg på mandagane.

God sommar!

Svein Ove

Mai 2006 

Næringsliv
Som de ser av reportasje i Bygdabladet er der nå interesse for tomt i Knarholmen, noko som er svært gledeleg. Det er mitt håp at me nå klarer å nå i mål med desse interessentane slik at dei får etablert  verksemda si og skape arbeidsplassar og utvikling på Bokn.

Utbygginga til Bokn Plast og andre næringsdrivande er og svært positivt. Saman med kommunen og Aetat sitt arbeid gjer dette at arbeidsløysa på Bokn går ned og er på ca 4%. Det er likevel langt over snitt i Rogaland, på ca 2%. Det er gledeleg at fleire får arbeid og det gir inspirasjon til å fortsette arbeidet slik at alle kan få arbeid.

Eigarforhold-oversikt
Kommunen har sett i gong eit omfattande arbeid med å skaffe oversikt over eigarforhold til fleire områder på Bokn som har uavklarte eigarforhold, t.d. allmenningar. Når nødvendig dokumentasjon er innhenta frå alle berørte parter vil ein sjå om ein får ei avklaring på minneleg vis. Klarer ein ikkje å oppnå avklaring vil sakene bli førelagt jordskifteretten for endeleg avklaring. Formannskapet vil så avgjere kva som skal skje med kvar enkelt eigedom som blir i kommunal eige. Dette er tidkrevjande og vanskeleg arbeid så eg ber om forståing for at det kan ta tid, men eg trur det er i alle si interesse å få ei endeleg avklaring på desse forholda.

Kommunestrukturen
I kommunesamanslåingsprosessen er det nå eit viktig arbeid som må gjerast for at me som innbyggjarar skal få mest mulig informasjon om kva dette inneber for oss. Kommunen er i ferd med å trykka opp kortversjonen av konsekvensutredninga, som vil bli sendt ut til alle husstandane på Bokn. Både den omfattande- og kortversjonen er tilgjengeleg på kommunen og bygdabladet sine internettsider. Det vil og bli laga ein brosjyre som blir tilgjengeleg fram til folkerøystinga.

Kommunen planlegg to folkemøter med folk utanfrå, kor det første blir onsdag 7/6. Sett av datoen. Det andre møtet blir etter ferien. Kommunen planlegg også eigne møter for å få engasjert ungdommen og vil komme nærmare tilbake til tid og stad. Det er vårt mål med møta at det skal bli møter kor me som innbyggjarar ikkje berre skal høyra kva andre meiner om samanslåing, men at me alle blir engasjert og deltar i ein diskusjon, gjerne i mindre grupper, om kva som er fordeler og ulemper med ei kommunesamanslåing. Eg trur då at ein vil få fram og få ei betre forståing om kva som er best for Bokn i framtida. Då vil me kvar enkelt få eit best mulig grunnlag for kva ein vil stemma den 18/9.

Eg vil igjen oppfordra til ein sakeleg og god debatt, utan at det personlege blir dratt inn.

17. mai
Nå står feiringa av Norge sin nasjonaldag, 17. mai for tur, og eg oppfordrar alle til å delta i ei tradisjonell feiring av dagen. Med to nye færingar håper eg det blir ein renessanse for kapproing-tradisjonen som i år vil føregå i Alvestadkroken. Deretter blir det tog til kyrkja, gudsteneste, tog til Boknatun og skulen, med tradisjonell feiring der. Om kvelden blir der folkefest med underhaldning og tale for dagen.

Velkommen.

Svein Ove

April 2006

Kommunesamanslåingsdebatten
På kommunestyremøtet 21.03 var kommunesamanslåing med Tysvær den store saken. Kommunestyret konkluderte med at konsekvensutredninga og avtalane med Tysvær og kommunaldepartementet viser kva som er utfordringane og muligheitene for lokalsamfunnet på Bokn, og gir eit godt grunnlag for å ta stilling til ein samanslåing eller ikkje.

Debatten i kommunestyret var svært god og balansert. Mange uttrykte at dette var ein stor og vanskelig sak og vurderte fram og tilbake kva som var rett. Kommunestyret er delt i sin anbefaling til dykk som innbyggjarar om kva som er det beste for boknarane framover. 8 representantar meinte boknarane er mest tent med å slå seg saman, 7 representantar valte å seie nei til samanslåing medan 2 representantar ikkje ville gi nokon anbefaling til innbyggjarane.

Det blir nå opp til dykk som innbyggjarar å seie sitt i folkeavrøysting den 18.09.06. Eit samla kommunestyre vil rette seg etter meininga i folkeavrøystinga. Informasjon og god debatt om saken blir nå svært viktig og ein kortversjon av konsekvensutredninga vil bli sendt til alle husstandane. Me vil komme nærmare tilbake til korleis debatt og møter vil bli ordna utover våren og hausten fram mot avrøystinga.

Eg vil understreke at det er svært viktig at me har ein ryddig og saklig debatt og at me har respekt for kvar andres synspunkt. Uansett utfall av avrøystinga skal me omgås kvarandre og utvikla lokalsamfunnet vidare og då kan me ikkje ha ei splitta bygd.

Den nye visjonen for Bokn
Det var svært kjekt at så mange kom på møtet den 29/3 om Bokn si framtid. Dei to innleiarane fekk godt fram kva som er Bokn sine utfordringar og muligheiter framover. Nedgang i folketalet med ei forskyving av alderssamansettinga med færre 20-40 åringar og fleire 80+, svært mange utanfor den ordinære arbeidsmarknaden og eit sårbart næringsliv som dei største utfordringane.

Per Egil Mjaavatn fekk fram at me følgjer utviklinga i Noreg, med dårlegare helse, eit ”urbant” hovud og stillesittande aktivitetar.
Han tok utgangspunkt i at ei god helse var noko av det aller viktigaste i livet vårt og at me måtte bli meir fysisk aktive og gje barna ein god oppvekst med mange gode opplevingar slik at dei kjem tilbake når dei skal etablera seg.

Det er då godt å oppleva at kommunen sitt prosjekt, ”KJEKT PÅ BOKN” som fokuserer på fleire arbeidsplassar, førebyggjande helsearbeid og at me skal ta Bokn sin fantastiske natur meir i bruk er rett veg å gå.

Som avgjerande faktorar for at prosjektet skal lykkast er at flest mulig av oss ser at noko må gjerast og at alle deltar og får eit eigarskap til prosjekta me skal få til. Kommunen kan berre var ein startmotor og katalysator i utviklinga. Det er me som innbyggjarar som må ta tak i utviklinga og stå for det som må gjerast. Eit godt og organisert samarbeid og involvering frå innbyggjarane, spesielt ungdommen, er avgjerande for at me lykkast.

Der er grunn til å ha forventning til prosjektet men me må og var realistiske. Det vil ta tid å få snu ei utvikling og ein vekst i folketalet vil ikkje komme med ein gong.

Det er å håpe at me vil lykkast i å få fleire inn på det ordinære arbeidsmarknaden innan kort tid og me arbeider intenst med det.

Svein Ove

Mars 2006

Oppfordring
Bokn har i dei siste åra hatt eit stabilt folketal, medan Noreg og Rogaland veks. Fødselstalet er lågt og me har netto fødselsunderskot. Aldersamansettinga forskyv seg også og boknarane blir eldre og eldre. Me har mange som står utanfor den ordinære arbeidsmark-naden, heilt på topp i Noreg med 5-6% heilt arbeids-ledige og mange i delvis arbeid, på tiltak og mange uføre. Næringslivet er og svært lite og sårbart. Folketalsframskriving seier at me skal bli 100 færre i 2020.

Dette gjer at Bokn som lokalsamfunn står foran store utfordringar i tida framover. Denne tendensen må snus, eller så blir lokalsamfunnet vårt ikkje livskraftig og det vil bli lite attraktivt å bu her.

Som de kjenner til så har ein i kommuneplanen satt dette i fokus og kommunestyret har gått inn for eit prosjekt som er blitt kalla ”KJEKT PÅ BOKN”. Prosjektet er delt i 3; Ta naturen i bruk, Helseførebyggande tiltak og etablering av arbeidsplassar.

Kommunen kan ikkje aleine lykkast å snu denne trenden, me må alle bidra og ta del i utvikling av vårt lokalsamfunn.
Eg vil derfor invitere og oppfordre alle til å komme på eit oppstartsmøte den 29/3 kl. 18.00 i auditoriet på skulen for å få betre kjennskap til utfordringane og komme med innspel på korleis me kan gjere Bokn til ein ”kjekk” plass å bu, slik at alle spådommar om folketalsnedgang blir gjort til skamme og me får vekst og utvikling på Bokn.

Utfordring
Desse utfordringane som eg her har nemnd er og svært sentrale i diskusjonen rundt kommunesamanslåing med Tysvær. Eg vil komma nærmare tilbake til kva eg meiner om den saken. Styringsgruppa er akkurat nå ferdig med arbeidet rundt konse-kvensutredninga og den vil bli presentert for kommunestyra i Bokn og Tysvær den 14/3 med behandling i kommunestyret på Bokn den 21/3. Så sett av den 21/3 og møt opp på kommunestyremøte.

Det blir viktig å få til gode debattar og dialog om dette viktige spørsmålet, og me vil prøve få til ulike møte og informasjon om kommunesamanslåing.

Det blir og svært viktig at me respekterer kvarandre sitt syn. Etter folkeavstemminga, uansett om det blir samanslåing eller ikkje, blir det svært viktig at me saman tar tak i og bidrar til ei god utvikling for oss her på Bokn.

Bussruter
Eg har fått svar på brev til Kolumbus om bussrutene. Dei vil vurdera om morgonruta kan kjørast også i skuleferien når dei har ein revisjon av rutene sine i juni. Får håpa at me då får ei løysing som tener oss som brukarar.

Skuledrift
Som de sikkert fekk med dykk så var der ein diskusjon rundt budsjettet for 2006 om skulen fekk nok pengar til drifta. Situasjonen ser føreløpig ut til at det blir 10 grupper (klassar) med samanslåing i enkeltfag. Eg trur at me nå har eit godt grunnlag for at kvaliteten på undervisninga blir svært god.

Bankdrift
SR-Bank på Bokn er i ein situasjon som gjer at dei må sjå på drifta av kontoret her. Kommunen og banken er i ein god dialog og me arbeider med ei løysing som skal gi eit betre tilbod til dykk som brukarar samtidig som kommunen og banken vil komma styrka ut med denne løysinga.

Svein Ove

Februar 2006

Først godt nytt år alle saman!

I 2005 har 2751 stk. vore på Boknafjellet og skrive seg i Boka. Det er ny rekord og viser at mange tar turen til Bokn for å nyte utsikten og ta seg ein tur ut i friluft. Tradisjonen tru har me trukke ut to vinnarar av eit krus frå Bokn kommune og det blei Brit Holberg og Elly Borgenvik. Førstnemnde var også ein av vinnarane i 2004.

Eg er sikker på at Bokn kan få igjen for å satse på fleire tiltak for at folk skal bruke naturen meir enn i dag. Bokn kjem på kartet og me får markedsført oss, kan tiltrekke oss mulige etablerarar og det er helseførebyggande for oss alle. Reiselivsnæringen vil og ha stor nytte av slike tiltak. Eg ser derfor fram til at prosjektet ” Ta Boknanaturen i bruk” skal lykkast.

Kolumbus
Frå nyttår av fekk me ny aktør for bussrutene på Haugalandet. For Bokn blir det ikkje dei store endringane, men eg har skrive brev til Kolumbus og bedt dei gjere bussruta om morgonen til Aksdal/Haugesund permanent og ikkje slik som nå at den berre skal gå på skuledagar. Eg har og bedt om at nattbussen må kjøre til Føresvik når der er passasjerar til Bokn.

Fylkestannlegen
Som de og veit så har Fylkestannlegen vore nødt til å stenge tannlegekontoret på Bokn for ei stund p.g.a. mangel på tannlegar. Eg har vore i kontakt med Fylkesordføraren og Fylkestannlegen for å sjå på løysingar. På kort sikt blir det prøvt å få til avtale med private tannlegar. Samtidig søker ein etter tannlegar, men ved sist utlysing var det ingen søkarar. Ein prøver og å få fatt i utanlandske tannlegar. Får håpe nokre av tiltaka kan lykkast, men det kan ta litt tid.

Konsekvensutredninga
Arbeidet med konsekvensutredninga om kommune-samanslåing med Tysvær pågår for fullt og skal være ferdig 1/3. Formannskapa er og enige om å sende ein søknad til Kommunaldepartementet om støtte på kr. 44 mill. kroner til å dekke eingongskostnader og til infrastrukturtiltak som utbygging av breiband, vassverk, gang- og sykkelstiar og kommunale vegar.

Det blir spennande å sjå kva svaret på søknaden blir. Kommunalministeren har jo gått ut og sagt at dei ikkje vil stimulera til kommunesamanslåingar. Kommunar som allereie er i ein prosess vil kunne få midlar, det har statssekretæren bekrefta at Bokn og Tysvær kan få.

Båtplasser
Det er svært viktig at innbyggarane på Bokn, om ønskjeleg kan få båtplass, og derfor har formannskapet løyva kr 100 000,- i tilskot til Bokn båtforening til utbygging av båtplassar. Formannskapet trur og at det kan vere eit godt tilbod for å trekke folk til Bokn.

Svein Ove 

Desember 2005

Nye investeringar og tiltak i 2006
Omorganisering og innsparing på drifta i kommunen i tillegg til at overføringane frå staten blir større gjer at Bokn igjen får handlingsrom til investeringar og andre nye tiltak. Me må berre vakta oss for ikkje å auka drifta så mykje at me missar handlingsrommet igjen og får ein jojo politikk.

På grunn av den betra økonomiske situasjonen for Bokn kommune inneheld rådmannen sitt forslag til budsjett at dei planlagde innsparingane på drifta kan tas vekk. I tillegg er fleire nye tiltak lagt inn. Slik som ved-likehald av kyrkja, leikeplass på Øyrenfeltet, opprusting av turstien, sliping av golvet i gymsalen og nytt scenegolv, diverse beredskaps-utstyr, trafikk-sikringstiltak, nærings-tiltak og pengar til nærmiljøanlegg i Føresvik.

Fleirtalet i kommunestyret beståande av AP, KRF og H leverte felles innstilling til budsjettet. Den gjekk ut på å styrka skulen med ca. 250 000,- med tillegg av 200 000,- til IKT på skulen. Lag og organisasjonar får ein auke til 120 000,- i kulturmidlar og drifta av kyrkja blir auka med 15 000,-. Der blir og ein satsing på vedlikehald av vegar og bygg på til saman 400 000,-. Prosjektet med å få vatn fram til Kro er også framskynda til 2006.

Mindretalet, SP, vil auka skulebudsjettet med 450 000,-, IKT til skulen med 300 000,-, drift av kyrkja med 50 000,- og vedlikehald av vegar og bygg med 160 000,-.

Kjekt på Bokn
Rådmannen sitt framlegg til budsjett med tillegg av fleirtalsinnstillinga gir Bokn kommune eit svært godt grunnlag for neste års drift og me kan få til mange nye tiltak som vil gjere det kjekt å bu på Bokn.

Kommunestyret vedtok og å gå i gang med utbygging av eit bustadfelt i Føresvik med 12 tomter rett sørvest for Boknatun, slik at Bokn igjen kan tilby sentrums-nære tomter i Føresvik.

Avtale
Endelig avtale med Tysvær i samband med ei even-tuell kommunesamanslåing blei også vedtatt. Den går ut på at det skal oppretthaldast eit godt og like tilgjengeleg tilbod av kommunale tenester for innbyggjarane på Bokn som nå, tenestene skal få vekst- og utviklingstilhøve på line med tilsvarande tenester og tilgjenge som elles i den nye kommunen. Avtalen regulerer og namn, senter og kommunevåpen til den eventuelt nye kommunen. Det blir og sagt at det skal realiserast eit idrett- og kulturbygg på Bokn, samt at eit utval skal få 4,4 mill.kr. til disposisjon for gode utviklingstiltak på Bokn.

Eg synest at avtalen avklarar godt kva som vil bli situasjonen for oss på Bokn i ein eventuell framtidig kommune og gir oss, i tillegg av konsekevens-utredninga, eit godt grunnlag for å gjera oss opp ei meining om me skal stemma ja eller nei i ei folke-avrøysting om å slå oss saman med Tysvær.

Kulturprisen 2005
Til slutt vil eg gratulera Oddrunn Nilsen, May Jorunn Vatnaland og Venevil Birkelund så mykje med kulturprisen. Eg vil og takka dei for arbeidet dei har gjort for song og musikkmiljøet på Bokn og for gleda dei har gitt oss alle.

Eg vil ønskja alle ei riktig god og fredlig jul og eit godt nytt år.

Svein Ove

Oktober 2005

”KJEKT PÅ BOKN”
Dette er den nye visjonen for Bokn, vedtatt av kommunestyret ved behandling av kommuneplanen for 2006-2009. For at det skal vera kjekt for alle må me ta fatt i oss sjølve og bidra positivt til ei god utvikling på Bokn. Me må engasjera oss, delta i det som skjer og bry oss om bygda og dei som bur her.

Uansett om me blir eigen kommune eller ikkje er Bokn si framtid som levande lokalsamfunn heilt avhengig av at me som innbyggjarar tar fatt i utviklinga og får noko til å skje. Det kan vera for å skapa arbeidsplassar, delta i frivillige lag og organisasjonar, driva med politikk, eller besøka familie, venner og naboar. Me må tenka på korleis me kan hjelpa og støtta dei som treng det eller vil få til noko som er bra for bygda.

Måla som kommunestyret har sett seg er at me skal bli 800 innbyggjarar innan 2010, arbeidsløysa skal vera under gjennomsnittet for Rogaland og alle skal trivast på Bokn.

Arbeid for fleire arbeidsplassar, skapa nye uformelle møteplassar og tiltak for å sikra gode oppvekstvilkår for barn og unge blir svært viktige satsingsområde. I tillegg vil ein satsa på eit prosjekt som skal framheva at Bokn brukar naturen og muligheitene som ligg der til helseførebyggjande arbeid og til å gjera skulegangen i Bokn spesiell.

Tanken er at dette prosjektet skal medføra at skulen får eit tilbod som er så unikt og godt at det vil dra folk til Bokn, i tillegg til at det vil medføra at me føler velvære med å bu på Bokn.

Arealdel
Eg kan ikkje kommentera kommuneplanen utan å komma innom denne. Kommunen merkar eit mykje sterkare press for å få bygd hytter nå enn ein kunne for kort tid sidan. Kommunestyret og landbruksorganisasjonane har hatt og har ei forholdsvis restriktiv haldning til nye hytter samtidig som mange grunneeigarar vil bygga hytter. Kommuneplanen opnar for nokre nye hyttefelt, men alle får ikkje lov.

Det er sjølvsagt beklagelig overfor dei som ikkje får lov og eg kan forstå at det kan følast urettferdig. Det er fleire årsaker til at det ikkje alltid blir gitt lov. Andre offentlige myndigheiter kan av forskjellige årsaker, som byggjeforbod i strandsona og allmenn ferdsel, setta foten ned og det kan vera at kommunestyret ikkje vil opna uberørte område for hyttebygging nå.

Det er eit tankekors for meg at statlege myndigheiter skal bestemma så mykje over våre areal. Det lokale sjølvstyret er svært avgrensa. Kva har det å seia for folk om naustet er 35 eller 40 kvadratmeter?. Spørsmålet må jo bli om det skal byggast naust eller ikkje. Elles trur eg kommuneplanen gir rom for ein god utvikling på Bokn framover.

Kommunestrukturen
Kommunestyret har og diskutert oppbygging og innhald i avtalen med Tysvær og søknaden til departementet, som skal ligga til grunn ved folkerøystinga om kommunesamanslåing.

Innhaldet og kommentarane er omtalt i dette bladet på s. 4. Elles så eg vil berre seia at eg trur det er ein god avtale og innspela blir tatt med til endelig utforming av avtale og søknad. Arbeidet elles går sin gang og konsekvensutredninga er forventa ferdig rundt årsskiftet. Eg er spent på diskusjonen om kva som er best for boknasamfunnet i framtida.

Svein Ove

September 2005

Gassferjer
Som de sikkert har registrert så har det vore mykje omtale av dei nye gassferjene i media og det er diskutert namn på ferjene. Eg trur at dei nye ferjene blir svært flotte med betre kapasitet, men det verkar som om dei vil få svært dårleg tid ved lossing og lasting for å halde rutetidene.
Avkjøring i 2-3 kjørebaner med til saman bortimot 200 bilar vil medføre kork når bilane skal inn på vegen og dei vil bruke lenger tid på lossing enn berekna. I tillegg kjem dagar med dårlig vér med surring av bilar og lengre seilingstid. Å gå over til gass gjer at utslepp av CO2 og NOX vil gå drastisk ned og vere med på å betre miljøet. Sikkerheten er minst like god som på vanlege ferjer.

Reservekaiar
Det er betenkelig at Noregs nest største ferjesamband kan stå i fare for å bli stengt nokre dagar når ferjene, av ulike årsaker, ikkje kan gå til dei vanlege fejekaiane i Arsvågen eller Mortavika. P.g.a. spesielle krav til ferjestøa for dei nye ferjene kan ikkje andre ferjestøer nyttast. Fylkeskommunen og kommunane vil nå ta opp denne saka med Vegvesenet for å sjå på mulege løysingar.

Innspel på namn
Som de har sett så ønskjer eg at ei av ferjene skulle heite ”BOKN”. Då det kan vise seg vanskeleg ønskjer eg innspel på andre namn som kan knytast til Bokn. Eg har sjølv tenkt på ”Boknasund”. Fjord1 opplyser elles at dei er i dialog med dei tilsette på ferjene og i billettbuene for vidare arbeid når dei overtek. Håper det løyser seg til det beste for alle tilsette.

Kommunestrukturen
Arbeidet med kommunesamanslåinga går framover og det er ein svært god og positiv stemning i gruppa for å få fram eit best muleg grunnlag for å diskutere å avgjere om Bokn fortsatt skal vere eigen kommune eller ikkje. Styringsgruppa vurderer nå korleis me skal få ein god diskusjon om namn på ein eventuell ny kommune, kommunesenter og kommunevåpen. Kommunane går nå gjennom tenestene for å sjå korleis dei er nå og korleis dei vil bli i ein eventuell ny kommune.

Styringsgruppa har hatt møte med statssekretær Just H. Johansen i kommunaldepartementet. Det var klare signal frå han at departementet vil bidra med midlar i ein eventuell samanslåingsprosess. Storleiken på midlane og kva dei kan nyttast til vil bli gjenstand for ein god diskusjon internt i Bokn og saman med Tysvær før ein endelig søknad vert sendt.

Styringsgruppa har og vedtatt at dei vil be om ekstern hjelp til å få vurdert økonomi og utviklingstrekk i dei to kommunane og på Haugalandet både som sjølvstendige kommunar og samanslåtte. Korleis vil lokalsamfunnet på Bokn bli i framtida og kva vil me? vil bli spennande å diskutera.

Svein Ove

August 2005

Vel overstått sommar! Først vil eg ønska alle førsteklassingane velkomne på skulen og ønsker dei lykke til med skulegangen på Bokn.

Konsekvensutredning
Styringsgruppa som arbeider med utgreiinga av ein eventuell samanslåingsprosess er kommen i gong og har alt sagt at ingen tilsette skal bli oppsagt som følgje av ei eventuell samanslåing. Der er og satt eit mål om at den eventuelt nye kommunen skal bli ein robust kommune som skal sikra gode desentraliserte tenestar til oss som innbyggjarar.

Styringsgruppa har og satt ein foreløpig framdriftsplan med utarbeiding av konsekvensutredning fram mot nyttår, informasjon og debatt i mange former våren 2006 og folkeavrøysting hausten 2006. Gruppa vil og ha møte med representant frå kommunaldepartementet i august for å få litt generell informasjon om kommunesamanslåingsprosessar og diskutera med departementet om kva som kan vere deira bidrag i ei eventuell samanslåing. Det vil bli gitt fortløpande informasjon om prosessen.

Alvestadkroken
Det er beklagelig at butikken i Alvestadkroken, etter lang tids drift, må gi opp. Miljøet i Alvestadkroken blir mykje fattigare og mange får ein lengre veg til butikk og det er trist for dei som mistar arbeidet sitt her.

Val 2005
12. september er det val og eg vil oppfordre alle til å delta i valet, så får kvar enkelt gjere seg opp ei meining om kva parti dei er mest fornøyd med eller minst skuffa over. Det er nå mulig å førehandsrøysta i servicetorget på Boknatun, og valet vil bli avholdt på same måte som før, måndag 12/9 i allrommet på Boknatun frå kl. 09.00 til 20.00. Transport vil bli satt opp.

Godt val.

Svein Ove

Juni 2005

Årsrekneskapen for 2004 er avslutta og kommunen kjem ut med eit rekordunderskot på 2,3 mill kr. Dette er dramatisk og Bokn er i ferd med å komme på myndighetene si ”svarteliste”. Store finansutgifter i samband med svært store investeringar og tap av momskompensasjon er hovudårsaka til underskotet.

Både administrasjon og politikarane arbeider nå for at Bokn ikkje skal tape på endring av momskompensasjonen. Både Storting og regjering har sagt at ingen kommunar skal tape på omlegginga, så me burde lukkast i dette arbeidet.

Årsmeldinga viser at sjukefråværet i Bokn kommune har gått ned frå 8,8% til 3,8%, noko som er svært gledelig. Først og fremst godt for kvar enkelt, men og for heile arbeidsmiljøet i kommunen. Vil nytta anledninga til å retta ein stor takk til alle tilsette for innsatsen de har gjort for å levere svært gode tenester til innbyggarane på Bokn.

Omorganisering
Kommunestyret vedtok i budsjettmøtet at det skulle vere ein gjennomgang av organisasjonen og drifta for å få orden på den økonomisk vanskelige situasjonen som Bokn er komen opp i. Gjennomgangen er nå ferdig og kommunestyret slutta seg til rådmannen si innstilling som inneber at der blir færre seksjonsjefar, 3 nå mot 7 tidlegare, og endring av ansvar og arbeidsoppgåver for fleire tilsette. Alle endringane er enno ikkje på plass, men vil bli tatt over lit tid. Eg vil retta ein takk til alle tilsette som har medvirka til denne nødvendige endringa.

Det er svært viktig at me alle brettar opp armane og gjer ein innsats for at Bokn kommune fortsatt skal kunne tilby boknarane kommunale tenester som ligg på topp av kommune-Norge og at me får ein positiv utvikling på Bokn.

Lån
Det er også gjennomført ei reforhandling av låna som gjer at finansutgiftene blir redusert mykje. Innsparinga som desse tiltaka går til å oppretthalda drifta på ein god måte og gir kommunen økonomisk handlefridom igjen.

Sal
Formannskapet har gått gjennom kommunen sine eige-domar og vedtatt å selje fleire. Alle eigedomar som skal seljast blir lyst ut for sal så det er berre å følgje med på om det kjem noko spennande. Fleire eigedommar har uklare grenser og eigarforhold og det vil bli satt i gong eit arbeid for å avklare dette før ein bestemmer kva som skal skje med eigedomane.

Kompetanseutviklingsplan
Kommunestyret har óg slutta seg til ein kompetanseutviklingsplan for skulen. Regjeringa set nå i gong ei styrking av fleire fag, samt at der skal satsast på eit nytt språk. Dette inneber at kompetansen på skulen må betrast. Regjeringa har øyremerka pengar til vidareutdanning av personalet og kommunen har også sett av pengar til dette.

Me får alle håpe at dette arbeidet vil bere frukter slik at alle elevane får tilfredstillande kunnskap, spesielt innan lesing, skriving og rekning, til å takle kvardagen som kjem. Skulen er nå ferdig og eg vil ønske alle i avgangsklassen lykke til med vidare utdanning og håper at de vil vurdere Bokn som ein kommune å etablera seg i når den tid kjem.

God sommar til dykk alle.

Svein Ove

Mai 2005

Vel overstått 17. mai-feiring og takk til alle som stiller opp og yter stor frivillig arbeidsinnsats for at me skal få ein slik god og verdig markering av vår nasjonaldag.

Kommunestrukturen
Kommunestyret har behandla saken om kommunestruktur, og etter ein lang og god debatt gjekk eit samla kommunestyre inn for at det skal gjennomførast ein konsekvensutredning om samanslåing med Tysvær kommune med etterfølgjande folkeavstemming. Det var stor skepsis til ei samanslåing, men alle syntest det var rett å få ein gjennomgang av kva ei samanslåing vil bety for Bokn, få belyst både fordeler og ulemper, for så å få ein skikkeleg og god debatt før ei folkeavstemming.

Avtale
Det var og eit stort fleirtal for å forhandle fram ein avtale med Tysvær som seier noko om korleis tenestar og service til oss som innbyggarar blir her på Bokn, og om andre relevante punkt å ta med i ein slik avtale, bl.a. namn på ein eventuell ny kommune.

Ei gruppe med ordførar, rådmann, ein politikar og ein representant for dei tilsette frå kvar kommune skal styre arbeidet med konsekvensutredninga. Kyrre Lindanger blir den andre politikaren i tillegg til ordføraren som skal bli med frå Bokn kommune. Det er litt for tidleg å sei kva tid ein folkeavstemming kan avholdast men det kan kanskje bli hausten 2006. Tysvær formannskap har behandla og samrøystes gått inn for saka, og kommunestyret i Tysvær vil svært sannsynleg gjer det sama i byrjinga av juni.

Skyssordning
Bokn kommune er nå i dialog med Rogaland fylke om å få til ei ordning som gjer at ungdom kan komma seg heim frå kveldsarrangement andre stader for ein 50-lapp. Det gjenstår å sjå på korleis dette vil bli i praksis, men eg er optimist og håper me får til ei ordning i helgene frå hausten av.

Bustadtomter
Kommunen har saman med Erling Sæbø arbeiddt for å få til byggemodning av bustadtomter i Føresvik. Kommunen har nå gått ut og bedt om prosjektering av utbygginga og ein tar sikte på utbygging til hausten/vinteren.

Arbeidsløysa
Til slutt vil eg igjen kommentere den vonde situa-sjonen mange er ramma av når dei ikkje har arbeid å gå til. I april var der 21 stk, 5,9%, arbeidsledige i Bokn, høgast i Rogaland. Eg trur at svært mange av dei som vil bu på Bokn sterkt ønskjer arbeidsplass her, og det er derfor svært viktig å få det til og ikkje berre satse på at arbeidsplassane blir andre stadar i regionen, sjølv om det og er viktig.

Me har endå ikkje lukkast å få til konkrete etableringar i Knarholmen, men arbeidet har første prioritet. Eg vil ta opp og prøva å få til ei større satsing for å skapa arbeidsplassar i revidert budsjett. Arbeidet med å få til etablering av arbeidsplassar er vanskelig og tar tid, men det er svært viktig at me ikkje gir opp. Eg vil oppfordre alle til å være positive til og støtte folk som vil satse og skape arbeidsplassar på Bokn. Me må få til ein samla innsats og tru på at det går an å driva med noko på Bokn.

Det er ikkje kommunen som etablerar arbeidsplassar, men enkeltpersonar eller selskap, kommunen kan berre medvirke til og støtta etableringar. Eg vil prøve å følgje dette opp slik at kommunen er mest mulig positiv og hjelper folk som vil få til noko.
Fleire arbeidsplassar er svært viktig for utviklinga av Bokn og me må alle bidra med det me kan.

Svein Ove

April 2005

Kommunestrukturen
Som eg har skrive om før så er det ein prosess på gong for å sjå på framtidas kommunestruktur. NIBR, norsk institutt for by- og regionforskning, er nå ferdig med sin rapport om kommunestrukturen i Rogaland. Den konkluderer med at Tysvær og Bokn bør vurdera å slå seg saman utan at der er noko som tyder på at det er nødvendig utifrå dagens situasjon, heller tvert om. Det er ikkje betre økonomi, tenestar og lokal-demokrati i store kommunar.

Det er ein svakhet ved rapporten at han ser for lite fram i tid og kva framtida vil bringe. Diskusjonen om ein storkommune på Haugalandet har vore nærast fråværande, Haugesund har vist litt interesse for å diskutere det, og er nå lagt død. Det har vore nemnd før og det blir nå tatt opp igjen at Bokn og Tysvær må vurdera å slå seg saman. Formannskapet skal diskutere saken 26/4 og
kommunestyret skal gjere endelig vedtak 10/5 om korleis Bokn kommunestyre ser på saka.

Konsekvensutredning
Rådmannen innstiller på at det bør gjennomførast ei konsekvensutredning for å kartlegge fordelar og ulemper med ei eventuell samanslåing av Bokn og Tysvær kommunar, som grunnlag for ein god debatt og folkeavstemming. I tillegg må det gjennomførast drøftingar med Tysvær for å komme fram til ein avtale som regulerer tenestene til oss som innbyggarar i ein eventuell ny kommune.

Kommune-Norge forandrar seg mykje og det går fort. Det er endring av oppgåver, økonomi, regionnndeling og samferdsel.
Det er og ein kjensgjerning at små kommunar som Bokn er avhengig av at nabokommunane stiller opp og hjelper oss i mange samanhengar.

Mange kommunar slit meir og meir med å gi oss som innbyggarar den service, tenester og saksbehandling som må til for å få ein god utvikling. Alle saker er og svært kompliserte og krev mykje av både administrasjonen og politikarane, og gjer arbeidet ekstra vanskelig når me er små.

Der er og ein klar holdning hjå alle parti på Stortinget at region og kommune-Norge må endrast. Nokre parti opnar for at det kan skje med tvang under spesielle forhold, andre ikkje.

Eg har på ingen måte tatt stilling til om Bokn skal slå seg saman med Tysvær eller ikkje, men eg synest situasjonen tilseier at me må få gjennomført ei konsekvensutredning for å få vurdert fordeler og ulemper med ein eventuell samanslåing av Bokn og Tysvær kommunar. Då får me på bordet kva dette dreier seg om og så får me diskutere kva som er den beste løysinga for Bokn i framtida.

Folkeavstemming
Eg er imot tvangssamanslåing, og det må vere me som innbyggarar, gjennom ein folkeavstemming, som skal avgjere kva som er best for Bokn. Eg vil for min eigen del respektera det som den rådgivande folkeavstemminga kjem fram til. Det blir spennande å sjå kva kommunestyret avgjer, og eg ser fram til ein engasjerande og saklig debatt.

Svein Ove

Februar 2005

Godt nytt år alle saman!
År 2005 har allereie komme godt i gong og eg håpar alle har hatt ei fin jule og nyttårsfeiring.

Fjelltur
I 2004 har det vore 2082 stk. på Boknafjellet, mot 2105 stk i 2003. Det dårlige været i fjor haust får ta skylda for at det blei nokre færre i 2004 enn i 2003. Brit Holberg, ei av dei mange trufaste turgåande, frå Bokn og Anne Jakobsen Lid frå Karmøy er uttrekte til å få krus. Det er fint at så mange tar ein tur på fjellet og nyt den storslagne utsikta over Rogaland, samtidig som ein får litt trim.

Store debattar
I 2005 vil det bli fleire store saker til debatt som kan komma til å berøra oss som innbyggarar. Kan nemna gjennomgang av drifta i Bokn kommune som vil måtta berøra enkeltpersonar og oss alle. Ingen skal bli oppsagde i omorganiseringa og det vil bli lagt stor vekt på å redusera tenestetilbodet minst muleg.

Ei anna sak som vil komma meir på bordet er kommunestrukturen i Norge og eg får håpa me får ein god debatt om saka kor mange engasjerer seg. Vil komma tilbake til desse sakene utover året.

Arbeidsløyse
Ei anna sak som uroar meg er at Bokn hadde svært høg arbeidsløyse, over 5% og høgast på Haugalandet, ved årsskiftet.
Dette viser at me må setta endå meir inn på å legga til rette for nye arbeidsplassar og arbeida endå hardare for å skaffa alle arbeid.
Eg har nå fleire kontaktar med interessentar som vurderer Bokn, og Knarholmen, som mulig plass for etablering av verksemd.

I samarbeid med Haugaland Vekst får me håpa at me lukkast med å få til fleire arbeidsplassar på Bokn og ellers på Haugalandet. Det er svært viktig at me lykkast med dette arbeidet for dei som står utan arbeid og for å få ein god utvikling på Bokn.

Svein Ove

Desember 2004

Hei!

Det er ein svært bekymra ordførar som nå skal referera frå budsjettmøtet i kommunestyret.

Rådmannen hadde lagt fram eit budsjett som var svært stramt, og umuleg for seksjonane å halde med dagens tenesteproduksjon, manglar ca. 800 000,- . Samtidig hadde rådmannen tatt til inntekt 1,2 mill kr. i kompensasjon for moms som kommunen ikkje får, men som me meiner me har rett på. Det er heller ikkje lov til å budsjettere med denne inntekta. Dette vil føre til at Bokn kommune blir svartelista og satt under administrasjon av Fylkesmannen. For å unngå denne situasjonen har kommunestyret vedtatt å dekke denne inntekta opp mot fond, viss me ikkje lukkast i å få ekstraordinære inntekter.

Rådmannen hadde forslag om å ta ein gjennomgang av administrativ organisering og teneste-produksjonen for å få ei enklare og meir effektiv drift. Dette slutta kommunestyre seg til og talfesta innsparingane til i størrelsesordenen 3 årsverk (1-1,5 mill). I budsjettforliket på Stortinget og p.g.a. feil i budsjettet fekk Bokn ei styrking av budsjettet på ca kr. 270 000,-. Der var og enighet om ikkje å legga ned Bygda-bladet, men å auka abonnementsprisen til 300,- kr., noko som vil føra til ei styrking av budsjettet på 50 000,- kr.

Fleirtalet i kommunestyret (KRF, SP;AP) vedtok så i tillegg ein reduksjon i ordførarstillinga og i godtgjerdsla til dei folkevalde med ei innsparing på 150 000,-. Samtidig vedtok dei å bruke pengane opp på ei generell styrking av skulen, på 170 000,-kr., oljegrusing av Arsvegen, på 226 000,-kr., og nokre mindre beløp til Destinasjon Haugaland, ambu-lansen og sceneteppe.

Fleirtalet vil og behalde sommarjobb for ungdom. Mindretalet(H ) hadde forslag om å sette av sparte beløp, 400 000,- kr., til dekking av uforutsette ting som vil dukke opp og ta ei vurdering i revidert budsjett om kva me har råd å bevilge pengar til. Mindretalet vil og ta ein gjennomgang av den politiske organiseringa, inkl. ordførarstillinga. Fleirtalet vil investere for 700 000,- kr. i ombygging på legekontor, nærmiljøanlegg, lysarmatur og småbåthavn dekka av kapitalfond. Mindretalet vil investere 570 000,- kr. stort sett til dei same ting, unntatt lysarmatur.

Det som gjer meg svært bekymra, og som gjer at budsjettvedtaket er heilt uansvarlig, er at fleirtalet ikkje viser vilje til å redusere budsjettet, heller auke pengeforbruken, når Bokn kommune er i ein så vanskelig økonomisk situasjon og må ha ein reduksjon av driftsnivået, som dei og har stemt for. Arbeidet med å får eit godkjent budsjett nå blir endå vanskeligare og det må til ei endå sterkare innsparing enn det som var utgangspunktet.

Noko som ytterligare forsterkar denne bekymringa er at Bokn kommune vil gå med eit underskot på fleire hundre tusen, kanskje over ein million, kr. i 2004 som og må dekkast inn. Situasjonen er nå med fleirtalsbudsjettet at Bokn kommune har brukt opp fondsmidlane og står foran store nedjusteringar, les reduksjon av stillingar, av budsjettet for å få skikk på økonomien igjen.
Dette kan ikkje vere meininga for å prioritere bl.a. oljegrusing av Arsvegen. Det er og mi oppfatning at fleirtalet nå styrer slik at Bokn kommune, uansett andre prosessar, nå ikkje er i stand til å klare seg sjølv.

Ordførarstillinga
Til slutt vil eg komma med ei personlig oppfatning av det som har skjedd rundt reduksjonen av ord-førarstillinga til 50%. Eg er med på, i ein vanskelig økonomisk situasjon for kommunen, å diskutere storleiken på ordførarstillinga, men når dette blir tatt opp rett over bordet i formannskapet utan å diskutere saka med meg, og sparte pengar går til bl.a. oljegrusing av Arsvegen blir eg skuffa over prioriteringa.

Eg har heller ikkje fått nokon klarhet i kva eg ikkje skal utføre av oppgåver. Dette vil medføre at ordføraren blir vanskeligare å treffe, ikkje kan ta opp og forfølgje saker som de som innbyggarar er opptekne av. Det blir og mindre tid til å ha kontakt med næringslivet og drive næringsutvikling for å skape arbeidsplassar som Bokn er heilt avhengig av.

Det vil og bli mindre tid til å gjere Bokn sine interesser gjeldande på Haugalandet og i Rogaland. Eg trur det vil bli negativt for Bokn og lokal-samfunnet her at ordføraren nå blir redusert til ein intern møteleiar, og eg saknar ein diskusjon om saka. Dette blei ikkje nokon god avslutning av året men eg vil takke alle for året som har gått og ønsker alle ei fredfull og God Jul og eit trygt og Godt Nytt År.

Svein Ove

November 2004

Budsjett 2005
Rådmannen har lagt fram budsjettet for 2005. Det ber preg av maksimale inntekter og minimale utgifter. Det vil nok merkast at enkelte tenestar ikkje blir like gode som før og nokre tilbud kan også bli tatt heilt vekk. Den endelege politiske behandlinga vil til sist avgjere kva som eventuelt skal leggast ned, men rådmannen foreslår å legge ned Bygdabladet og sommarjobb for ungdomen i tillegg til nokre reduserte tenester. Det er sterk utgiftsvekst, i stor grad lønn og pensjonskostnader, og svak vekst i inntektene, som omlegging av inntektssystemet, mindre skatt og generelt for små overføringar til utvida tenestar som kommunane må gi, som gir ein vanskelig situasjon for neste år.

Det blir nå jobba mot Kommunaldeparte-mentet og Fylkesmannen for å sikre at me får inntekter til bl.a. momskompensasjon,
ressurskrevande brukarar og ein ressurs-krevande situasjon på skulen. Skulle dette mislukkast står me ovanfor ein endå vanskeligare situasjon. Eg trur og at regjeringa har lagt inn litt ekstra overføring til kommunane gjennom budsjettforhandlingane på Stortinget. Kommunestyret skal endeleg behandle budsjettet 14/12, og eg skal komme tilbake med meir informasjon etter det.

Kommunestrukturdebatten går for så vidt vidare utan at dei store tinga skjer. Det er meininga at kommunane skal få fleire forslag til organisering ut på høyring. Det har ikkje skjedd endå og me avventar det. Samstundes ser Bokn og Tysvær på å lage ei sak om konsekvensutredning om samanslåing av dei to kommunane. Eg trur dette bør gjerast for å få vita kva konsekvensane kan bli, både fordeler og ulemper, ved ein eventuell samanslåing.

Me får då noko konkret me kan ta stilling til for å danna oss eit bilde om det vil var rett eller galt for Boknasamfunnet å vurdera ein kommunesamanslåing nå. Ein vil og ligge i forkant av prosessen og utviklinga med sterke krefter som vil ha kommunesamanslåingar i Norge, om nødvendig med tvang.

Dette betyr ikkje at ein seier ja til nokon samanslåing. Det vil bli ein eventuell folke-avstemming som vil avgjer det. Sak om konsekvensutredning vil sannsynligvis komma opp til behandling i kommunestyre etter nyttår.

Knarholmen
Det har i den seinare tid vore fleire kontaktar med mulige etablerarar i Knarholmen. Formannskapet har vedtatt å leige delar av bygget ut til Grieg Seafood Rogaland AS, som vil bruke delar av anlegget til kontor og base for verksemda si på Bokn.

Kommunen har og gitt tilbud til Johannes Handeland om kjøp av tomt i næringsområdet til kontor og produksjonsbygg, og det er å håpa at denne etableringa kjem på plass.

Det har og vore i kontakt med interessentar som ser på området nord i fiskerihamna. For å få mulighet for etablering her vil kommunen nå sjå på ein omregulering av området heilt nord i hamna frå fiskeindustri til meir generell næringsverksemd. I dagens Norge er det svært vanskeleg å sjå for seg ei etablering innan fiskeindustri, og me kan ikkje la området ligge uvirksomt viss det kan nyttast til anna formål.

Vegnett
Kommunestyret har med 11 mot 5 røyster gått inn for foreslått utbygging og finansiering av vegnettet på Haugalandet. Forslaget inneber store utbyggingar av vegar finansiert med bompengar og nokre statlige midlar. For Bokn sin del dreier det seg om utbedringar på fylkesvegane, og så har me spelt inn tiltak på E39 på Ognøy og kryssa på Austre og Vestre Bokn. Tiltaka på E39 er avhengig om det blir bomstasjon på E39 ved Våg i Tysvær eller ikkje.

Sjølvsagt er det ingen som ønsker bom-stasjonar, men for å realisere heilt nødvendige vegutbyggingar på Haugalandet er bompengar eit nødvendig onde.

Svein Ove

September

Nausttomtsal
Skulle komma med meir spennande informasjon i denne utgåva av Bygdabladet, og det blir det kanskje, for eg vil gi ei kort utgreiing av det som skjedde ved sal av nausttomtene. Formannskapet vedtok at tomta ved Fyren og ei tomt i Hålandsjøen kunne seljast. Salet skulle skje til fastbuande, til høgstbydande og lysast ut for sal i Bygdabladet. Rådmannen fekk fullmakt til å gjennomføra salet.

Under salet blei det gjort fleire feil som gjorde at saken fekk stor overskrift og omtale i Haugesunds avis. Bokn formannskap hadde et ekstraordinært lukka møte den 16/9 for å gå gjennom saken, og fatta følgjande vedtak: Bokn formannskap finn grunn til å retta sterk kritikk til Bygdabladet som ikkje tok inn annonsa og til administrasjonen for mangelfull oppfølging av annonseringa før salet blei gjort og feil gradering i sak/arkiv systemet.

Frå nå av skal alle sal av eigedommar skje via meklar, og rutinar ved gradering av dokument skal gås gjennom og endrast. I tillegg har ein fått ei vurdering på om der er grunnlag for å trekke saken tilbake, og det kom fram at det er ingen ting som tyder på at kommunen kan trekke saken tilbake.

Lege
Den nye legen har nå starta opp praksis på Bokn og eg ønsker henne velkommen. Ei god legeordning er viktig for oss som innbyggarar og gir tryggleik i kvardagen. For å ha ei god legeordning er det viktig at flest muleg brukar legen på Bokn som fastlege. I samband med at den nye legen startar opp har formannskapet vedtatt å ruste opp legekontoret for 50 000,-.

Kyrkja
Soknerådet og formannskapet har fått ut-arbeida ein tilstandsrapport for Bokn kyrkje. Bokn kyrkje er ei listeført kyrkje, noko som betyr at kyrkja skal forvaltast som om den er verna. Bispekontoret skal godkjenne arbeida etter råd frå riksantikvaren. Det er fleire tiltak som må gjennomførast og formannskapet har vedtatt ein vedlikehaldsplan for kyrkja. Reperasjon av vinduer og portane til benkene, lufting på loft og skip samt maling av kyrkja vil bli prioritert.

Kollektivrutene
på Haugalandet er under revurdering og skal leggast ut på anbud. I samband med dette ser det ut til at det blir ei opprusting av rutene i sentrale strøk.

Det ser ut til at endringane ikkje får dei store konsekvensene for Bokn. I ei høyring om kollektivtilbodet har formannskapet uttala at reisetida ikkje må forlengast ved skifte av buss, nattbussen til Kårstø må fortsette til Bokn når det er passasjerar, og at ungdomskortet må gjelde for Kystbussen.

Svein Ove

August 2004

Sein sommar
Hadde tenkt å skriva vel overstått sommar, men så er det no me har sommaren. Eg håpar alle får nyta litt av han. Det er heller ikkje noko nytt at det er fint vér når skulen startar opp. Eg vil ønskje alle 1. klassingane, dei øvrige skuleelevane og lærarane lukke til med nok eit skuleår. 

Marknadsdagen
i Alvestadkroken 10/7 var godt besøkt. Mange kjem ”him” til Bokn for å treffa familie og vener denne dagen, og det er noko alle sett stor pris på. Sjøhuset diska opp med mat og heimebakst til kaffien og ms ”Andholm” var på besøk. ”Andholm” var ei fiskeskøyte som blei brukt i englandsfarten under krigen, og restaurert av frivillige, deriblant Olav Øvrebø og andre frå Bokn. Marknadsdagen er komen for å bli og det må arbeidast for at den skal fortsette.

Sommaren er ei roleg tid i det politiske liv, og er endå ikkje komme skikkeleg i gong. Tida nyttar eg til å rydda litt på kontorpulten og leggje planar for kva me skal gjere utover hausten.

Opprydding 1
Av ting me arbeidar med no er å få rydda opp etter konkursen og sal av utstyr i Bokn Fiskemottak AS. Det har ikkje lukkast oss å få
leigetakarar som vil driva vidare, og då har banken seld utstyr dei hadde pant i og bygget vil bli rydda. Kommunen vil så arbeida vidare for å få inn ny aktivitet.

Opprydding 2
Me har og arbeiddt mot vegvesenet for å få til ein skikkeleg rydding av trær og buskar langs vegane på Bokn. Vegvesenet har lova å sjå på problemet. Blir det ei løysing for korleis arbeidet kan gjerast, vil det innebera at grunneigarar langs vegkanten stiller seg
positivt til at trær og buskar kan fjernast. Det er heller ingenting i vegen for at grunneigarar, slik som fleire har gjort, tar tak i dette og
fjernar nokre tre og buskar. Det gjer at vegane blir mindre trafikkfarlege og at me ser noko av den fine naturen når me er ute og
ferdast langs vegen. Takk til dei som har gjort det.

Får komme med meir spennande informasjon i neste nr. av Bygdabladet.

Svein Ove

Juni 2004

Kommunestrukturen
Som eg tidlegare skreiv så ville eg komma tilbake med meir informasjon om kommune- strukturprosessen som pågår.

Etter mitt skjønn tar prosessen eit litt feil spor. Det blir for lite fokus og diskusjon om kva oppgåver kommunane og for den saks skyld fylkene skal driva med, og berre diskusjon om kor mange kommunar me skal ha og kor grensene skal gå. Eg meiner kommunane skal få mest mulig frihet, at me får eit levande lokaldemokrati. Det er best for at me skal få ønska utvikling.

Regjeringa prøver å gi kommunane meir lokal sjølvråderett gjennom avvikling av øyremerka midlar og større mulighet til lokale løysingar t.d. i barnehagedrifta. Så opplever me at fleirtalet på Stortinget ikkje vil fjerne øyremerka midlar og legg seg opp i drifta av kommunen, bl.a. kor stor søskenmoderasjonen i barnehagen skal vere. Dette er sentralstyring og viser at det blir vanskeleg for kommunane å få meir påvirkning over egen utvikling.

I arbeidet med å få meir lokal styring meiner regjeringa at me må ha kommunar som er robuste til å ta denne utviklinga og dermed at kommunane må bli større. Andre ønsker færre kommunar fordi me ikkje treng så mange og vil effektivisera Norge i og med at Stortinget skal bestemma kva og på kva nivå tenestene til dykk skal ha.

Oppi dette pågår altså prosessen om kommunestrukturen i Norge, og me på Bokn blir innvolvert. Det er ikkje nå realistisk å sjå for seg ein stor kommune på Haugalandet og Bokn er svært utsatt som egen kommune, der Arbeiderpartiet, Fremskrittspartiet og Høyre har sagt at Bokn er for liten for dei framtidige utfordringane kommunane står foran. Dei andre partia ser og for seg ei endring, men er ikkje så konkrete.

Kommunestyret har samrøystes vedtatt at me skal delta i prosessen, påvirka den til å bli best mulig og samtidig førebu ei sak, saman med Tysvær, om og korleis ei eventuell konsekvensutredning om kommunesamanslåing skal gjennomførast. Kommunestyret skal sjølvsagt avgjera om ei slik konsekvensutredning skal gjennomførast.

Næringsutvikling
Kommunestyret har også vedtatt at Bokn skal vere med i et interkommunalt selskap saman med Tysvær og Haugesund om næringsutvikling på Haugalandet. Rogaland Fylkeskommune er og positiv til å vere med. Det er vanskeleg for Bokn å ha eigne tilsette til å ta seg av dette arbeidet og selskapet vil bli ein drivkraft for utvikling på Haugalandet, som er eit felles bu og arbeidsmarked.

For dei som ønsker hjelp eller støtte ved næringsetablering skal kontakten fortsatt vere ordførar eller rådmann på Bokn. Eg trur at dette vil medføre eit betre tilbud til etablerarar, kontaktnett og mulighet for næringsutvikling på Bokn. Det er å håpa at fleire kommunar sluttar seg til dette samarbeidet etter kvart.

Fri skuleskyss
Formannskapet har gått gjennom reglane for fri skuleskyss og vedtatt nokre betre ordningar enn lova seier: Alle førsteklassingane, dei som må over Boknasund bru og dei som har over 3 km skuleveg får fri skyss.

Kulturmidlar 2004
Formannskapet har også delt ut 100 000,- kroner til lag og organisasjonar på Bokn i kulturmidlar som eit lite bidrag til det fantastiske arbeidet dei legg ned.

Vil til slutt ønske alle ein riktig god sommar.

Svein Ove

Mai 2004

Så er endeleg våren komen med varme og lyse fine dagar. Dette gir oss ein ekstra energi og vilje til å stå på vidare for
familien, heimen og andre. Nyt tida.

Bokn Fiskemottak AS
Me er i kontakt med mulige etablerarar i Knarholmen, etter Bokn Fiskemottak AS sin konkurs, og kommunen vil gjere det ein kan for at det skal lykkast å få til ei ny etablering. Det hadde vore svært positivt for Bokn igjen å kunna tilby arbeidsplassar til dei som mista sin, eller til andre.

Rekneskapen for Bokn kommune 2003
Denne viser eit lite overskot, til tross for lågare eigedomskatt og høgare finansieringsutgifter enn budsjettert. God budsjettdisiplin og innsparingar gjer at me kjem ut med overskot. Dette viser og at Bokn har ein pressa økonomi, men og har kontroll over økonomien. Alle ansatte har gjort ein svært god jobb og klart å halde oppe driftsnivået, sjølv etter innsparingar.

Sjukefråvær
Det er beklaglig at kommunen har eit så høgt sjukefråvær som 8,8%. Kommunen har tatt fatt i dette og blitt med i Haugaland HMS senter, IA-bedrift og andre tiltak. Formannskapet vil ha eit ekstra fokus på dette området framover.
 
Miljøverk
Det har vore arbeida ei stund med eit felles miljøverk på Haugalandet, som innbefattar Toraneset kommunane, Haugesund og Karmøy. Bokn kommunestyre har gått inn for dette, og det blir forventa at alle kommunane gjer det, og me vil ha eit nytt renovasjonsselskap frå 1/1-05. Det er oppfatninga at med eit selskap vil ein få betre ressursutnytting, betre og billigare tenester enn om ein hadde halde fram kvar for seg. 

Servicetorget
Utviding av servicetorget i Bokn kommune har nå tatt eit nytt steg ved at det er gjort avtale med a-etat og trygdekontoret om å tilby deira tenester i tillegg til tenester for kommunen og likningskontoret som er der frå før. Ein får nå utført fleire tenester på ein plass og slepp å reise på fleire kontor, og er eit ledd i at Bokn kommune skal vere ein serviceinnstilt kommune overfor innbyggarane. 
Gjennom arbeidet med serviceerklæringane og budsjettarbeidet har politikarane og administrasjon fokus på å yta dykk best mulig service, det er derfor kommunen er til.

ADSL
Bokn kommune har fått til ein avtale med Telenor om å byggja ut ADSL, høghastighetsnett, på Bokn og dermed vil 80 -90% av befolkninga og bedrifter kunne nytte denne tenesta.

17. mai
Nå står feiringa av Norge sin nasjonaldag, for tur og eg oppfordrar alle til å delta i ei tradisjonell feiring av dagen. Me begynner med kapproing i Alvestadkroken, så tog til kyrkja, gudsteneste, tog til Boknatun og skulen, med tradisjonell feiring der.
Om kvelden blir det folkefest med underholdning og tale for dagen av tidligare statsråd og nå stortingsrepresentant Magnhild Meltveit Kleppa.

Velkommen.

Svein Ove 

April 2004

Hei!

Bokn Fiskemottak AS
Det er beklagelig at Bokn Fiskemottak AS er konkurs og at ca 20 ansatte står utan arbeid. Det er alvorlig for Bokn og ikkje minst for dei som blir ramma av at arbeidsplassane opphøyrer. Bokn kommune eig bygget, medan SR-Bank eig utstyret, og me arbeider nå for å få ny aktivitet i bygget. I første omgang vil me prøva å få aktivitet som kan nytta bygg og utstyr som finst. Det er eit arbeid som blir svært vanskelig p.g.a. stor overkapasitet, permitering og nedlegging av bedrifter i bransjen.

Lykkast ikkje det vil me prøve å få annan aktivitet i bygget. Det er vårt mål at flest mulig kan få ein arbeidsplass her igjen.

Kommuneplanprosess
Mange av dykk har og vore med på kommuneplanprosessen for å staka ut satsingsområder for Bokn kommune i åra framover. Eg var svært glad for at så mange stilte opp og brukte tid på dette arbeidet. Det var ein optimistisk gjeng som var samla og som
hadde tru på framtida på Bokn. Dei kom med mange forslag til kva me bør satse på for å få til eit livskraftig lokalsamfunn på Bokn.

Forslaga vil bli tatt med i kommuneplanen og bli innarbeida i budsjetta etter kvart, noko kan me kanskje få til allereie i år. Det er viktig at me alle engasjerer oss i framtida og bidrar til ein god utvikling, dette er ikkje noko som kommunen åleine kan få til.

Vatn og avløp
Bokn kommunestyre har vedtatt nye regulativ for berekning av gebyr for vatn og avløp. Det nye er at kvar abonnent kan velje om han vil ha målar eller betale ut ifrå eit stipulert forbruk. Vel ein å betale ut ifrå eit stipulert forbruk vil der ikkje bli noko endring frå gebyra for 2004. Det vil bli ein auke i gebyr for gardsbruk og noko av næringslivet. Velgjer ein målar betaler ein leige for målar og for faktisk forbruk av vatn, det vil svare seg for dei som bruker lite vatn, under ca 200 kbm for ein bustad.

Saksbehandlingsgebyr
Bokn er ein av dei kommunane i landet som har tatt minst gebyr for saksbehandling. Kommunestyret ser det som nødvendig å
berekne noko meir saksbehandlingsgebyr enn me har i dag. All saksbehandling som angår bustadbygging vil bli fritatt for gebyr.

Foreldrebetaling i SFO
Bokn kommune har og hatt svært låge satsar for foreldrebetaling i SFO, og kommunestyret har satt opp satsane frå 1/8 -04 til eit nivå som tilsvarar det andre kommunar tar. 20,- kr pr. time for dei med minst bruk og 18,- kr pr. time for dei med mest bruk.

Det er beklageleg at kommunen må ta desse gebyra, men ein pressa økonomi gjer at kommunestyret vil ta desse gebyra framfor å redusera drifta tilsvarande. Alle desse endringane vil bli gjort kjente. Sjølv om dette blei mykje negativt får eg ønske alle ein god påske.

Svein Ove

Mars 2004

Omsorgsbustadene
Etter ei tids planlegging og bygging er omsorgsbustadane nå offisielt opna, sjølv om dei blei tatt i bruk før jul. Det var Jostein Nybø frå fylkesmannen i Rogaland som sto for opninga og det var helsing frå fylkeslege Ole Mattis Hætta. Det er nokre svært fine bustadar me har fått, og tilbodet som nå blir gitt til dei eldre er veldig godt og over snittet i Norge. Det er me stolte og glad for, sjølv om det er nokre som ikkje fekk plass.
Eg vil takke alle som har gjort dette mulig og deltatt i arbeidet, og takk til SR-Bank, Sanitetsforeningen, Pensjonistforeningen, vevstova og alle andre som har gitt gåve til bustadane.

Kommunestruktur
Som sikkert mange har sett så er det ein prosess på gong i Norge for å sjå på kommunestrukturen og offentlig organisering. Dette er komme opp med større og større tyngde frå mange hald. Det er auka krav frå innbyggarane, meir ansvar og oppgåver til kommunane og mangel på kompetanse i mange kommunar som er hovudgrunnar for at dette kjem opp nå. Kommunane må bli meir robuste for å møte framtida. Økonomiske motiv er nemnt, men tona ned.

Kommunane sitt forbund (KS) og Kommunaldepartementet er blitt enige om å køyre ein slik prosess og arbeidet vil starte opp snart. Det blir KS-styret i Rogaland som er ansvarleg for prosessen her. Bokn kommune er invitert til å delta i denne prosessen.
Formannskapet var heldige å få møte statssekretær i kommunaldepartementet for å presentere Bokn og diskutere kommune-strukturen.

Det er svært sannsynleg at Storting og regjering vil gjere noko med kommunestrukturen, og viss det ikkje skjer frivillig vil dei sterk
vurdera å bruke tvang,. Eg trur det blir eit tidsspørsmål før det skjer. Bokn er svært utsatt i denne prosessen, då mange allereie har signalisert at dette burde ha skjedd etter at me fekk fastlandssamband og er ein svært liten kommune.

La det ikkje vere nokon tvil om at Bokn kommune klarar seg godt, og det er ikkje noko akutt behov for at me skal bli slått saman med Tysvær. Det er likevel Formannskapet si oppfatning at det vil vere galt, og ikkje vil bli forstått, om me ikkje skulle delta i prosessen. Formannskapet vil og delta for at me sjølv kan vere med å styre og sette krav i prosessen.

Det vil nå bli sett på korleis me kan delta i prosessen, og det vil bli ei sak til Kommunestyret for å avgjere om og korleis me skal arbeide i denne prosessen. Vil då komme tilbake med meir informasjon om denne svært viktige saken for Bokn.

Rogfast
Det har og vore diskusjonar om ”Rogfast”, tunnel under Boknafjorden frå Bokn til Randaberg. Nokre på Karmøy vil ha omkamp og få ”Rogfast” til Karmøy. Fylkesdelplan og finansiering for ”Rogfast” er nå godkjent i Fylkes-tinget, og alle unntatt nokre få på Sør-Karmøy står bak det som er gjort. Eg er glad for at det ikkje blir noko omkamp, sjølv om dei skulle få saka opp i kommunestyret i Karmøy på nytt.
Dette initiativet er uheldig for samarbeidet og utviklinga på Haugalandet, og eg vil oppfordre alle til å stå samla for å få til ei god utvikling på Haugalandet.

Svein Ove